Gogorarazi nahi dizuegu aukera duzuela Langile Autonomoen Araubide Bereziaren kotizazio-oinarria eta ordaindu beharreko kuota aldatzeko, adinaren arabera baimendutako mugen barruan, 2022ko irailaren 30era arte. Aldaketa horrek 2022ko urriaren 1etik aurrera izango du eragina.
2023ko urtarrilaren 1etik aurrera autonomoen kotizazio-sistema berria aplikatzen hasiko da, eta 2022ko abenduan autonomoak bere tarteari legokiokeena baino oinarri handiagoarekin kotizatzen baldin badu, berdin jarraitu ahal izango du, nahi izanez gero.
2022ko azken egunean gainetik kotizatzen ari direnek berdin jarraitu ahal izango dute, epemugarik gabe, nahiz eta, tartekako erregimen berria abiarazi ostean, autonomo horiei 2023an, 2024an eta 2025ean deklaratuko dituzten etekin garbiek eta hurrengoek oinarri handiagoarekin kotizatzeko eskubiderik eman ez.
13/2022 Errege Lege-dekretuaren seigarren xedapen iragankorreko testuak dioenaren arabera, “2022ko abenduaren 31n dauzkaten errendimenduei legokiekeena baino kotizazio-oinarri handiagoarekin kotizatzen ari diren autonomoek kotizazio-oinarri hori mantendu ahal izango dute, edo oinarri hori baino txikiagoa, nahiz eta errendimenduen arabera horietako edozein kotizazio-oinarri baino txikiagoa aplikatzea zehaztuta dagoen”.
Xedapen horretan adierazita dago autonomoak EZ daudela behartuta kotizazio-oinarria jaistera, euren errendimendu garbiak txikiagoak direnean.
Erreforma hori 2023an indarrean sartzearekin batera, honako hauek gertatu ahal dira:
· Autonomoa 2022an errendimendu garbiei legokiokeena baino oinarri handiagoarekin kotizatzen aritzea. Horrelakoetan, oinarria bere diru-sarreren gainetik egon arren, salbuespen-neurri gisa kuota bera ordaintzen jarraitu ahal izango luke, eta, era horretan, erretiro-pentsiorako egiten ari den ekarpenak ez murriztu.
· Autonomoak 2022an etekin garbien arabera legokiokeena baino oinarri baxuagoarekin kotizatu izana. Horrelakoetan, oinarria igo egingo litzateke, eta legokiokeen kuota ordaindu beharko luke, diru-sarrerekiko ezarritako tartearen arabera. Edonola ere, horrek epe luzera pentsio hobea jasotzea eragingo lioke.
· 48 urtetik gorakoei dagokienez, 2023tik aurrera diru-sarrera nahikoak dituztenek oinarriak igotzea erabaki ahal izango dute. Dagoeneko mugarik ez dagoenez, gehieneko oinarriarekin ere kotizatu ahal izango dute.
