-(e)an bidalia

ABENDUAN GIDATZEA

conducir en invierno

Aurten ere badator abendua, baita horrek berekin dakarren guztia ere: afariak, bazkariak, enpresako edo lagun arteko elkarretaratzeak… betiko kontuak. Ez dugu ahaztu behar abendukoak urteko egunik motzenak eta gaurik luzeenak direla; beraz, inoiz baino arriskutsuagoa da gidatzea urte-sasoi honetan.

Gauez ordu gehiago gidatzeak eta jai-giroak koktel oso arriskutsua osa dezakete, eta, zoritxarrez, datuek tesi hori berresten dute.

Espainian, 2013 eta 2023 artean, 276.000 istripu baino gehiago izan ziren gauez, eta 6.500 lagun baino gehiago hil ziren haietan. Nabarmena da gaueko istripuen hilgarritasun handia, egunekoek baino % 55 hildako gehiago eragin baitituzte. Gainera, azpimarratu behar da gaueko istripuen kopurua % 24 hazi dela azken 10 urteetan. Nola liteke? DGTren ikerketa xehatu baten arabera, pandemiaren osteko “errebote-efektu” delakoarengatik da. Berriro kalera irteteak eragindako euforiak alkoholaren eta drogaren kontsumoa handiagotzea ekarri zuen, baita gehiegizko abiaduragatiko isun gehiago ere.

Datu horiek guztiek errealitate kezkagarri bat islatzen dute, eta errealitate hori areagotu egiten da abenduan eta antzeko garaietan. Zer egin dezakegu gutako bakoitzak? Zirkulazio-arauekiko sentsibilitate handiagoa garatu behar dugu, eta bide-segurtasunaren balioak gehiago errespetatu behar ditugu; horrez gain, errealitate fisiologiko ukaezin batez jabetu behar dugu: gure garunak ez du gogoko gauez gidatzea.

Gauez gidatzean, gure garuna baldintza konplexuagoetan lan egitera behartzen dugu, hala nola argi falta, nekea eta abar, eta geure burua istripu-eragile diren egoeretan jartzen dugu.

Hauek dira adibiderik ohikoenak.

Errepideko hipnosia. Ez dago ezer monotonoagorik gauez gidatzea baino; izan ere, estimulu bisualen gabeziak berdindu egiten ditu kristalaren bestaldeko inguruak. Garuna moteldu egiten da, eta, horren ondorioz, gidari askok “deskonektatu” egiten dute, eta denbora batez inkontzienteki egiten dute aurrera. Arazoa hau da: ezusteko estimulu bat agertzen denean, pilotu automatiko horretatik gidatze aktibora igaro behar dugu, istripu bat gerta daitekeen egoera batera.

Nekea eta mikroloaldiak. Nekatuta gaudenean, erreakzio-denbora handitu egiten da, eta garunak okerreko erabakiak har ditzake. Gaitasun-galera hori pixkanaka gertatzen da. Eta baliteke ohartu ere ez egitea egoera arriskutsu bat parean egokitu arte.

Mikroloaldiek 6 bat segundo irauten dute, eta ez gara kontziente izaten. 120 km/h-ko abiaduran, 2 segundoko begi-kliska batean bi futbol-zelairen arteko distantzia egin dezakegu, batere kontrolik gabe.

Hitz batean, giza begia ez dago gauez ikusteko prestatua, eta gure ikusmen-eremuaren % 20 galtzen dugu. Ikusi dugunez, gure garunak ez du oso gustuko gauez gidatzea.

Beraz, aukera bakarra dugu: zentzuz jokatzea eta egoera horiek saihestea.

Gogoan izan abenduan gaudela; jai-giroa da nagusi, baita gaueko joan-etorriak ere. Koktela leherkorra izan ez dadin, bi kontzeptu oso garrantzitsu: erantzukizuna eta zentzua.

-(e)an bidalia

DIZIPLINAZKO KALERATZEARI ETA LANGILEARI AURREZ ENTZUNALDIA EMATEARI BURUZKO BERRIKUNTZAK  

despido laboral

Auzitegi Gorenak, 4735/2023 errekurtsoari buruzko 2024ko azaroaren 18ko Epaian, osoko bilkuran eta aho batez, ebatzi du enplegatzaileak aukera eman behar diola langileari bere aurka egindako karguetatik defendatzeko, diziplinazko kaleratzeagatik kontratua azkentzea erabaki aurretik. 

