-(e)an bidalia

Mutualiak Languages Lanean kongresuan parte hartzen du

languages lanean

Datorren urtarrilaren 18an, Euskalduna Jauregian, eta 19an, Guggenheim Museoan, “Languages Lanean” Kongresuaren lehenengo edizioa egingo da, eta bertan Mutualiak parte hartuko du.

Lehen edizio honetan, erakunde publiko-pribatuetako arduradunak izango dira protagonista. Tokiko zein nazioarteko entitateetako ordezkariak elkartuko dira Bizkaiko hiriburuan, baita kulturaren alorreko adituak ere. Eremu publikoari eta pribatuari eragiten dieten aztergaiak eta sektoreen araberako mahai-inguruak ere programatuko dira bi egun horietan.

Kongresuaren helburua da jarduera ekonomikoaren baitan, hizkuntza kudeaketaren erronken inguruan esperientziak eta ezagutza partekatzeko eta eztabaidatzea. Kongresuan pertsona orok hainbat ezagutza interesgarria topatuko ditu, besteak beste, nola eman bere lekua hizkuntza bakoitzari, nola zehaztu elkarren arteko bizikidetza egokia, nola neurtu hizkuntzan duten balio ekonomikoa edota neurtezinak diren balio erantsiak.

Lehen eguneko egitaraua bi zatitan banatuko da: goizean, Eusko Jaurlaritzako eta Europar Batasuneko ordezkariak egongo dira, baita bertako zein nazioarteko enpresetako arduradunak ere. Federal Union of Nationalities-eko Johann Hägmannen eskutik, bertaratutakoek aukera izango dute Hizkuntzen kudeaketa Europar Batasuneko testuinguruan ezagutzeko. Halaber, Islandiako esperientzia jasoko dute Jóhanna Vigdís-en eskutik (Icelandik Centre for Language Technology-ko CEO ohia). Ondoren, Guro Refsumek hizkuntza kudeaketa korporatiboari buruz hitz egingo du, Eskandinaviako negozioetatik sortutako ikuspuntutik. Horrez gain, Google, GKN, KONE eta Mondragon Korporazioa erakundeetako ordezkariek euren esperientziak kontatuko dituzte. Arratsaldean, sektore ezberdinetako ordezkariak eta orotariko mintzagaiak egongo dira: hizkuntza kudeaketak zerbitzuen kalitatean duen garrantzia, enpresa publikoak traktore gisa egiten duten lana, hizkuntza teknologiak, enpresen nazioartekotzeak dakartzan aukerak eta erronkak, aurrera egiteko baliabide eta tresnak…

Mahai inguru horietako batean, “Pertsonak. Lidergoa. Talentua. Migrazioa. Hizkuntza gaitasuna” landuko duenean hain zuzen, Mutualiako Zuzendari Kudeatzaileak, Natxo Lekunberrik, parte hartuko du hizlari gisa. Hurrengo egunean, urtarrilaren 19an, kultura arloko eragileen txanda izango da

Kongresua doakoa da, baina bertaratzeko beharrezkoa da izena ematea webgunearen bidez:

languageslanean.euskadi.eus
albistea-irudia-EUS
-(e)an bidalia

2024ko martxoaren 20tik aurrerako LEKUKOTZA-PROZEDURA BERRIA LAN-ARLOKO JURISDIKZIOA ARAUTZEN DUEN LEGEAN

justicia

Justizia, funtzio publiko, toki-araubide eta mezenasgoko zerbitzu publikoaren arloan Suspertze, Eraldaketa eta Erresilientzia Plana betearazteko premiazko neurriak onesten dituen abenduaren 19ko 6/2023 Errege Lege Dekretuak, prozesuekin loturiko beste zenbait berrikuntzaren artean, neurri jakin batzuk jasotzen ditu lau jurisdikzio-ordenetako prozesu judizialak arintzera eta prozesu horien eraginkortasuna hobetzera bideraturik, kasu guztietan ere bermerik handienekin. Neurri-sorta horri esker, epaitegiek eta auzitegiek arrazoizko denboran erantzun ahalko diote herritarrek eskaturiko babes judizialari. Errege Lege Dekretuak lege hauek aldatzen ditu: urtarrilaren 7ko 1/2000 Legea, Prozedura Zibilari buruzkoa; urriaren 10eko 36/2011 Legea, Lan Arloko Jurisdikzioa arautzen duena; uztailaren 13ko 29/1998 Legea, Administrazioarekiko Auzien Jurisdikzioa arautzen duena; eta, neurri txikiagoan, Prozedura Kriminalaren Legea. Aldaketa horien xedea da bizkortze- eta efizientzia-neurriak ezartzea auziak izapidetzerakoan, auzitegien ebazpen-denbora ahal den neurrian murrizteko, alferrikako izapideak saihesteko, eta segurtasun juridikorik eza sortzen duten akats teknikoak argitzeko. Ez dira galduko justiziara jotzen dutenen bermeak, eta ez zaie bermeoi uko egin beharko, ezta oinarrizko berehalakotasun- eta ahozkotasun-printzipioei ere.

