Hilabetea: urria 2019

Urriaren 23tik 25era Asistentzia Kalitatearen Espainiako Elkarteak XXXVII. SECA Biltzar nazionala egingo du Donostian. 25 urte geroago, SECA Asistentzia Kalitateko Espainiako Elkartearen Biltzarra Gipuzkoako hiriburuan egingo da, oraingo honetan AKEB-Asistentzia Kalitaterako Euskal Batzordeak antolatuta.

Helburutzat hartuta asistentzia-kalitatearen arloko azken aurrerapausoak ezagutzea eta beste erakunde batzuetako praktika egokiak ikastea, Mutualia aurtengoan ere biltzarreko partaide izango da, hainbat proposamenekin: saio tekniko batean eta osoko solasaldi batean parte hartuko du, eta 5 komunikazio aurkeztuko ditu.

Gainera, AKEB-Asistentzia Kalitaterako Euskal Batzordeko batzordekidea den Miren Fernández Mujika Mutualiako Pertsonen Garapeneko zuzendariak hartuko du parte, bai Biltzarreko Zuzendaritza Batzordean, bai Antolakuntza Batzordean.

Mutualia 2019ko SECA Biltzarrean:

Urriak 24, osteguna: Saio teknikoa: “Asistentzia-kalitatea laneko mutualitateetan. Osasunean balioa sortzen: neurtzea, humanizatzea eta antolatzeko eredua”. Karmele Araujok aurkezpen bat egingo du, gai hau ardatz hartuta: “Erabiltzaileak eta humanizatzeko politikak”.

Urriak 25, ostirala: Osoko solasaldia: “Antolatzeko eredua, taldeak eta pertsonak”. Moderatzailea: Miren Fernández Mujika.

Halaber, Mutualiak bost komunikazio aurkeztuko ditu:

1. Infekzioen prebentzioa eta kontrola. Autoebaluazioa, OMEren galdetegiaren arabera

2. Osasun espazioak humanizatzea: H espazioa

3. Educator proiektua: osasun hezkuntza lantzen

4. Pazienteen segurtasun arriskuen mapak: eboluzioa eta etengabeko hobekuntza

5. Osasuna humanizatzearen esparruko fisioterapia-harremana Mutualian

Deskargatu eta kontsultatu PROGRAMA OSOA

“Munduko herritar orok salba dezake bizitza bat”. Hori da Bihotz-gelditzearen Mundu Egunerako aurtengo leloa; gaurko egunez ospatzen da, urriaren 16an. Espainian, 30.000 pertsonatik gora hiltzen dira urtero bihotz-gelditzearen ondorioz. Alabaina, horietatik % 20k bizirik jarraituko zukeen, norbaitek bihotz-biriketako bizkortze (BBB) maniobra bat egin eta berehala desfibriladore publiko bat erabili izan balitz. Datuek eurek esaten dute; horrenbestez, gero eta ezinbestekoagoa da gai horri buruz kontzientziatu eta sentsibilizatzea.

Bihotz-biriketako bizkortzerako teknikak ikasteak duen garrantziaz jabetuta, Mutualiak hainbat prestakuntza eta dibulgazio-ekimen jarri ditu abian. #MutualiaHealth Osasun hezkuntzako ikasgelen barruan, Bihotz-biriken bizkortzeari buruzko oinarrizko prestakuntza eskaini dugu, bai eta lehen esku-hartzerako materialari eta kanpoko desfibriladore automatikoei buruzkoa ere. Halaber, Gaztea gure proiektua ere badugu; DBHko gazteak sentsibilizatzeko Laneko Arriskuen Prebentzioari buruz, eta lehen sorospeneko praktikak eta BBB irakasteko.

Gogoan izan: munduko herritar orok salba dezake bizitza bat.

Ba al dakizu zer pauso jarraitu behar dituzun bihotz-biriken bizkortzean?

Katarroa arnasbideetako infekzio arin bat da, jatorri birikokoa.

Gripea goiko eta beheko arnas aparatuetako infekzio akutu bat da, influenza birusak eragina. Hiru birus mota daude: A, B eta C.

Katarroaren eta gripearen sintoma nagusiak

Desberdintasun nagusiak

Bi patologiek antzeko sintomak eduki ditzakete, baina identifikatzen saiatzea oso garrantzitsua da, tratamendua eta konplikazio posibleak ezberdinak direlako.

Katarroarekin alderatuta, gripeak honako ezberdintasun nagusi hauek ditu:

• Bat-bateko sukar altua, 38 º eta 40 ºC artean.
• Buruko mina.
• Giharretako mina.
• Neke handia.
• Ondoez orokorra.

Prebentzioa

Gure sistema immunologikoa ondo badago, bai hotzeria bai gripea prebenitu ditzakegu. Horretarako, hona gomendio batzuk:

• Elikadura askotarikoa eta orekatua izan.
• Behar beste ordu lo egin.
• Kirola erregularki egin.
• Estresa kontrolpean eduki.
• Berogarriak jantzi eta bai aire korronteak bai bat-bateko tenperatura aldaketak saihestu.
• Arrisku-talderen baten barruan egonez gero, urtero gripearen aurkako txertoa jarri.

Kutsadura saihesteko, oinarrizko higiene ohitura batzuk eduki behar dira:

• Eskuak maiz garbitzea, xaboiarekin.
• Begiak, sudurra eta ahoa ez ukitzea, germenak gure organismoan ez sartzeko.
• Eztul eta doministiku egiten dugunean, erabili eta botatzeko zapi batekin estaltzea, birusa ez zabaltzeko.
• Gaixo dauden pertsonekin tresnarik ez partekatzea.
• Espazio itxiak aireztatzea.

Tratamendua

Ez ditugu inoiz sendagaiak gure kabuz hartu behar. Lehenengo sintomak agertzen direnean, osasun-arloko profesional batengana joango gara. Berak analgesikoak, antiinflamatorioak, kongestioa kentzekoak, sudur-garbiketak… gomendatu ahal izango dizkigu.

Ez dugu antibiotikorik hartu behar, bai gripea bai katarroa birusek eragindakoak direlako, ez bakteriek, eta beraz, botika horiek ez direlako eraginkorrak sendatzeko. Antibiotikoak bakteriek eragindako konplikazioren bat izanez gero bakarrik gomendatzen dira, eta beti medikuaren agindupean.

Txertaketa-kanpaina

Gripearen eragina eta konplikazio posibleak murrizteko, gripearen kontrako txertaketa-kanpaina egiten da, arrisku-taldekotzat jotzen diren pertsona hauentzat:

• 65 urtetik gorako pertsonak.
• Patologia kroniko hauek dituzten 65 urtetik beherakoak: arnasketarekin lotutako gaixotasunak, bihotzeko gaixotasunak, giltzurrunetakoak, gibelekoak, diabetes mellitusa, immunodepresioa, etab.
• Haurdunak.
• Kolektibo horrekin harremanetan dauden osasun-arloko eta laguntza arloko profesionalak.
• Hegazti-haztegietako langileak.

Txertaketa dosi bakarraz osatuta dago. Sorbaldan edo besoan jartzen da.