Aztertzen ari garen kasua arte dramatikoko eskola bateko irakasle baten diziplinazko kaleratzea da, zeina kargutik kendu baitute ikasleek jarritako salaketa batzuen ondorioz. 

Erabaki hori 1986tik Espainian indarrean dagoen 1982ko Lanaren Nazioarteko Erakundearen (LANE) 258. Hitzarmenaren 7. artikulua zuzenean aplikatzeko beharrean oinarritzen da.  

Hala, Auzitegiak 80ko hamarkadan berak ezarritako doktrina aldatzen du, eta hori justifikatzen du gure ordenamenduan denbora horretan guztian izandako aldaketekin. 

Auzitegi Gorenak dio aipatutako araua zuzenean aplikatu behar dela, xedapen hori osotzat jo behar baita eta automatikoki aplikatu, Espainiak betearazpen-araurik eman beharrik gabe, haren baldintzak behar bezala zehaztuta baitaude. Aipatutako Hitzarmenaren 7. artikuluan ezartzen denez, langileari aukera eman behar zaio entzuna izateko, eta hori ezin da nahastu kontratua iraungi ondoren langileari dagozkion beste eskubide batzuekin, hala nola diziplinazko azkentze-neurria aurkaratzearekin, ezta prozesua saihesteko xedez haren aurretik —edo are prozesuaren barruan— egiten den bitartekaritzarekin edo adiskidetzearekin ere. Izan ere, aldez aurreko entzunaldia eginez ekitate-irizpide bat kontuan hartzen da, eta langileari aukera ematen zaio zehapena jasotzea merezi duten egitateei buruz egoki dena alegatzeko, eta hori egiteko diziplina ezartzeko ahalmena duenaren aurrean eta hark neurria hartu aurretik, horrekin lortzen baita langileak entzuna izateko edo defentsarako duen funtsezko eskubidea betetzea.  

Auzitegi Gorenaren ustez, gure barne-ordenamenduan txertatutako arau batek eska dezakeen betekizun baten aurrean gaude, eta aplikatu egin behar da. Horrek ez du esan nahi barne-araurik indargabetzen ari garenik, baizik eta aplikatu beharreko zuzenbidea hautatzen ari garela eta, beraz, Espainiako Konstituzioaren 117.3 artikuluak epaileei esleitzen dien jurisdikzio-funtzioa betetzen ari garela.  

LANEren hitzarmen horrek kaleratzearen aurretiko entzunaldi hori exijitzen du, enplegatzaileari modu arrazoizkoan eskatu ezin zaionean izan ezik, eta Laugarren Salaren ustez hori da aztertzen ari garen kasuan gertatzen dena, enpresak denboran zehar mantendutako jurisprudentzia-irizpide baten babesa baitzuen xedapen horrexeri dagokionez, eta horrek eskakizun horretatik aske uzten zuen. Kautela hori baliozkoa izango da epai hau argitaratu aurretik gertatutako diziplinazko kaleratzeetarako; beraz, diziplinazko kaleratze berrietarako baino ez da izango galdagarria, hau da, 2024ko azaroaren 18ko epaia argitaratu ondoren gertatzen direnetarako, epai honek eragin nabarmena izango baitu. 

Raquel Martínez Balbás 

Mutualiako Aholkularitza Juridikoko Legelaria  

-(e)an bidalia

“Baimen klimatikoen” Errege Dekretua  

riesgo climatico

Duela gutxi, 8/2024 Errege Lege Dekretua argitaratu da, zeinak klima-aldaketarekin eta hondamendiekin lotutako lan-arloko eta arriskuen prebentzioko arau-aldaketak jasotzen baititu. 

Errege Dekretuaren gakoak: 

  • Langileek gehienez lau eguneko baimen ordaindua izango dute, lanpostura iritsi ezin direnean. 
  • Epe hori luzatu behar bada, enpresek ezinbesteko ABEEa eskatu ahal izango dute. 
  • Laneko eta Gizarte Ekonomiako Ministerioak 12 hilabeteko epean errege-dekretu bat egingo du, klima-aldaketaren ondorioen aurrean langileek dituzten lan-arriskuen prebentzioa jorratzeko. 
  • Horrez gain, ezartzen du jarduteko protokolo bat sartu behar dela hitzarmenetan, hondamendiei eta fenomeno meteorologiko kaltegarrietan jardutearen inguruko arriskuak prebenitzeko neurri espezifikoak jasotzen dituena. 
  • Hemendik aurrera, langileen legezko ordezkariek beste eskubide bat izango dute; hain zuzen ere, hondamendien eta bestelako fenomeno meteorologikoen alertak aktibatzean aurreikusitako jarduteko neurriei buruz informazioa jasotzeko eskubidea izango dute, eta, hala badagokio, jarduera geldiarazi ahal izango dute. 
  • Langileek ezin izango dute, inondik inora ere, inolako kalterik jasan beren segurtasuna bermatzeko neurriak hartzeagatik. 

