Irailaren 8a Fisioterapiaren Mundu Eguna da; izan ere, egun horretan sortu zen Fisioterapiaren Munduko Konfederazioa (World Confederation for Physical Therapy – WCPT), 1951n.
Fisioterapiaren helburu nagusia pazienteen bizi-kalitatea hobetzea da, hura sustatuz eta prebentzio-lana eta tratamendua eginez, eta, egun honetan, fisioterapiako profesionalak omendu nahi ditugu. Izan ere, Mutualiako errehabilitazio-zerbitzuen oinarria dira, eta gure pazienteen segurtasunaren, ongizatearen eta babesaren alde lan egiten dute beti.
Zer eragin eta irismen duen fisioterapiak Mutualian
Langile batek lan-arloko istripu bat izaten duen unean, ondorioak fisikoak zein emozionalak izaten dira. Gure fisioterapeuten helburu nagusia da haien bizi-kalitatea berreskuratzea, eta horretarako haien ongizate integrala sustatzea.
2023an, 121.946 fisioterapia-saio egin genituen gure asistentzia-zentroetan (Ercilla Klinika, Pakea Klinika eta Erabakimen Handiko Ospitalea). Kualifikazio handiko talde bat dugu, etengabe trebatzen ari dena, eta azken ebidentzia zientifikoak aplikatzen dituena kasu bakoitza modu pertsonalizatuan lantzeko. Ikuspegi indibidualizatu horrek bermatzen du paziente bakoitzak erabat osatzeko behar dituen denbora eta baliabideak jasotzea, eta konfiantzazko harremana sortzen du fisioterapeutaren eta pazientearen artean.
Eraldaketa digitala eta berrikuntza
COVID 19aren pandemiaren ondorioz, urruneko errehabilitazioa ematen hasi zen Mutualia, eta, eraldaketa digitalaren aldeko apustua eginez, lan-ildo hori hobetzen eta osatzen jarraitzen dugu. Horretarako, zenbait baliabide ditugu, hala nola Gehitu plataforma eta YouTubeko kanala, “Fisioa etxean” eta “Mutualia On” bideoekin. Gainera, Hep2Go Plataforma ere erabiltzen dugu, zeina funtsezko tresna baita errehabilitazioko profesionalek etxean egiteko ariketa-programak sortzeko, gure errehabilitazioko eta fisioterapiako profesionalek gertutik gainbegiratuta.
Nahasmendu muskuloeskeletikoen prebentzioa eta tratamendua
Fisioterapiak funtsezko zeregina du, halaber, nahasmendu muskuloeskeletikoen prebentzioan eta tratamenduan. Lanarekin lotutako osasun-arazoak dituzten langileen % 60k uste du arazo muskuloeskeletikoak direla beren arazo larriena. Laneko bajen % 25 eta gaixotasun profesionalen % 80 eragiten dituzte, eta, mugikortasun fisikoari ez ezik, ongizate emozionalari ere eragiten diote. Ezinbestekoa da gure fisioterapeutek patologia horietan garaiz esku-hartzea intzidentzia txikitzeko eta etorkizuneko lesioak prebenitzeko.
