Hilabetea: apirila 2017

Lanaren Nazioarteko Erakundeak gai hau aukeratu du 2017rako: LANEKO SEGURTASUNARI ETA OSASUNARI BURUZKO DATUEN KONPILAZIOA ETA ERABILERA OPTIMIZATZEA

2003az geroztik, apirilaren 28a Laneko Segurtasunaren eta Osasunaren Munduko Eguntzat hartu du Lanaren Nazioarteko Erakundeak; egun horretan, bada, nazioarteko urteko kanpaina bat programatzen da lan segurua, osasungarria eta egokia sustatzeko; laneko istripuen eta lanbide-gaixotasunen biktimak omentzeko; eta segurtasuna eta osasuna xede dituzten politika eta estrategia nazionalak garatu eta ezartzeko lankidetza handitzeko.

Mutualiak Laneko Segurtasunaren eta Osasunaren Munduko Egunean parte hartzen du; hain zuzen ere, Lanaren Nazioarteko Erakundearen 2017ko kanpaina hedatzen eta zabaltzen laguntzen du, eta hainbat ekitaldi antolatzen ditu Laneko Arriskuen Prebentzioaren balioak sustatzeko hain egun berezian.

Hori horrela, apirilaren 28an, «Prebentziozko Begiradak» erakusketa irekiko zaio publiko orokorrari, Bizkaiko Batzar Nagusietako erakusketa-aretoan (Hurtado de Amezaga 6, Bilbo). Inaugurazio-ekitaldia hilaren 27an izango da, eta bertan izango dira Bizkaiko Batzar Nagusietako presidente Ana Otadui andrea, Osalaneko zuzendari nagusi Alberto Alonso jauna eta Mutualiako zuzendari gerente Ignacio Lekunberri jauna. Maiatzaren 25era arte bisitatu ahal izango da erakusketa.

Bestalde, maiatzaren 5ean, Laneko Arriskuen Prebentzioari buruzko XIV. Argazki Lehiaketaren sariak eta Zero Bidean sariak –laneko ezbeharren tasan emaitza positiboak izan dituztelako nabarmentzen diren enpresei ematen zaizkie– banatzeko ekitaldia antolatu du Mutualiak. Laura Rosillo Cascante andrea izango da ekitaldian, eta «Age Management: Zahartze sortzailearen artea lan-munduan» hitzaldi interesgarria eskainiko du.

Gainera, hain egun berezia ospatzeko jarduerak egiten dituzten enpresa kideekin lankidetzan arituko gara.

Laneko Segurtasunaren eta Osasunaren alde egiteko 365 egun kanpaina abiaraziko dugu; hartara, ospakizuna 2018ko apirilaren 28ra arte luzatu nahi dugu.

Lanaren Nazioarteko Erakundeak urte honetarako aukeratu duen gaiari lotuta (hain zuzen ere, LANEKO SEGURTASUNARI ETA OSASUNARI BURUZKO DATUEN KONPILAZIOA ETA ERABILERA OPTIMIZATZEA), Tubos Reunidos SAren Prebentzioko arduradunari egindako elkarrizketa sartu dugu. Enpresa horrek jaso zuen Mutualiak antolatzen duen Laneko Arriskuen Prebentzioko Ikerketa, Berrikuntza eta Garapen Teknologikoko azken saria «Industria siderurgikoan ezbehar-tasa murrizteko azterlan estatistikoa eta eredu matematikoa» proiektuarekin.Mutualiak antolatzen duen Laneko Arriskuen Prebentzioko Ikerketa, Berrikuntza eta Garapen Teknologikoko Sariaren VII. edizioko entrega-ekitaldia.  Elkarrizketa: Tubos Reunidos

Esteka honetan kanpainari nahiz hari atxikitako txostenari buruzko informazio gehiago aurkituko duzue.

Eta zuen erakundean, nola ospatuko duzue apirilaren 28a?