Zer dira ordaindutako baimen klimatikoak? 

Langileek gehienez ere lau eguneko baimen ordainduak izango dituzte, agintari eskudunek joan-etorriei buruz ezarritako gomendioen, mugen edo debekuen ondorioz lantokira sartu ezin direnean edo lantokira iristeko beharrezko zirkulazio-bideetatik igaro ezin direnean, bai eta berehalako arrisku larriko egoera bat gertatzen denean ere, hondamendi edo fenomeno meteorologiko baten ondoriozkoak barne. 

Zer gertatzen da egun gehiago behar badira? 

Lau egun horiek nahikoak ez badira eta luzatu egin behar badira, enpresek ezinbesteko ABEEa eska dezakete, eta, hala, erantzunkidetasun publikoarekin egingo liekete aurre ekoizpen-sarearen zailtasunei. 

Informazioa jasotzeko eskubidea 

Langileek eskubidea izango dute hondamendien alertak aktibatzean aurreikusten diren neurriei buruzko informazioa jasotzeko. 

Urrutiko lana 

Enpresak urrutiko lana ezarri ahalko du 10/2021 legearen esparruan, bere jarduerak horretarako aukera ematen badu. 

-(e)an bidalia

Mutualiak berritu du asistentzia-kalitatean sari gorena: QH 3 izar egiaztagiria

qh mutualia 2024

Azaroaren 12an, berriz ere jaso dugu Osasuna Garatu eta Integratzeko Institutuak (IDIS) ematen duen sari gorenaren berriztapena: Asistentzia-kalitateko Bikaintasunaren QH 3 Izar egiaztagiria.

QH Mutualia 2024

2015ean, Asistentzia-kalitateko Bikaintasunaren QH egiaztagiria jaso genuen; orduan, QH 1 Izar kategorian izan zen. 2016an, maila hobetzea lortu genuen (QH 2 Izar egiaztagiria), eta, 2018an, IDISek ematen duen sari gorena eskuratu genuen: QH 3 Izar egiaztagiria, mutualitateak asistentzia-kalitatean eta etengabeko hobekuntzan egindako ahaleginaren aitorpen gisa. Sari hori berritu egin zen 2020 eta 2022an, eta, orain, 2024an, berriz.

QH akreditazioa emateko ekitaldia azaroaren 12an izan zen, Madrilen, eta bertan izan ziren Mutualiako ordezkari, gure Madrilgo zentroko lankide Luis Canel eta Martinez doktorea.

Sari horiek ematen dituen erakundeak mutuak lortutako ziurtagiri eta sari guztiak hartzen ditu kontuan, Mutualiak gure bezeroen, aliatuen eta, oro har, gizartearen asistentzia-kalitatearekin eta etengabeko hobekuntzarekin duen konpromisoaren erakusgarri.

Mutualiak ondorengo kudeaketa-sistema hauek ditu zentro guztietarako ziurtatuta:

•    ISO 9001 Kalitatearen Kudeaketa
•    ISO 14001 Ingurugiro Kudeaketa
•    ISO 50001 Energia Kudeaketa
•    ISO 45001 Laneko Segurtasun eta Osasuna
•    ISO 27001 Informazioaren Segurtasuna.
•    Segurtasun Eskema Nazionalarekin bat datorren ziurtagiria.
•    UNE 19601 Compliance Penala
•    UNE 179003, Pazienteen Segurtasun Arriskuen Kudeaketa 
•    Eta hiru kliniketarako: UNE 179006, ospitaleetako osasun-arretarekin lotutako infekzioen zaintza, prebentzioa eta kontrola

Gainera, ziurtagiri ugari lortu ditugu berdintasunaren, aniztasunaren eta kontziliazioaren arloan, euskararenean, irisgarritasunarenean, humanizazioarenean eta gure kudeaketa-ereduaren aintzatespenenean. Hemen ikus dezakezue gure ziurtagirien eta aitorpenen zerrenda osoa.

