Guztiontzako mugikortasunaz hitz egiteak edozeinen eskura dagoen garraio-eredu baten alde egitea esan nahi du. Helburua da diru-sarrerak, bizilekua, generoa, gaitasun fisikoak eta beste faktore asko modu seguruan, eskuragarrian eta jasangarrian mugitzeko oztopo ez bihurtzea. Guztiontzat pentsatutako mugikortasunak adin guztietako pertsonak hartu behar ditu kontuan, haurtzarotik hasita zahartzaroraino, baita etorkizuneko belaunaldietako kide izango direnak ere.
2026an, Europako Mugikortasun Asteak zehazki gai horretan jarri du arreta: belaunaldien arteko mugikortasuna. Gure bizitzan zehar, mugitzeko ditugun beharrak aldatu egiten dira. Haur batek ez ditu pertsona gazte, heldu eta adineko batek dituen aukera eta zailtasun berdinak. Etapa bakoitzak bere erronkak ditu, eta bizitza sozialean autonomia eta parte-hartzea mantentzea ahalbidetuko duten konponbideak eskatzen ditu.
Horregatik, erronka bizitzako etapa desberdinetara egokitzeko gai diren garraio-sistemak diseinatzea da. Gaur egungo garraioak egungo biztanleriaren beharrei erantzun behar die, baina, aldi berean, aldaketa demografikoetarako eta etorriko diren belaunaldien beharretarako ere prestatu behar da. Adin guztietako pertsonen arteko lankidetzak zeregin garrantzitsua izan dezake prozesu horretan; izan ere, belaunaldi bakoitzak bere ezagutzak, esperientziak eta gaitasunak eskaintzen ditu, mugikortasun inklusiboagoa eraikitzen lagun dezaketenak.
Gai horrek are garrantzi handiagoa hartzen du inoiz baino belaunaldi gehiago elkarrekin bizi diren gizartean. Errealitate horren aurrean Europako Batzordeak neurriak sustatzen ditu, belaunaldien arteko ekitatea indartzeko eta erabakiak hartzerakoan epe luzeko ikuspegia txertatzeko. Asmoa da oraingo politikek egungo arazoei erantzuteaz gain, datozen hamarkadetan biziko direnengan izango duten eragina ere kontuan hartzea.
Lan-ildo horren barruan dago Europako Batzordearen lehen estrategia, belaunaldien arteko ekitateari buruzkoa; xedea da gobernantzan etorkizuneko ikuspegia sustatzea eta gazteei protagonismo handiagoa ematea politika publikoak lantzerakoan.
Azken batean, mugikortasun jasangarriaz hitz egitea ez da soilik emisioak murriztea eta garraiobideak hobetzea. Horrek esan nahi du, halaber, pertsona guztiek mugitzeko eta gizartean erabat parte hartzeko aukera dutela bermatzea, haien adinari eta bizitzako etapari erreparatu gabe. Mugikortasun hori eraikitzea guztion erronka da; beraz, ez dugu soilik gaur egun garraioa erabiltzen dutenengan pentsatu behar, baizik eta bihar erabiliko duten belaunaldiengan ere.
Kanpaina honekin bat egin eta informazio gehiago aurkitzeko aukera webgunean duzu: EUROPAKO MUGIKORTASUN ASTEA | Hasiera,
Era berean, hainbat hedapen-material aurki ditzakezu:
– «Guztiontzako mugikortasuna» urteko gaiari buruzko infografia
– «Autorik gabeko eguna nola antolatu urratsez urrats» infografia
Egin klik bakoitzean, informazio gehiago eskuratzeko.
Mutualiak ekimen honekin bat egiten du, eta gure webgunean eskura dauden hainbat prestakuntza- eta sentsibilizazio-jarduera sustatzen ditugu, laneko bide segurtasunaren garrantzia bultzatu eta zabaltzeko.
Bide segurtasuna lan segurtasunaren parte da, edozein dela ere norberaren sektorea eta burutzen duen jarduera. Horregatik, arrisku horren inguruko kontzientziazioa sustatu nahi dugu, bai eta joan-etorriek eragindako istripuak kontrolatzeko eta murrizteko aplika ditzakegun prebentzio-neurri eta -faktoreak ezagutarazi ere, honako material hauekin, horien artean:
– Laneko Mugikortasun Planaren prozedura
– Gure campusaren bidez dibulgazio-jarduerak,
– Gure BIDE SEGURTASUNAREN eskola.
– Ikus-entzunezko materiala: bideoen bidezko sentsibilizazio-kanpaina astero.
Gidatzean atsedenaldi aktiboak. Gidatzen dugun bakoitzean atsedenaldi aktibo bat egitea gomendagarria da; gaitasun funtzionalari eusten eta lesioak prebenitzen lagunduko diguten ariketa fisiko batzuen bidez. Adibidez:
Banatzailea: Hasieran Autoa geldirik Zamalanak Gidaria- atsedenaldi aktiboa
Informazio gehiago nahi izanez gero, jarri harremanetan Prebentzio aholkularitzarekin: prevencion@mutualia.eus