Kepa Bilbao

Trebetasunak garatuz

Areto-futbola gure artean asko praktikatzen den kirol bat da. Euskal talde askotxo dago goiko mailetan, eta emaitza onak lortzen dituzte, dela gizonezkoetan dela emakumezkoetan, eta kategoria desberdinetan. Gainera, modalitate zabaldu bat da lagunekin une atsegin batez gozatzeko eta aisialdian kirol-praktika atsegin bat egiteko. Pista eta kiroldegi asko bete egiten dira aisialdian forma fisikoa hobetzeko eta, betiere kirola behar bezala ulertzen bada, tentsioak askatzeko partidekin (ofizialak eta lagunartekoak). Areto-futbolaren onuretako bat azkar pentsatzen laguntzen duen espezialitate bat izatea da, kirol oso dinamikoa baita. Areto-futbolak espazioak irekitzen laguntzen du, eta erabakiak denbora gutxian hartzeari dagokionez, praktikatzen duen bakoitzari mugitzeko trebetasunak inprobisatzeko eta garatzeko aukerak emateaz gain, jokaldi, pase, jaurtiketa edo defentsa bat aukeratzean behar duen buru-bizkortasuna zabaltzeko aukera ematen dio. Eta hori beste kirol batzuk baino azkarragoa delako, espazio murriztu batean jokatzen baita; etengabeko kokapen-, jarrera- eta mugikortasun-aldaketak direla medio, jolasten direnen gaitasun fisiko-mentalak hobetu egiten dira. Baloia teorian gure organismoko gorputz-adar traketsenekin menderatzen da, eta aldi berean, behar bezalako erantzuna ematen zaio taldeko kide bati edo aurkariaren esku-hartzeei eta asmoei aurka egiten zaio; jokalariak kolektiboaren aurrean erantzukizuna bere egin dezan eragiten du. Horri esker, solidaritate- eta kolektibismo-adostasun bat lortzen da helburu bateratu bat lortzeko: taldeak irabaztea, nahiz eta jostatzea den beti gailendu behar dena. Areto-futbola, leku askotan, bizitzeko estilo bat da eta oso errotuta dago, adibidez, Euskal Autonomia Erkidegoan; bertan dozenaka klub dago eta txapelketa ugari antolatzen da. Behar bezala kontrolatuta eta behar bezala prestatuta, kirol horrek onura handiak ekar diezazkieke haurrei. Areto-futbola futbolaren bertsio bat da, baita modalitate jarraituenetako bat ere. Berez den espektakuluaz gain, dela bere abiaduragatik edo teknikagatik, badago aukera gure pistetan areto-futbolean nabarmentzen diren jokalariek hamaika jokalariko futbolera jauzi egiteko. Izan ere, areto-futbolak asko laguntzen du egungo futbolean azkar eta eraginkorki pentsatu ahal izateko. Gainera, modalitate honek zangoetako muskuluen potentzia handitzen du, odola oxigenatu, gaitasun kardiobaskularra hobetu, erreakzio-abiadura, mugimenduen koordinazioa eta ikusmen periferikoa estimulatu, jauziaren potentzia handitu, testosterona-maila igo, gizartekotzen du eta taldean lan egiten irakasten du.

Haurrak areto-futbolean jokatzen has daitezke –bost jokalariko taldeak– Lehen Hezkuntzan hasten direnetik, sei urterekin. Badira futbola eta areto-futbola batera praktikatzea erabakitzen duten gazteak, baina mailaz igotzean, bataren edo bestearen artean erabaki behar izaten dute. Oso txikitatik bi modalitateak bateragarri egin baditu, bi kiroletako onurak lortzen dira. Alde batetik, areto-futbolean zelaia txikiagoa denez, haurrek tamaina txikiagoa izateagatik zailagoa den espazio batean driblatu behar dute, eta futbola aukeratuz gero, primeran etorriko zaien trebetasun bat garatuko dute. Oso txikitatik hasiz gero, oso azkar ikasten dituzte areto-futbolaren oinarrizko nozioak, eta beraz, futbolera jauzi egitea erabakitzen badute, besteen artean nabarmenduko dira, beren teknika onagatik. Taldeko kirola denez, laguntasuna, aurkariarekiko errespetua, solidaritatea eta antzeko balioak ikasten dira, etorkizunean pertsona hobeak izaten laguntzen duten bertuteak. Kirol guztiak dira osasunerako, ikasketarako eta portaerarako iturri positibo haurtzaroan. Eta areto-futbolak txikienen trebetasunak proiektatzen ditu jarduera fisiko oso eta atsegin horretan.