-(e)an bidalia

Sentsibilizazio-kanpaina – #BesteEdozeinBezalakoEgunBat  

besteEdozeinBezalakoEgunBat

Lan-istripu bat edo gaixotasun profesional bat daukazunean, #EdozeinEgun izan zitekeenak beste edozein bezalako egun bat izateari uzten dio.  

Horrela hasten da Laneko Segurtasun eta Osasunerako Institutu Nazionalak (INSST) azaroaren 11tik 25era egingo duen kanpaina. Kanpaina horren bidez, gogorarazten da egunean bi pertsona hiltzen direla lan-istripuen ondorioz, 35 ospitaleratzen direla eta ia 30.000 lagunek gaixotasun profesional bat izaten dutela.  

Hain zuzen ere, helburua da laneko istripuak eta gaixotasun profesionalak saihesteko prebentzioak duen garrantziaz sentsibilizatzea enpresak eta langileak.  

Dosier bat erantsi dugu, partekatzeko.   

https://www.insst.es/documentacion/espacio-monotematico/un-dia-cualquiera

Hauek barne hartzen ditu dosierrak:  

  • Bideoak (bakoitzerako estekak)  
  • Infografiak  
  • Kartelak  
  • Bannerrak  
  • Publizitatea  
  • Eta sare sozialetarako egokitzapenak.  

Mutualiak bat egiten du kanpaina honekin, eta gogorarazten dizue gure kanpaina ez dela egun bakarrekoa, urteko egun guztietakoa baizik.   

https://www.mutualia.eus/es

Gure webgunean eskuliburuak, infografiak, kartelak, bideoak eta abar ditugu, zuen lanpostuetan egin nahi dituzuen kanpainetan laguntzeko. Kontuan izan, halaber, prebentzio-aholkulariak ere zuen esanetara daudela, aholku emateko.  

Kontsultatu hemen: prevencion@mutualia.es  

-(e)an bidalia

Kontsulta juridikoa 2024ko Azaroa

consulta

BALIOZKOA DA ERRETIRO AURRERATUARI UKO EGITEA?

kontsulta

Kontsulta honetan planteatzen da ea baliozkoa den onuradunak erretiro aurreratuagatiko pentsioari uko egitea, aitortutako pentsioak ez dituenean betetzen onuradunaren espektatibak.

Nahiko ohikoa da aldez aurretik Gizarte Segurantzan galdetzea zenbateko pentsioa dagokigun, baina erretiro aurreratuaren kasuan, batez ere, batzuetan ez da kontsultatzen, eta, beste batzuetan, kontsultan jasotako informazioa ez da zehatza edo nahikoa izaten.

Horrenbestez, hemen aztertuko dugu zer gertatzen den erretiro aurreratua eskatu eta prestazioaren erakunde kudeatzaileak aitortzen digunean, zenbatekoak ez gaituelako asebetetzen, erretiro arruntera iritsi arte lanean jarraitzea erabakitzen badugu.

Auzitegi Gorenak ebatzi du auzia zenbait erabaki jurisdikzionaletan, eta ondorio honetara iritsi da: “erretiroagatiko prestazio bat eraginik gabe utz daiteke onuradunak hala nahi badu. Prestazioa jakinarazi eta berehala aitortu behar da, aurrerago eskatu ahal izateko, hobea izan baitaiteke, kotizazio-aldia handiagoa izango baita”.

2024ko irailaren 25eko epaian eta beste batzuetan jasotako jurisprudentzia-doktrinan (1172/2024 errekurtsoari dagokio eta beste batzuk ere aipatzen dira) gaia aztertzen da; hau da, ea Gizarte Segurantzaren Lege Orokorraren 3. artikuluak babestutako eskubide utziezin bat den. Goi Auzitegiak ez du halakorik onartzen; izan ere, erretiroagatiko prestazioari uko egin dakiokeela da ildo orokorra (debekatuta egongo litzateke bere horretan gure ordenamendu juridikoan). Baina kasu honetan ez dago ukorik, ez baitago borondatezko aitorpenik, zeinaren arabera uneko edo etorkizuneko erretiroagatiko prestazio baten onuradunak bere ondare juridikotik eskubidez egokitu dakiokeen erretiro-prestazioa jasotzeko eskubidea kanporatzen baitu . Langilearen erabaki aldebakarrekoa da hau, erakunde kudeatzailearen ebazpena ikusita, zeinaren bidez hura ez erabiltzea erabaki baitu. Alde batera utzi du eskaera, eta eraginik gabe utz dadin eta erabaki horren ondorioez ez gozatzea eskatu du, lanean jarraitu eta bere interesak aintzat hartuta egokiagoa denean berriro eskatzeko erretiroagatiko prestazio bera beste gabezia- eta kotizazio-egoera batzuetan, prestazio handiagoa eragin baitiezaiokete.

