Iktusa inpaktu sozial handia daukan gaixotasuna da, eta urriaren 29a Iktusaren Mundu Eguna da. Freno al Ictus Fundazioak honako datu hauek eman ditu:
- 120.000 kasu erregistratzen dira urtero.
- Lehen heriotza-kausa da emakumeen artean eta bigarrena orokorrean.
- Lau pertsonatik batek iktus bat izango du bere bizitzan.
- Desgaitasun hartuaren lehen kausa da helduetan.
- Aurreikusten denez, 2035erako, % 35 areagotuko dira iktus-kasuak.
Zifra horiek gorabehera, berri ona da iktusa prebeni eta trata daitekeela. Freno al Ictus fundazioak nabarmentzen duenez, iktus-kasuen % 90 saihets daitezke bizi-ohitura osasungarriak hartuta.
Prebentzioa eta MutualiaOn! eredua
Mutualiak prebentzio-kultura eta bizi-estilo osasungarria sustatzen ditu. Osasuna zaintzeko gure metodologiaren bidez, hots, MutualiaOn! ereduaren bidez , tresnak eta aholkularitza eskaintzen dizkiegu langileei eta enpresei.
Iktusa prebenitzeko, arrisku-faktore nagusien kontrako neurri aktiboak hartu behar dira. Hona arrisku-faktore nagusiak: diabetesa; presio arteriala; kolesterola; sedentarismoa; tabakoa, alkohola eta drogak kontsumitzea; estresa eta osasun emozionala.
Bizi-estilo osasungarria izateko, hauek egin behar ditugu:
- Dieta osasungarri eta orekatua izan.
- Tabakoa eta drogak utzi eta alkohol gutxiago kontsumitu.
- Osasun emozionala zaindu eta estresa saihestu.
- Jarduera fisikoa egin eta sedentarismoari aurre egin.
Ariketa fisikoa: «polipilula»
«Ariketa sendagaia da» kontzeptuaren arabera, ariketa fisikoa tresna terapeutiko efikaza da. Ebidentzia zientifikoak frogatu duenez, ariketak onura egiaztatuak ditu 26 gaixotasun kronikotan eta, iktusaren kasu zehatzean, ariketa egiteak heriotza-tasa murrizten eta depresio-, antsietate- eta estres-sintometan eragiten du.
Jarduera fisikoa progresiboa eta jarraitua bada, onura gehiago izango ditugu. Mutualiak gutxieneko dosi efektiboa gomendatzen du; hots, «150+2 ariketa-errezeta».
- Ariketa aerobiko moderatua egitea astean 150 minutuz (ibiltzea, bizikletan ibiltzea, eta abar).
- Indar-entrenamendua egitea bi egunetan: Zortzi eta hamar ariketa arteko bizpahiru saio egitea astean, muskulu-talde handiak ardatz hartuta.
Azkar jardun
Halako bat-bateko sintomarik ikusiz gero:
- Aurpegiko paralisia
- Indarra galtzea gorputz-adarraren batean (hanketan, besoetan edo bietan)
- Hitz egiteko arazoak
- Bat-bateko buruko min handia
- Bat-bateko ikusmen-nahasmendua
DEITU berehala 112 zenbakira