http://euskalkirola.eus/

Laneko Arriskuen Prebentzioa egun bateko gauza ez dela gogoan izateko, aitzitik, eguneroko lanean kontuan izatekoa dela gogoratzeko, Mutualiak ospakizuna 2018ko apirilaren 28ra arte luzatu nahi du. Bi astez behin; astelehenetan; webgunearen eta sare sozialen bitartez, «Prebentziozko Begiradak» argazki-erakusketako mezu bat eta argazki bat helaraziko dugu.  Horrela, guztiontzat seguruak eta osasungarriak diren lanak izateko helburu horretan guztion esku-hartzeak duen garrantziari buruz kontzientziatuko duten mezuak bidaltzen eta zabaltzen saiatuko gara.

Hona hemen lehen mezua:

365 egun laneko segurtasunaren eta osasunaren alde egiteko.

Guztiok onik irits gaitezela egunero etxera.

Zure lanean, EZER EZ da ZU seguru egotea eta ZU osasuntsu egotea baino garrantzitsuagoa.

Garbi izan.

Lanaren Nazioarteko Erakundearen (LANE) Europako datuetan oinarrituta, laneko gaixotasunen intzidentzia horien eraginpean dauden 1.000 pertsonatik 2,5 eta 5,4 bitartekoa da, aztertutako jarduera-adarraren arabera. Horrek esan nahi du minbizi guztiek baino intzidentzia handiagoa daukatela eta gaixotasun koronarioen intzidentziatik oso gertu daudela.

Miguel Ángel Márquez González Inspección Interior/ Barneko ikuskaritza.

Mutualiak mintegi teknikoa antolatu zuen Bilbon apirilaren 4an (asteartea), Lan Ikuskaritzaren arriskuen prebentzioari buruzko bisitaren aurrean nola jokatu azaltzeko.

Ricardo Mínguez Muñoz Eusko Jaurlaritzako GSLIren zuzendariordeak Lan Ikuskapenaren alderdi teknikoez eta prebentzioan atzerriko enpresekin koordinatzeaz hitz egin zuen jardunaldi horretan.  Halaber, Jesús Dalmau MeñicaIMQ Prevención enpresako zuzendari kudeatzaileak Lan Ikuskaritzaren bisitarekin lotuta enpresek izandako zenbait esperientzia ere azaldu zituen.

Hona hemen jardunaldian azaldutako alderdi interesgarrienak:

LAN-IKUSKARITZAREN ALDERDI TEKNIKOAK

(Ricardo Mínguez Muñoz jauna, Eusko Jaurlaritzako GSLIren zuzendariordea)

Lan Ikuskaritzaren antolamendua eta funtzionamendua

Gaur egun Estatuko Administrazio Orokorrak Eusko Jaurlaritzako eta Kataluniako Gobernuko administrazioekin batera lan egiten du lan-ikuskapenaren arloan.

Zein da Lan Ikuskatzaileen zeregina?

Lan-ikuskatzaileek araudia betetzen dutela zaintzeaz arduratzen dira, besteak beste, lan-harremanen, arrisku-prebentzioaren Gizarte Segurantzaren, enpleguaren, migrazioen eta abarren alorretan. Horrez gain, bitartekari-lana ere egin dezakete, laguntza teknikoa eskain diezaiekete erakundeei, eta informazioa ere eman jurisdikzio edo administrazioko organoei.

 Nola egiten da ikuskapena?

