Thais Alonso aholkularia eta aditua da Adimen Emozionalean, Neurozientzian, Mindfullnesen eta Aldaketa, Duelo eta Erresilientzia prozesuetan, baita Erakunde Zoriontasuneko eta Ongizate Korporatiboko CHO (Chief Happiness Officer) ere.
FelizMENTE© Metodoaren sortzailea da. Braintrainer profesionala. European Institute of Happy work -Fullorange-ren sortzailea.
20 urte baino gehiagoko esperientzia du «erabateko arretaren» praktikan, aitzindaria izan zen Espainian enpresa-, hezkuntza- eta ospitale-erakundeetan Mindfulnesseko prestakuntza-programak ezartzen eta garatzen.
Azken 12 urteotan, milaka profesional, ekintzaile eta zuzendari prestatu ditu nazioko eta nazioarteko eremuetan, giza eta gizarte-paradigma berri baten alde eginez.
– Thais, zorion korporatiboa aipatzen duzu. Zertan datza, zehazki?
Zorion korporatiboa aipatzen dudanean, langileen ongizate emozional eta mentala sustatzen duen lan-ingurunea sortzeaz ari naiz. Horrek esan nahi du beharrezkoa dela harreman osasungarriak lantzea, lanaren xedea eta esanahia sustatzea eta langile bakoitzaren hazkunde pertsonal eta profesionalean laguntzea.
– Zer egin beharko lukete hori lortu nahi duten enpresek?
Ikerketek frogatu dute laneko zoriontasuna estu lotuta dagoela langileen konpromisoarekin, haien produktibitatearekin eta talentua atxikitzearekin. Zorion korporatiboa lortzeko, enpresek langileen ongizatea lehenetsi behar dute, elkartasunaren eta aitortzaren kultura sustatu behar dute eta maila pertsonal zein profesionalean garatzeko aukerak eskaini behar dituzte.
Garrantzitsua da kontuan hartzea gaur egun belaunaldi-aniztasun handia dagoela enpresetan eta horrek eragin zuzena izango duela aurrerantzeko lidergo-motan. Lidergo horrek beharrezkoak ditu begirada berriak, trebetasun berriak, zorionarekin lotutako erantzun berriak eta enpresa-kultura berri bat.
– Zein izaten da enpresa batean zoriontasunik ezaren arrazoia? Nola konpon daiteke?
Infoxikazioa, etengabeko aldaketak eta blended working delakoaren modu berrien ondorioz, profesionalek askotxo ikasi behar dute adimen emozionalaz eta kontrol mentalaz. Eta, neurri handi batean, horiexek izango dira enpresen eraldaketaren eta hazkundearen eragileak.
Hala ere, hainbat arrazoi egon daitezke erakunde batean zoriontasunik ez izateko: lan-giro toxikoa, komunikazio eraginkorrik eza, aitortzarik eza. Hori konpontzeko, garrantzitsua da gardentasunaren eta errespetuaren kultura sustatzea, langileen osasun fisiko eta emozionala zaintzeko ongizate-programak sustatuz.
Hitzaldian, zabalago arituko natzaizue gaur egun enpresetan oxitozinak duen garrantziaz.
– Gaur egun oso ohikoa da lantaldeetan lan egitea. Zer tresna behar ditu lider batek lantaldeak zuzen kudeatzeko?
Lider batek tresna-sorta zabala izan behar du estresaren eta oreka emozionalaren kudeaketa hobetzeko, norberarekiko eta besteekiko gatazkak konpontzen ikasteko, kontzentrazioa hobetzeko, automatismoak desprogramatzeko eta errendimendu handiko egoeretan aldaketak modurik onenean kudeatzea eta erabakiak hartzea eragozten duten ideia mugatzaileak aztertzeko.
Gainera, Neuromanagement delakoa dago; nire ustez, horixe da lidergoaren etorkizuneko tresna. Lidergo mota bat da Neuromanagement-a. Haren bidez burua entrenatzen ikasten da, estresarekin eta antsietatearekin lotutako burmuinaren zenbait eremu murrizteko eta, aldi berean, ongizatearekin, lasaitasunarekin eta poztasunarekin lotutako beste batzuk suspertzeko.
Horri esker, hobetu egiten da lantaldeen osasuna eta proiektuen kudeaketa arrakastatsua, eta oinarri-oinarritik elikatzen da zorion korporatiboaren kontzeptua.
– Asko hitz egiten da erresilientzia lantzeko beharraz. Lan-eremuan ere landu daiteke? Nola?
Zalantzarik gabe, lan-eremuan ere landu daiteke erresilientzia. Ezbeharrei aurre egiteko eta horietatik indartuta ateratzeko gizakiok dugun berezko gaitasuna da erresilientzia. Batzuetan, erresilientzia landuz, bikaintasun profesional eta pertsonal handia ere lortu daiteke.
Neurozientziaren arabera, pertsona erresilienteak dira estresari ondoen aurre egiten diotenak, presioa hobeto jasaten dutenak eta muturreko egoeretan hobeto jarduten dutenak. Hortaz, neurolidergoak burua entrenatzen lagunduko digu profil erabat erresilientea garatzeko; alegia, erronkei aurre egiteko trebetasunik onena, norberarena, erdiesteko.
– Zure aurkezpenean, burua arrakastarako entrenatzeaz diharduzu. Zer esan nahi duzu?
Esan nahi dut nork bere eredu mentalak ezagutu behar dituela, beraren baitako talentuak eta baliabideak garatu ahal izateko. Horrela, lidergo eraginkorra sustatzen da, eta helburua da barne-oztopoak gainditzea eta horiek arrakasta bihurtzea.
Horrek esan nahi du hainbat trebetasun garatu behar direla, hala nola buru-argitasuna, erresilientzia, denboraren eta estresaren kudeaketa eraginkorra eta baita gure helburuen ikuspuntuari eusteko gaitasuna ere, sor daitezkeen erronkak gorabehera.
Era berean, esan nahi dut nork bere barneko talentuak eta baliabideak bultzatu behar dituela, bere kabuz, jarrera-aldaketa positiboak eragiteko; horrek mesede egingo dio ingurune osoari, eta zorion korporatiboaren benetako kontzeptua sortuko da.
– FelizMENTE© metodoa garatu duzu. Azalduko diguzu zertan datzan? Zure ustez, zein da haren balio nagusia?
FelizMENTE© izeneko nire metodoan, Ekialdeko eta Mendebaldeko ikuspegiak txertatu ditut, neurozientzian oinarritutako tresnen bidez. Ikuspegi horiek erakusten dute zorionak lotura handia duela gure gogamenean sartzen uzten dugun edukiarekin.
Urteetan zehar, milaka pertsona trebatu ditut gogamen osasuntsuagoa, lasaiagoa eta zoriontsuagoa garatzeko, eta metodo hau eskarmentu horren emaitza da. Gogamen erne bat lasaiago bizi da, dramatismo gutxiagorekin, eta hobeto kontrolatzen ditu buruko korapiloak, estresa eta antsietatea eragiten dutenak, baita sufrimendu asko ere.
Nire metodoaren balio nagusia da zoriona eta ongizatea lantzeko ikuspegi holistikoa eta oso praktikoa eskaintzen duela. Horretarako, hainbat alderditan jartzen du arreta, hala nola emozioen kudeaketan, kontzentrazioan, erresilientzian eta, batez ere, lidergoaren garapen pertsonalean.
