Noiztik ari da Francisco Espinosa y Compañía SL zerbitzuak ematen?
Gure enpresa 1971n jaio zen, nire aita Francisco Espinosa López profesional bezala bere kasa lanean hasi zenean. Sozietatea berez 1979an sortu zen.
Ematen dituzuen zerbitzuak alor fiskalekoak bakarrikdira?
Francisco Espinosa y Compañía SL enpresan mota guztietako zerbitzuak ematen ditugu, alor fiskalean eta merkataritza-alorrean. Aholkularitza fiskal integral jarraitua nahiz noizbehinkako zerbitzu zehatzak (berregituraketa-operazioak, Zerga Ikuskaritzaren aurreko agerraldiak, testamentu-epaiketak…) eskaintzen ditugu.
Gainera, gure taldeko beste sozietate batzuek gure bezeroen beharrei erantzuten diete beste alderdi batzuetatik: kontabilitatea (ASERCONTA SL), lan-arloa (SERVICÍS Y ASOCIADOS SL) eta auditoretza (MOORE STEPHENS AMS SL).
Horretaz gain, itun profesionalak ditugu izen handiko beste bulego batzuekin, alderdi zibilak, penalak, jabetza intelektualekoak eta tankerakoak lantzeko.
Zenbat jendek egiten du lan taldearen sozietate guztietan?
Gure sozietateak Bilbon, Logroñon eta Gasteizen ditu bulegoak. Francisco Espinosa y Compañía SLn 32 lagunek egiten dugu lan. Taldean, 70 inguru gara.
Zer motatako bezeroak dituzue?
Denetik daukagu. Tamainari dagokionez, bere kasa dabilen enpresariak eta atzerrian filialak dituzten enpresa handiak dira gure bezeroak, baina tartean profesional liberalak eta ETEak ere baditugu.
Forma juridikoari dagokionez, merkataritza-sozietateak ditugu, pribatuak nahiz publikoak, eta fundazioak, irabazi asmorik gabeko erakundeak, kooperatibak, ABEEak, EITak… jarduera-alor guztietan.
Zer eragin izan du krisialdi ekonomikoak zuen sektorean?
Bulego profesional batzuk eta haien bezeroen kopuru garrantzitsu bat desagertu egin dira 2007-2008 aldean hasi zen krisialdi ekonomikoaren eraginez; gainera, ordain-sariak bere horretan geratu dira.
Bulego askotan pertsonala gutxitzeko neurriak hartu dituzte eta ez dituzte soldatak igo.
Francisco Espinosa y Compañía SLn ondorio larri horiek saihesteko gauza izan gara, gure bezeroen leialtasunari esker. Fakturazioa krisialdiaren aurrekoaren antzekoa da eta ez dugu neurri gogorrik hartu behar izan lan-arloan.
Gainera, administrazio publikoek nabarmen igo dute enpresek eman beharreko informazioa, zergen bidez diru gehiago biltzeko eta kontrol handiago izateko. Horren ondorioz, bulegoetan lan-karga handiagoa daukagu, baina ezin diegu bezeroei inola ere ordainarazi.
Egoera horren aurrean, gure kasuan, sektoreari aplikatutako teknologian eta marketin-ekintzetan inbertitzea erabaki dugu, bezero zaharren leialtasuna indartzeko eta bezero berriak erakartzeko.
Zer azpimarratuko zenukete MUTUALIAREKIN duzuen harremanaz?
Elkarrekin daramagun denbora luzea, lehenik eta behin. Francisco Espinosa y Compañía SL sortu zen urtean bertan, 1979an, hasi ginen garai hartako Mutua Vizcaya Industrial mutualitatearekin elkarlanean.
Taldeko beste enpresa batzuk are lehenago (1975). Elkarrekiko konfiantzan oinarritutako harreman bat dugu, eta horrek eroso eta seguru sentiarazten gaitu.
Zeintzuk dira Francisco Espinosa y Compañía SLren balio estrategikoak?
Gure balioak egunero eramaten ditugu praktikara, ez dira idatzita daukagun zerbait soilik. Honako hauek dira:
- Dedikazioa eta esfortzua.
- Profesionaltasuna.
- Zintzotasuna.
Zein izan da balio horiek finkatzera eraman zaituzten prozesua?
Balio horiek finkatzeko prozesuan gure langile gehienek hartu dute parte. Gainera, gure bezeroen eta gurekin harreman komertzial hori izan ez arren ezagutzen gaituzten hirugarren batzuen ekarpenak ere bildu ditugu. Egia esan, balio horiek aspaldi finkatu genituen, eta uste dugu oraindik ere indarrean daudela. Ez hori bakarrik, etorkizunean ere eutsi beharko diegu.
Nola partekatzen dituzue balio horiek zuen bezeroekin?
Dedikazioari eta esfortzuari dagokienez, konpromiso bat dugu gure bezeroekin, planteatzen dizkiguten gaietan zerbitzu azkarra eta eraginkorra emateko. Esleitzen zaien aholkulariarekin hitz egitea erraza da, eta horrela gertuko pertsona bat dela sentitzen dute. Horrelako zerbitzu bat eman ahal izateko ahalegina egin behar dugu. Erakunde guztiaren inplikazioa jartzen dugu horretan, eta igarri egiten da.
Profesionaltasunari dagokionez, hainbeste araudi-aldaketa eta irizpide administratibo dituen sektore batean, uste dugu kalitatezko zerbitzu bat etengabeko prestakuntzaren bitartez baino ezin daitekeela eman.
