Cristina Mendiak, MUTUALIAren izenean, Bizkaiko enpresetan berdintasuna sustatzeko «Enpresan Bardin»proiektuaren barne egindako gosarian parte hartu zuen pasa den azaroaren 15ean. Bertan hainbat ekintza proposatu ziren Cebek, Bizkaiko Enpresen Konfederazioaren gobernu-organoetan emakumeak egotea lortzeko.
Francisco Javier Azpiazu Cebek-eko idazkari nagusiak Cebek-en Gobernu Organoen hauteskunde-prozesuaren sistematika azaldu zuen.
Jarraian, Iñaki Garcinuño CEBEK-en presidenteak Fortec-en ikertzailea aurkeztu zuen. María Reulak aurkeztu zuen «Emakume enpresarien/zuzendarien parte-hartzearen eragina Bizkaiko enpresen gobernu-organoetan, eta, ondorioz, enpresa-elkarteen gobernu-organoetan» azterlana, Cebek-ek egin duena, Bizkaiko Foru Aldundiaren laguntzarekin.
Ikerketaren arabera, zuzendaritza-taldeetan emakumeak egoteak sormena eta berrikuntza areagotzen ditu; beste ikuspegi bat eskaintzen dute. Gizarte-errekonozimendua eskuratzen dute horrela.
Gainera, emakumeak unibertsitateetan prestakuntza bikaina jasotzen ari direnez, hanka-sartze bat da «talentu eta goi-mailako kualifikazio» hori alde batera uztea, enpresetako zuzendaritza-postuetan aritzeko gai direlako. Gainera, argi dago genero-dibertsitateak enpresaren irudia eta ospea hobetzen dituela, sinesgarritasuna handitzeaz gain.
Aurkezpenean aurrerago, abantailak aipatu zituen: bizitza pertsonala, familiakoa eta profesionala kontziliatzeko neurriak ezartzeari esker, langileak konprometituago daude enpresarekin, talentua erakarri eta bertan geratzen da eta, azken batean, bizi-kalitatea hobetzen da.
Txostenean (www.cebek.es webgunean eskura daiteke), emakumeek zuzendaritzako postuetara iristeko dituzten oztopo eta zailtasun nagusiak aztertzen dira. Horiek, besteak beste, generoari eta antolakuntza-kulturari buruzko aurreiritzien eta kontziliazio-zailtasunen ondorio dira. Horrez gain, neurri eta ekimen eredugarriak proposatzen ditu erantzunkidetasunaren arloan.