Hori horrela, nabarmendu behar da administrazioarekiko auzien eremuan lehendik martxan dagoen lekukotza-auziaren eta efektuen hedapenaren teknika ezartzen dela arlo zibilean eta lan-arloan. Horren xedea da gure sistemak tresna egokiak izatea, sektore jakin batzuetan oso pisu handia duen masako auzibideak bizkorrago ebatzi ahal izateko.

Esparru zibilean eta administrazioarekiko auzien esparruan bezalaxe, lan-arloko jurisdikzioa arautzen duen legean ere egituratzen da lekukotza-prozedura, hain zuzen ere, lege haren 86 bis artikuluan (prozesu arruntari buruzko II. liburuko I. tituluko II. kapituluaren barruan).

Era berean, bi artikulu berri gaineratzen dira, 247 bis eta 247 ter, epaiak betearazteari buruzko IV. liburuko I. tituluko I. kapituluko bigarren atalaren barruan.

Arautze horrekin, bi prozesu-izapide sartu nahi dira: bata, lekukotza-prozedura —hau da, abian den prozedura judizial bat edo batzuk etenda geratzea erabaki judizial baten bidez, harik eta lehentasunezko prozeduran emandako epaia irmoa atera arte—; eta, bigarrena, epai irmoa izan ondoren, alderdiei aukeran uztea nola jokatu nahi duten —auziari berriro ekitea, bertan behera uztea, edo ondorioak azkar zabaltzeko bideren batera jotzea—. Bestalde, ondorioak hedatzeak esan nahi du ebazpen judizial irmo baten ondorioak zabaldu ahal izango direla prozedura judizial bat abiarazi ez duten beste pertsona batzuengana ere, baldin eta haien banakako egoera juridikoak epai irmo bidez aitortutako egoeraren identitate substantziala badu.

Era berean, gai hori jurisdikzio zibilerako ezarritakora egokitzeko, aldatu egiten da 191.3 b) artikulua, erregutze-errekurtsoaz baliatu ahal izan dadin auzialdian eman diren eta ondorioak hedatzeko aukera duten epaien kasuan.

Susana Castaños del Molino

Mutualiaren Aholkularitza Juridikoko abokatua

-(e)an bidalia

Mutualiaren PREBENTZIOZKO BEGIRADEI BURUZKO LEHIAKETAREN XXI. edizioan parte hartzeko epea irekita dago. 2024. urtea

miradas de prevencion mutualia 2024

Aurten, zenbait BERRIKUNTZA ditugu!!!  

Lehiaketari izena aldatzeaz gain, beste modalitate bat sortu dugu: bideo labur onenaren saria. Sariaren helburua da, lan-istripuen eta gaixotasun profesionalen prebentzioari buruzko mezuak zabaltzea eta enpresa osasungarriaren eredua sustatzea, animazioen, grabazioen eta abarren bidez.  

Modalitateak: 

  • Argazki onenaren saria, 1.200 € 
  • Adimen artifizialaren bidez sortutako irudi onenaren saria, 600 € 
  • Bideo labur onenaren saria, 1.200 

Material guztiek laneko arriskuen prebentzioa landu behar dute, estatuko errealitatean bakarrik jarriz arreta eta prebentzioaren balioak nabarmenduz, dela arrisku-egoerak dela jardunbide egokiak aipatuz,  azken horien balioespen positiboa egingo delarik. 

Epea 2024ko martxoaren 31n bukatuko da. Lehiaketaren epaia 2024ko apirilean jakinaraziko da, Laneko Segurtasun eta Osasunaren Munduko Egunaren harira Mutualiak egingo duen ekitaldian. 

Parte-hartzea doakoa da, eta lehiaketan parte hartzeak berekin dakar oinarriak erabat onartzea.

ANIMATU PARTE HARTZERA! 