Aukera hori ez da berariaz jasotzen arauetan eta ez da berariaz debekatzen. Izan ere, egoera honetan ez zaio inola ere uko egiten erretiroagatiko prestazioa jasotzeko eskubideari: aitortutako zenbatekoa jaso nahi ez dela adierazi da, aurrerago jasotzeko, pertsonaren interesetarako egokiagoa izan daitekeenean. Esan behar dugu Auzitegi Gorenak aztertutako kasuan onuradunak erakunde kudeatzaileei kontsultatu ziela eta adierazi zuela emandako informazioa ez zela zehatza eta nahikoa izan. Auzitegiak dio alegatzea ez dela beharrezkoa eta erabaki hori hartzeko ez dela beharrezkoa, halaber, aldez aurretik kontsultatzea; eta aurretiazko kontsulta horrek ere ez duela eragotziko prestazioaren onuradunak prestazioari uko egin eta lanean jarraitzea, ez duelako garrantzizkotzat jotzen onuraduna adierazitako moduan jokatzera bultzatu duten arrazoiak egiaztatzea, bere onerako egin baitzuen. Izan ere, kontuan hartu beharrekoa da erretiroa eskatzea ez dela beharrezkoa erretiro-adin arrunta dutenentzat; gainera, sistemak berak aukera ematen du (eta bultzatu egiten du, gainera) bizitza aktiboa luzatzeko eta, horrenbestez, erretiroa atzeratzeko.

Raquel Martínez Balbas 

Mutualiako Aholkularitza Juridikoko abokatua 

-(e)an bidalia

Mutualex epaia 2024ko Azaroa

sentencia

AUZITEGI GORENAREN EPAIA, 2024KO IRAILAREN 24KOA

mazoa

Auzitegi Gorenaren 2024ko irailaren 24ko epaia, doktrina bateratzeko 4005/2021 kasazio-errekurtsoari buruzkoa, zeinean Sebastián Moralo Gallego jaun txit gorena izan baitzen txostengilea. 

Epai honetan, argitu behar da auzi-jartzailea alta-egoeran edo altarekin parekatutako egoeran dagoen, gaixotasun arruntaren ondoriozko ezintasun iraunkor eta osoagatiko prestazioa aitortzearen ondorioetarako, hori baita auziaren gaia. 

Gizarte Segurantzaren Institutu Nazionalak (GSIN, aurrerantzean) langilearen eskaera ukatu zuen, jo baitzuen eskatzailearen lesioek ez zutela justifikatzen ezintasun iraunkorraren inolako mailarik eta langilea ez zegoela alta-egoeran edo altaren pareko egoeran eskubide-eragineko datan. 

Langileak (ile-apaintzailea da lanbidez) 2010eko maiatzaren 31n utzi zuen bere konturako azken lan-jarduera, eta enplegu-eskatzaile gisa inskribatu zen 2015eko martxoaren 18an; ezintasun iraunkorra eskatu zuen data bera da hori. Ezintasun-eskaera ukatu egin zitzaion, 2015eko maiatzaren 28an. 

Toledoko Lan Arloko 3 zk.-ko Epaitegiaren 2016ko maiatzaren 3ko epaian, langilearen eskaera ezetsi zen, jo baitzen sekuelek ez zutela ezintasun iraunkorrik eragiten, eta adierazi zen ez zela beharrezkoa aztertzea ea gertaeraren datan langilea alta-egoeran zen ala ez. 

Auzi-jartzaileak erregutze-errekurtso aurkeztuta, Gaztela-Mantxako Justizia Auzitegi Nagusiak 2018ko maiatzaren 2an emandako epaiak baietsi egin zuen errekurtso hori, eta eskatutako ezintasun iraunkor osoa aitortu; ez zuen ezer adierazi alta-egoeraren edo altaren pareko egoeraren eskakizunari buruz. 

Auzitegi Gorenak, 2021ko martxoaren 23ko epai batean, GSINek aurkeztutako kasazio-errekurtsoa baietsi zuen; hala, aurreko epaia baliogabetzat jo zuen, omisiozko inkongruentzia zela eta, erregutze-aretoak erabaki bat eman zezan alta-egoeraren edo altaren pareko egoeraren alderdiari buruz. 

