Mutualiak, Donostiako Pakea klinikan, martxan jarri du helburu medikoak dituen 3D inprimaketa ezarri eta garatzeko proiektu bat. Mutualiak langileen asistentzia sanitarioa hobetzeko abangoardian jarraitzeko duen helburua bermatzen du aurrerapen garrantzitsu horrek.

Proiektu hau garatzeko, 3D inprimaketako teknikari, fisioterapeuta, erizain, mediku eta ingeniari biomedikoek osatutako talde berri bat sortu da; halaber, Nafarroako Unibertsitateko Ingeniaritza Eskola, Tecnum, elkarlanean ari da.

Valentín Guerrero medikuak hau adierazi du: «Proiektu honen helburu nagusia da hausturen modelo fisikoak hiru dimentsiotan egitea; horiek aukera emango baitigute ebakuntzak planifikatzeko eta, horrela, kirurgia-denbora eta pazientearen segurtasuna hobetuko dira». Gaur egun, era berean, EMNen (erresonantzia magnetiko nuklearra) DICOM iruditik modeloak lortzeko ikertzen ari dira teknikoki posible den kasuetan. Horren helburua da OTAren (ordenagailu bidezko tomografia axiala) erabilerarekin pazientearen erradiazio-esposizioa saihestea.

Mutualiak, halaber, 3D teknologia erabili nahi du neurrira egindako ortesiak diseinatzeko alderantzizko ingeniaritzarekin, pazientea irradiatu gabe. Kasu honetan, interes medikoa duen gune anatomikoaren diseinua lortzeko helburuarekin gauzatzen den prozedura bat da alderantzizko ingeniaritza. Gorputzeko dena delako gunearen kopia batetik, 3D inprimagailuari esker, pazientea sendatzea erraztuko duten ferula edo ortesi pertsonalizatuak sor daitezke.