Ahalik eta sekretu eta inpartzialtasun handienaz egiten dituzte jarduerok, eta enpresari aldez aurretik jakinaraziko diote edo ez bisita egin behar diotela. Oro har, ikuskatzaileak bere burua identifikatzen du erakundearen instalazioetan sartu eta berehala, eta lan-jarduera egiten duten toki orotan sartzeko eskubidea du.

Nola gauzatzen dituzte jarduketak?

Planen edo programen ondorioz egin daitezke jarduketak, baita bere ekimenez edo salaketa batek eraginda ere, edota nagusiek aginduta edo beste organo batzuek eskatuta ere egin daitezke. Salaketa dagoenean, salatzailearen nortasuna ez da jakitera emango, eta enpresaren barruan interesak baditu baino ez zaio ikerketaren nondik norakoen berri emango.

Jarduketa horietan, ikuskatzaileak informazioa eska dezake, agerraldiak exijitu ditzake, agiri bidezko azterketak egin ditzake, kautelazko neurriak hartu, eta abar. Jarduketek hainbat ondorio izan ditzakete; besteak beste, zuzenketa behar duen ohartarazpena, jarduera etetea, edota lan-istripuen eta lanbide-gaixotasunen aseguru-primetako errekarguak edo murrizpenak.

Zer berme dituzte?

Beren funtzioak betetzean lan-ikuskatzaileek erabateko autonomia tekniko eta funtzionala izango dute, babesa bermatuko zaie mota guztietako indarkeria, hertsapen eta mehatxuen aurrean, baita okerreko jarrerekiko independentzia ere. Jarduketaren jatorria edozein izanik ere, egoki iritzitako ikertzeko jarduketa guztiak gauzatu ahal izango dituzte, baita egokitzat jotzen duten neurri oro hartu ere.

Ikuskapen-jarduketaren datuak

Laneko Arriskuen Prebentzioren arloan 2016an ondorioz izandako jarduketa eta arau-hauste nabarmenak

Laneko harremanen arloan 2016an ondorioz izandako jarduketa eta arau-hauste nabarmenak

 Berdintasunaren arloan 2016an ondorioz izandako jarduketa eta arau-hauste nabarmenak

Jesús Dalmau IMQ Prevención enpresako zuzendariak ere parte hartu zuen. Nabarmendu zuenez, ikuskapen-bisita bati aurre egiteko era onena da onartzea laneko arriskuen prebentzioa betebeharra baino gehiago dela, prebentzioa egiteak laneko arriskuak murrizten dituelako eta pertsonen osasuna hobetzera bideratuta dagoelako, hori izanik erakundeen aktibo nagusia. Enpresetako zuzendarien eta langileen prebentzio-kultura jasotzen dituzten informazioaren eta prestakuntzaren bitartez handitzea oso garrantzitsua dela ere nabarmendu zuen, bai oro har, baita ikuskaritzaren bisita baten aurrean ere.  Ez da gauza bera ikuskapen-bisita batean enpresaburuak Prebentzio Planaren karpeta ez aurkitzea, eta bisitan enpresaburuak eta langileek haren edukia eta beren eginkizunak eta ardurak ezagutzea.

IMQ Prevención enpresan izandako esperientziagatik, prebentzio-jarduera eraginkorra eta integratua, prebentzioaren arloko betebeharren betetze formalari kontrajarrita, lagungarria da gure teknikariek lantokien, makinen zein pertsonen arteko harremanen baldintzak –bitartekaritzaren bitartez gatazka dagoenean– hobetzeko egiten dituzten txostenetan oinarrituta erabakiak har ditzagun.

EDUARDO COBOk,  MUTUALIAko Berdintasunerako Batzordeko kideak, Gipuzkoako Foru Aldundiak gonbidatuta, martxoaren 16an Kontziliazio eta Erantzunkidetasunerako Lurralde Plana egiteko prozesua. TOKIKO GARAPENEKO ENPRESAK ETA AGENTZIAK saioan parte hartu zuen

Miren Elgarrestak, Gipuzkoako Foru Aldundiko Berdintasuneko diputatuak, Kontziliazio eta Erantzunkidetasunerako Lurralde Plana egiteko prozesuaren baitan kokatu zuen bilera.

