Unión de Federaciones Deportivas Vascas-Euskal Kirol Federazioen Batasunaren sail honetan, triatloiari iritsi zaio orain txanda; azken urteotan herritarren artean asko zabaldu den eta arrakasta handia lortu duen kirola da.
Ia denok egin izan ditugu jarduera dibertigarriak aire zabalean, besteak beste, igerilekuan edo hondartzan igeri egin, lagunekin bizikletan ibili edo lasterka egin. Triatloiak, hiru jarduera horiek ordena horretan konbinatzen dituen kirolak, prestakuntza handiko kirolariei fisikoki zein mentalki asko eskatzen dien kirolaren irudia proiektatzen du. Alabaina, beste edozein jarduera fisiko bezala, dibertitzeko edo sasoi fisiko onari eusteko praktikatu daiteke. Praktikatutako diziplinen aniztasunaren ondorioz, kirol aerobikoa da, eta guztiz oso-betetzat jotzen da. Erresistentziako modalitatea da, mesedegarria alderdi kardiobaskularrarentzat, eta, hiru diziplinetan prestatzen denez, gorputzaren giharrerian oreka handiagoa lortzea ahalbidetzen du –garapena zangoetan eta goiko partean, besoetan, bularrean eta bizkarrean–.
Triatloia ahalegin handiena eskatzen dutenetako bat da gaur egungo kirolen artean. Bi kategoriatan banatzen da diziplina hau, bizitasunaren eta iraupenaren arabera: Super Sprint (350 metro igerian, 10 kilometro bizikletan eta 2,5 kilometro lasterka); eta Ironman (ia 4 kilometro igerian, 180 kilometro pedalei eragiten eta 42 kilometro, maratoi bat, lasterka). Horregatik, kirol jarduera hau ez dago lesioak eragiteko arriskutik libre. Daukan gogortasunaren ondorioz, beste kirol batzuk baino gutxiago praktikatzen da, baina kirol honen oso zaleak direnek egunero egiten dute lan euren denborak hobetzeko. Lehenengo triatloian, dedikazioa erabatekoa da, eta, horregatik, praktikatzen duenak, aurretik, segurtasuna izan behar du neurri eta eskaera handiko kirol ekitaldietan parte hartzeko moduan dagoen pertsona bat dela.
Triatloiko entrenamenduaren onura nagusietako bat daukan barietate handia da. Ikerketa batzuek erakutsi dute lasterketako errutinekin hasten diren kirolariak aspertu egiten direla batzuetan. Triatloilari batentzat, praktikatu beharreko eta hobekuntza lortu beharreko hiru diziplina daude, eta, horren ondorioz, aspertzeko probabilitateak urriagoak dira. Izan ere, lasterketa bat amaitu eta gero, beste bi egin behar dira. Horregatik, indar mentala ere giltzarria da.
Astean batez beste hamar orduz entrenatzea nahikoa izan daiteke sasoia hobetzeko eta estresa murrizteko. Zenbat eta luzaroago egin ariketak, orduan eta handiagoa da oxigeno maila odolean, giharretan eta organoetan, eta endorfina gehiago isurtzen zaio organismoari; endorfinak aldarte hobeak eragiten dituzten hormonak dira. Kirola hautatzerakoan, pertsona batzuek triatloira jotzen dute oso-beteenetako bat eta sasoi fisikoa indartzeko onenetakoa delako.
Ariketa aerobikoen metaketa bat denez, triatloiaren praktikak pisua kontrolatzen laguntzen du, kaloria asko erretzen direlako. Entrenamendu gogorrak eta eskaera handiko probak ondo osatuz gero, behintzat. Horrez gain, kirol honek metabolismoa aktibatzeko balio du, eta horrek kontsumo energetikoa handitzen du, are atseden egoeretan ere. Triatloiak lan gehiago eginarazten dio bihotzari, eta, horrenbestez, osasun kardiobaskularra zaintzen du eta gaixotasun batzuk saihesten laguntzen du, 2 motako diabetesa, artritisa eta osteoporosia, adibidez. Erresistentzia ariketak birika-edukiera hobetzen eta bihotz-barrunbea zein odol-uholdearen odol kopurua handitzen laguntzen du.
Pertsona batzuk hutsetik hasten dira triatloian, are beteranoen kategorian ere, adinik gabeko kirola baita, eta umetatik praktikatzeko modukoa. Ohikoena da triatloia egiten hasten diren pertsonak aurretik kirol hirukoitz hau osatzen duten modalitateetako bat praktikatu izana. Triatloia praktikatzeko, gomendatzen dugu azterketa mediko osoa egitea, norberaren benetako egoera fisikoa ezagutzeko, eta jarduera egoera fisiko horretara egokitzeko. Era berean, jarduera hau nahikoa atseden hartuta egitea gomendatzen da, sasoi fisikoan aurrera egin ahal izateko. Giharreria erregulartasunez landu daiteke gimnasioan, lesioak eragozteko, eta elikadurak osasungarria izan behar du, egiten diren ariketetarako egokia.
