2019an, Osasunaren Mundu Erakundeak (OME) munduko osasun publikoaren lehentasun aldarrikatu zuen pazienteen segurtasuna, eta Pazienteen Segurtasunaren Mundu Egun izendatu zuen irailaren 17a.
Mutualiak konpromiso argia erakutsi du pazienteen segurtasunarekin, 2009an Pazienteen Segurtasunerako Plana lehenengoz onartu zuenetik. Azken urteetan, pazienteen segurtasunaren kultura hedatzen laguntzeko xedez, bat egin dugu OMErekin, Pazienteen Mundu Eguna ospatzeko.
Medikazio jarduera ez-seguruak eta medikazioari loturiko akatsek kalte handiak eragiten dituzte, baina mundu osoko osasun arretako akats saihesgarrietako bat dira. Medikazio sistemen gabeziek eta giza faktoreek –hala nola nekea, langile falta, etab.– ondorioak izan ditzakete preskripzio, transkripzio, emate, administrazio eta jarraipenean, eta kalte larriak eragin, pazientearen heriotza barne. COVID-19aren pandemiak nabarmen areagotu du, gainera, medikazioari loturiko akatsen eta horien ondoriozko kalteen arriskua. Hala, kalte horien zenbaterainokoa kontuan hartuta, «Medikazio segurua» izango da 2022ko Pazienteen Segurtasunaren Mundu Eguneko gaia. Ildo horretan, oinarri izango du Pazienteen Segurtasunari buruz OMEk finkatutako Mundu Erronka: kalterik gabeko medikazioa. Era berean, bultzada handia izango da medikazioarekin lotutako kalteak arintzeko premiazko neurriak hartzeko, sistemak eta medikamentuak erabiltzeko jarduerak sendotuz. 2022ko Pazienteen Segurtasunaren Mundu Egunaren goiburuaren bidez –«Medikazioaren segurtasuna»–, ohartarazi nahi da medikazio prozesu seguruagoa eta kaltegabea lortzearen garrantziaz, eta erronkaren inguruko ekintzei bultzada ematea, interesdun guztiei dei eginez lehentasuna eman diezaioten medikazioaren segurtasunari eta aurre egin diezaieten jarduera ez-seguruei eta sistemen gabeziei, arreta berezia jarriz medikaziotik eratorritako kalte saihesgarrien hiru arrazoi nagusiei: arrisku handiko egoerak, asistentziako trantsizioak eta polifarmakoterapia.