Topaketaren helburuak:

1.- Abiapuntuko diagnostikoa aurkeztea eta kontrastatzea

2.- Planaren egitura eta erronkak aurkeztea eta kontrastatzea, eta enpresetan eragiteko zein neurri-mota har daitekeen aztertzea

1.- Abiapuntuko diagnostikoa aurkeztea eta kontrastatzea

Bileran erabili zen ppt-aren bidez, kontziliazio eta erantzunkidetasunari dagokionez, plangintza egituratzea helburu, oinarri hartzen ari den diagnostikoaren berri eman zen.

EHUko Ekonomia Aplikatuko Fakultateko Mertxe Larrañagak Gipuzkoako lan-merkatuan dauden desberdintasun nagusiei eta kontziliazio-politikei buruz egindako aurkezpenari, honako iruzkinak egin zitzaizkion:

• Berdintasun-planen bilakaerari buruz galdetu zen. Gero eta gehiago ote diren. Halako planak dituzten enpresak asko ez direla mahaigaineratu zen, enpresen tamaina faktore garrantzitsu bat dela, eta Gipuzkoan enpresa gehienak txikiak direla.
• Enpresen tamainaren ildotik, enpresa txiki bateko ordezkari batek bere desadostasuna adierazi zuen, antolatze-kontu bat dela argudiatuz.
• Kontziliazio-politikak garatu dituzten enpresak oso feminizatuta daudenak direla aipatu zen, baina horrek ez duela «arazoa» konpondu.
• Lan-mota aipatu zen zailtasun-faktore gisa. Etxeko zainketa eta antzeko esparruetan arduraldi osorik ia ez dagoela esan zen. Halaber, ordutegiak malguak ezin izan daitezkeela.
• Garrantzitsua da nabarmentzea kontziliazioa gizonen kontua ere badela.
• Gipuzkoan industriak duen pisu nabarmena kontuan hartuta (% 31, Europako % 19ko batez bestekoaren ondoan), horrek kontziliazioaren eragin negatiborik duen galdetu zen. Esan zen, berez, faktore horrek ez gaituela leku okerragoan jarri.
• Galdetu zen ea baden daturik industrian kontziliazio-neurrien erabilerari buruz. Amatasun-/aitatasun-baimenei buruzko datuak badirela aipatu zen.
• Segregazio horizontala hezkuntza-sisteman egiten diren «aukerekin» oso erlazionatuta dagoela aipatu zen. Emakume gehiago dago gizarte-zientzietan, erizaintzan eta abarretan. Ikasketa teknikoetan (ingeniaritzak eta abar) gizonak dira oraindik ere nagusi, nahiz eta badirudien horietako batzuetan emakume gehiago sartzen ari dela.
• Lanbide-heziketan segregazio hori oso nabarmena da, eta lanbide maskulinizatuetan presta daitezen emakumeak animatzen dituzten politiken hutsunea nabari da. Hezkuntzaren arloan lan egiten duten erakunde batzuek ahaleginak egin izan dituzte ildo horretan, baina ez da emaitza onik izan. Emakume gidariak eta antzekoak agerian jarri beharko lirateke, ereduak eta erreferenteak sortzeko.
• Garraio-enpresa bateko ordezkari batek aipatu zuen bere esparruan, oso maskulinizatuta egon arren, emakumeak erakartzea posible dela ikusten ari dela. Hala ere, lanpostu batzuetarako, adibidez, lantegi mekanikoetarako, ez dago emakume prestaturik. Bestalde, aipatu zen zainketarako baimenak eskatzen dituzten gizonak ez daudela ongi ikusita.
• Azkenik, beren langileentzako neurri malguak aztertzen eta abian jartzen ari direla esan zen, norberaren beharrei egokitu dakion.