Epai hori betez, Gaztela-Mantxako Justizia Auzitegi Nagusiak bere epaia eman zuen 2021eko irailaren 28an: langilea altaren pareko egoeran dagoela jo zuen, eta langileak azken lan-jarduera utzi zuenetik enplegu-eskatzaile gisa etenik gabe inskribatuta egotearen eskakizuna malgutzeko doktrina humanista bat aplikatu zuen ondorio horietarako; horri dagokio prozedura honetako errekurtsoa. 

GSINek jarri zuen erregutze-errekurtsoa; salatu zuen ez direla bete 1994ko Gizarte Segurantzaren Lege Orokorraren 138. eta 124. artikuluak eta gaur egun indarrean den Gizarte Segurantzaren Lege Orokorraren 164., 166. eta 195. artikuluak, iritzi ziolako arau horietatik ondorioztatzen dela ezinbestekoa dela alta-egoeran edo altaren pareko egoeran egotea gaixotasun arruntaren ondoriozko ezintasun iraunkor eta osoagatiko prestaziorako aukera izateko, eta eskakizun horren interpretazioan zentratuko da azterketa. 

Kontraste-epaia Valentziako Erkidegoko Auzitegi Nagusiko Lan Arloko Salaren 2019ko ekainaren 13ko epaia da, 1800/2018 errekurtsoari dagokiona. 

Aplikatutako eskubideari dagokionez, abiapuntua Gizarte Segurantzaren Lege Orokorraren (GSLO, aurrerantzean) 165.1 artikulua da, zeinean hau ezartzen baita: “Araubide Orokorreko prestazioetarako eskubidea sortzeko, haren aplikazio-eremuan sartzen diren pertsonek, prestazio bakoitza eskuratzeko eskatzen diren betekizun partikularrez gainera, araubide horretan afiliatuta eta alta emanda, edo altarekin parekatutako egoeran, egon behar dute babestutako gertakaria edo egoera gertatzen denean, legezko xedapen baten bidez kontrakoa adierazi ezean”. 

Altarekin parekatutako egoerak dira kasu batzuk zeinetan Gizarte Segurantzan baja emanda egon arren, prestazio jakin batzuk aitortzearen ondorioetarako, langileak aldez aurretik zuen alta-egoera mantendu behar baita; horietako kasu bat da erabateko langabezia subsidiatuaren legezko egoera eta nahi gabeko legezko langabezia-egoera, kontribuzio- eta zerga-prestazioa amaitu ondoren, betiere langabetu gisa inskribatuta egonez gero langabezia-bulegoan. Jo da egoera honetan lanerako borondateak jarraitzen duela eta ez dela lan-merkatutik kanpo geratu, enplegu-eskatzaile gisa inskribatuta egon baita etenik gabe eta modu eguneratuan, eta kasu jakin bakoitzaren egoerak kontuan hartuko dituen interpretazio humanizatzaile baten bidez eskakizun hori arindu duen jurisprudentzia-doktrina batekin osatu dela, babesgabetasun-kasu ez-justifikatuak saihesteko; hala, kasu bakoitzean aztertu beharko da lan-merkatutik kanpo geratu den langilea edo ukitutako pertsonaren borondatea ordezteko adinako bestelako eragozpen larririk izan den. 

Auzitegi Gorenak aztertutako kasuan, auzi-jartzaileak Langile Autonomoen Araubide Berezia utzi zuen 2010eko maiatzean, eta handik aurrera ez zen inskribatu enplegu-eskatzaile gisa, 2015eko martxoa arte; hilabete horretan bertan aurkeztu zuen ezintasun iraunkorraren eskaera, eta ez dago egoera hori justifika dezakeen arrazoirik. 

Bost urtez jarraian enplegu-eskatzaile gisa ez inskribatzeak argi erakusten du lan-mundutik urruntzeko nahia, eta egoera horretan ezin da esan gertaeraren datan langilea altarekin parekatutako egoeran zegoenik. Beraz, ezin da aitortu gaixotasun arruntagatiko ezintasun iraunkor eta osoa. 

Gure ustez epaia oso interesgarria da, batez ere altarekin parekatutako egoeren balioarengatik, bereziki langabezia-egoerari eta enplegu-eskatzaile gisa egoera horretan jarraitzeari dagokienez. 

Raquel Martínez Balbas 

Mutualiako Aholkularitza Juridikoko abokatua