-(e)an bidalia

Bularra emateko baimena eta langabeziagatiko subsidioa aldatzea (7/2023 Errege Lege Dekretua, abenduaren 19koa) 

Modificación permiso por lactancia y del subsidio por desempleo

Bularra emateko baimena aldatzea 

Aldatu egiten da bularra emateko baimena, eta hobetu egiten dira eskubide hori baliatzeko baldintzak. Horrekin batera, indartu eta osatu egiten da duela gutxi onartutako guraso-baimena. 

Jardunaldi-murrizketa, gaur egun, langileen eskubide indibiduala da, eta ezin zaio eskualdatu eskubide hori beste gurasoari, adoptatzaileari, zaintzaileari edo harreragileari. Hala ere, enpresa bereko bi langilek baliatzen badute eskubide hori subjektu eragile berarengatik, mugatu ahal izango da eskubide hori aldi berean baliatzeko aukera, enpresaren funtzionamendu-arrazoi funtsatu eta objektiboak adierazita —betiere idatziz behar bezala arrazoitzen badira arrazoi horiek—. Kasu horretan, enpresak plan alternatibo bat eskaini beharko du, bi langileek eskubidea baliatu ahal izateko eta, hartara, kontziliazio-eskubideak egikaritzeko. 
Bi guraso, adoptatzaile, zaintzaile edo harreragileek iraupen berarekin eta araubide berean baliatzen badute eskubide hori, edoskitzaileak hamabi hilabete bete arte baliatu ahal izango dute. 

Nola arautzen da eskubide hori gaur egun eta hemendik 2024ra bitarte? 

Gaur egun, haur bat jaio, adoptatu, adoptatzeko helburuz zaindu edo etxean hartzen bada, bazkide langileek eskubidea izango dute ordubetez lantokitik kanpo egoteko (bi zatitan banatu ahal izango dute) bularreko haurrak bederatzi hilabete betetzen dituen artean. Baimenaren iraupena proportzionalki areagotuko da haur bat baino gehiago jaio, adoptatu, adoptatzeko helburuz zaindu edo etxean hartzen badira. Eskubide hori baliatzen duenak bere borondatez murriztu ahal izango du jardunaldia ordu-erdiz helburu berarekin, edo jardunaldi osoetan metatu, bestela.  

Berriki egin duten aldaketara arte, negoziazio kolektiboaren aurreikuspenek edo enpresarekin lortutako akordioak bermatu behar zuten lanera ez joateko eskubidea. 2024tik aurrera, langile guztien eskubidea izango dira oporrak hartzeko aukera guztiak, ordaindutako absentzia-orduak metatzea barne. 

Langabeziagatiko subsidioa aldatzea 

 

  • Bi bakarrik izango dira sarbide orokorreko kasuak, eta bateratu egiten dira Nekazaritzako Errenta eta Nekazaritzako Sistema Bereziko behin-behineko langileen subsidioa eskuratzeko baldintzak. 
  • Langabezia-prestazioa agortu ondoko subsidioa familia-erantzukizunik ez duten 45 urtetik beherakoei zabaltzen zaie, eta, familia-erantzukizunak dituzten kasuetan, bateratu egiten da subsidio horren iraupena, edozein adin izanik ere prestazioa agortutako unean. 
  • Posible izango da subsidioa eta besteren konturako lana bateragarri egitea, 180 egunez lanaldi osoko edo partzialeko enplegu berri bakoitzeko, zenbatekoa murriztu gabe. Eta langabeziagatiko prestazioak (kotizaziopekoak eta subsidioa) bateragarriak izango dira lanbide-heziketako ekintzetara joateagatik edo lanean lortzen diren beka eta laguntzekin. 
  • Prestazioa enplegua aktibatzeko ibilbide pertsonalizatu bati lotuta egongo da. Horretarako, jarduera-akordio bat sinatuko da, Enpleguari buruzko otsailaren 28ko 3/2023 Legearen esparruan, eta eskubideak eta betebeharrak ezartzen dituen zerbitzu-multzo bat aurreikusiko da enplegu-zerbitzu publikoetako eskatzailearentzat, jasotzailearen enplegagarritasuna areagotzeko. 

Zein izango dira langabezia-subsidioaren zenbateko berriak 2024tik aurrera? 

  • Lehenengo sei hilabeteetan: 570 euro (hainbat ondoriotarako errenta-adierazle publikoaren % 95). 
  • Hurrengo sei hilabeteetan: 540 euro (hainbat ondoriotarako errenta-adierazle publikoaren % 90).  
  • Gainerako prestazio-aldian, 21 hilabetera arte: Gaur egungo 480 euroak (hainbat ondoriotarako errenta-adierazle publikoaren % 80).