2.- Planaren egitura eta erronkak aurkeztea eta kontrastatzea, eta enpresetan eragiteko zein neurri-mota har daitekeen aztertzea

Taldeka, bileran parte hartu dugunoi, gure ustez, enpresei begira, planak jaso ditzakeen neurriak jasotzea eskatu zitzaigun.

Lantaldeek egindako proposamenak:

1. TALDEA

• Amatasun-bajak parekatzea (derrigortasuna bi aldeentzat).
• Derrigorrezko aitatasun-baimenak.
• Administrazio publikoak kontziliazio-politika aktiboak (murrizketak, gizarte-segurantzan kotizatuta eta abar) dituzten enpresei pizgarriak ematea.
• Aldaketa kulturala lantzea; nola? Hezkuntzaren bidez (ikastetxeak, ikastolak…). Beharrezkoa da aldaketa kultural bat. Kontziliazio-neurriak hartzeko aukera bera izanda, sektore maskulinizatuetan ez dira hartzen; feminizatuetan, aldiz, bai. Hezkuntza lantzea.

2. TALDEA

• Sentsibilizazio-kanpainak, estereotipoak hautsiz.
• Aitatasun-baimenak hartzeko derrigortasuna.
• Enpresetan lan-ordutegiak begiratzea, fisikoki bertan egon beharra aztertzea eta beste aukera batzuk aztertzea: lanaldi jarraitua ahal den sektoreetan (zerbitzuetan zaila), etxetik lan egitea…
• Sektore maskulinizatuetan (prestakuntzakoak eta lanekoak) emakumeak egon daitezen sustatzea. Prestakuntza teknikoa sustatzeko kanpainak.
• Lanbideren eta enpresen lankidetza-hitzarmenak kontratazioan dauden beharretan oinarrituta.

3. TALDEA

• Batez ere hezkuntza-esparruari begirako neurriak, epe ertain-luzean.
• Sentsibilizazio-kanpainak egitea. Emakumeen balioa nabarmentzea, sektore oso maskulinizatuetan lanean jarriz, edo alderantziz, gizonak sektore feminizatuetan lanean jarriz, egungo hezkuntza-eredua aldatzeko.
• Kontziliazio-neurriak abian jartzen dituzten enpresei fiskalki laguntzea.
• Haurrak eta adinekoak zaintzeko lanei prestigioa ematea. Garrantzia har dezala Aldundiaren mezuetan (irudiak, kanpainak…).
• Lehiaketa publikoetan eta ematen diren laguntzetan, berdintasun- edo kontziliazio-neurriak ezarrita dituzten enpresei eman behar zaie lehentasuna.
• Telekonferentzia bidezko bilerak sustatzea. Aurrez aurreko bilerek lekualdaketak, denbora galdua, gastuak… dakartzate berekin.
• Lanaldi trinkoak sustatzea enpresetan.
• Enpresei berdintasun-/kontziliazio-adierazleak (ISO modukoak) proposatzea, enpresei edo instituzioei berdintasun-sariak ematean.

4. TALDEA

• Legez berdintasun-plan bat izan behar duten enpresen langile-kopurua jaistea (egun 250 edo gehiago).
• Hezkuntzari garrantzia ematea eta lanbideetan dagoen segregazioa agerian jartzea.
• Aholkularitza-zerbitzu bat jartzea, hartara enpresak eta langileak joan daitezen, eta gaiari buruzko zalantzak argitu ditzan eta horren inguruan aholkua eman dezan.
• Esperientziak partekatzeko, jardunbide egokien berri izateko espazio-/foro-mota hau.
• Laguntza edo pizgarri ekonomikoak abian jartzea. Gastu ekonomikoentzako diru-laguntzak ematea.

Sortutako zalantzak edo antzemandako planaren ahuleziak (idatziz jasotako iruzkinak):

• · Nire ustez, kontziliazioa haurrak edo adinekoak zaintzea baino haratago doa; kontziliatzeko espektroa askoz ere zabalagoa da, eta kontuan hartu beharko litzateke.

· Ekimen honek publizitate gehiago izan beharko luke.

