Laneko eta Gizarte Segurantzako Ikuskaritza
- ESS/1452/2016 Agindua, ekainaren 10ekoa, Laneko eta Gizarte Segurantzako Ikuskaritzaren jarduera-izapidearen eredua erregulatzen duena.
2015eko uztailaren 10eko Ministroen Kontseiluaren Erabakiaren arabera, 2017az geroztik ez da nahitaezkoa izango bisita-liburu elektronikoa. Laneko eta Gizarte Segurantzako Ikuskaritzako Sistema Arautzen duen uztailaren 21eko 23/2015 legearen 21.6 artikuluaren arabera, lan-zentroetako bisitetan egiten dituzten jardueren edo ikuskatutako subjektua bulego publikoetara joanda egindako egiaztapenen idatzizko izapideak egingo dituzte funtzionarioek. Hala, kendu egingo dira bisita-liburuak; izan ere, aipatu artikuluak zehazten duenez, interesdunek ez dute izapide horiek egiteko liburu edo formulariorik eskuratu edo izapidetu beharrik izango.
Agindu horrek onartzen du aipatu izapidearen eredua, eta horren edukia 2. artikuluan arautzen da. Laneko eta Gizarte Segurantzako Ikuskaritzak, lan-ikuskariordeek edo enpresetako segurtasuna eta osasuna egiaztatzeko funtzioak garatzeko berariazko gaitasuna (LAPL) duten Estatuko Administrazio Orokorreko nahiz autonomia-erkidegoetako funtzionario publikoek egingo dute izapidea, eta zuzenbidean onartutako edozer bitartekoren bidez igorri ahalko zaio ikuskatutako subjektuari, edo, bestela, ikuskaritza egiten duen funtzionarioa artatu duen pertsonari eman.
Enpresari eman edo igorritako izapide-ale bakoitza gorde eta Laneko eta Gizarte Segurantzako Ikuskaritzaren esku jarri beharko da bost urtez, bakoitza eman den egunetik kontatzen hasita. Agindua indarrean jarri aurretik egindako bisita-liburuak eta izapide-ereduak ere gorde eta Laneko eta Gizarte Segurantzako Ikuskaritzaren esku jarri beharko da bost urtez, egindako azken izapidearen egunetik kontatzen hasita.