Emakumea kirol-eremuan sartzea, jarduera profesionala eta erretiratzerakoan gauzatu dezakeena izan ziren martxoak 31 eta apirilak 1 bitartean Valentzian egin zen Emakumea eta Kirolari buruzko I. Biltzar nazionalean aztertu ziren gaietako batzuk.

LÍDERAS I 2017KO OTSAILAK 28

Valentziako Probintziako Diputazioak Cristina Mendia gonbidatu zuen Mutualiaren ordezkari gisa Kirola eta Emakumeari buruzko Biltzar Nazionalera. Biltzarra martxoaren 31tik apirilaren 1era bitartean egin zen, Valentziako Unibertsitate Politeknikoko (UPV) Kirol Kudeaketako Masterrak, Nosotras Deportistas elkarteak eta Mutualiara elkartutako Emtesport  enpresa kudeatzaileak elkarlanean antolatuta.

Estatuko biltzar honen helburuen artean honako hauek aipa ditzakegu:

• kirolean emakumeen presentzia sustatzea
• kirolaren maila guztietan emakumeen presentzia eta partaidetza sustatzea, baita erantzukizun-postuetan eta erabakiak hartzeko postuetan ere.
• kirola genero-ikuspegitik lantzeko beharra ulertuko duten politika publikoen garapena zehaztea;
• kirolean benetako berdintasuna lortzeko neurri eta politika berriak proposatzea,

.

Bi egunotan zehar, hogei hizlarik kirolaren egoera aztertu zuten, hainbat ikuspegi kontuan hartuta.

Hitzaldi nagusia Ainhoa Azurmendik azaldu zuen, Avento-ko kirol-aholkulari eta Euskal Herriko Unibertsitateko irakasleak martxoaren 31n, goizean.

Ondoren, Erakundeen Mahaia egon zen Mª Ángeles Medrano, Valentziako Diputazioko Kiroleko zuzendariak moderatuta. Bertan, honako hauek parte hartu zuten: batetik, Ana Gaspar, Tenerife Uharteko Kabildoko Kirol Zerbitzuko zuzendaria, eta bestetik, Dorleta Ugalde, Eusko Jaurlaritzako Kultura eta Hizkuntza Politika Saileko Gazteria eta Kirol Zuzendaritzako teknikaria.

Arratsaldean, kirol-erakundeen egoera aztertu genuen honako hauen eskutik: Mar Mas, Emakume Kirolari Profesionalen Elkarteko presidentea; Livia Lopez Gasteizko Araski Klubeko presidentea; eta Manolo Almécija Levante UD Nesken Futbol Taldeko koordinatzaile nagusia.

Ostiraleko programarekin amaitzeko, beste Mahai bat egin zen Sylvia Costa Televalenciako Informativos 7 programako zuzendariak moderatuta. Bertan, emakumeen kirolak komunikabideetan izaten duen tratamenduari buruz aritu ziren honako hizlari hauek: Cristina Gallo, RTPAko Ganamos con Ellas programako zuzendaria; Paloma Zancajo, Lideras aldizkariko zuzendaria eta editorea eta eskubaloiko nazioarteko jokalari ohia; eta Natalia Arriaga, EFE Agentziako kirol-kazetaria.

Larunbatean, hezkuntzaren txanda izan zen, errealitate honen ezinbesteko beste oinarria. Oraingoan hauek aritu ziren gogoeta egiten: Diana Gil González, Alacanteko Unibertsitateko Gizarte Erantzukizuneko Idazkaritzako zuzendaria eta Berdintasun eta Kiroleko arduraduna; María Martín Madrileko Unibertsitate Politeknikoko Jarduera Fisikoaren eta Kirolaren Zientzia Fakultateko (GHIN) irakasle titularra; Cristina Lopez, A Coruñako Unibertsitateko irakaslea eta ikertzailea; eta Alicia Yeste, Valentziako Unibertsitate Politeknikoko Kirol Zerbitzuko Saileko burua.

Emakumea eta Kirolari buruzko Biltzarra amaitzeko, kirolarien mahaia antolatu zen, beraiek izan baitira bi egun horietako protagonistak. Mahaia Maravillas Aparicio Nosotras Deportistas elkarteko presidente eta 10KFem lasterketaren zuzendariak moderatu zuen eta gure kiroleko hiru emakume garrantzitsuren esperientzia pertsonala eta kirol-esperientzia ezagutu ahal izan genuen: Ana Carrascosa judoka olinpikoa; Europako txapelduna eta Munduko Txapelketan brontzezko domina bi aldiz irabazitakoa; Jennifer Pareja, txapeldunorde olinpikoa Londres 2012n eta Waterpoloko Espainiako selekzioko kapitain ohia; eta azkenik Anna Montañana, brontzezko domina 2010eko Munduko Txapelketan, Europako txapeldunordea, WNBAko jokalaria eta Kluben Euroligako txapelduna.

Isabel García

Valentziako Gazteria, Kirol eta Berdintasuneko diputatua

Oraingo honetan, MUTUALIA zen enpresa anfitrioia eta jardunaldia Donostiako Pakea Klinikan antolatu zuen.

Cristina MENDIAk eman zion hasiera jardunaldiari eta ondoren Laura Sánchez Másfamilia Fundazioko koordinatzaileak Efr BERRIAK aurkeztu zituen.

Oraingo honetan, foroaren gaia BALIO KATEA izan zen eta Roberto Martínez Másfamilia Fundazioko zuzendariak, honako hitzaldi hau eskaini zuen:

Balio-katea efr ereduan

Kafea hartzeko egin genuen etenaldian, Euskadiko efr enpresetako pertsonek elkar agurtzeko aprobetxatu genuen eta batez ere, oraindik ziurtagiririk eduki ez arren euren interesa erakutsi duten enpresa gonbidatuei (IMQ, TECNALIA, SAYMA …) lagundu eta beraiekin iritzia trukatzeko; ondoren jardunaldiaren bigarren zatia hasi zen.

Efr kasua: Mutualia Une honetan, Cristina Mendiak, Mutualiako Berdintasun, Aniztasun eta Kontziliazio zuzendariak, praktika hau aurkeztu zuen:

Balio-katea MUTUALIAN

Ondoren efr dinamika antolatu zuten, enpresetako esperientziak trukatzeko.

Efr enpresen partaidetza amaitu zenean, hurrengo fororako gaia aukeratu zuten eta Euskadiko beste  efr .enpresa batek anfitrioi bezala aritzeko eskaini zuen bere burua.

Oraingo honetan, NafarroakoCaparrosoko ROCKWOOL enpresa, Euskadiko efr forora etortzea erabaki zuen efr ziurtagiridun enpresa bakarrak bere egoitza eskaini zuen hurrengo foroaNafarroan egiteko. Eskaintza eginda dago beraz, eta aurrerago zehaztuko da, logistika aztertu ostean.

Bazkaltzera joan baino lehen, Eduardo Cobo Mutualiako Berdintasunerako Batzordeko kidearekin Klinikako instalazioetatik paseo laburra egin dugu, eta itxura ona hartu genion bisita egin genuen pertsonok. Venan Garaizabal gure lankideak gogo handiz erakutsi zigun bere «harribitxia» eta oso pozik geratu ziren gurekin zeuden pertsonak.

Zalantzarik gabe oso arratsalde produktibo eta atsegina izan zen. Eguraldia ere lagun izan genuen, eta goiko bista ederrekin hunkituta geratu ziren gure gonbidatuak.

Zortea dugu horrelako instalazioak ditugulako baina batez ere instalazioetan lanean ari diren pertsonak, adeitasun osoz eta beren irribarre onenarekin hartzen gaituzten pertsonak ditugulako.

Eskerrik asko zuen harreragatik, nire izenean eta Euskadiko efr Foroan parte hartu zuten pertsonen izenean, babesa eta harrera beroa izan baitzuten.