-(e)an bidalia

Pertsonak mobilizatzeko eskuliburua

Osasun eta asistentzia sektoreetan, ohikoa izaten da pertsonak mobilizatu behar izatea autonomia funtzionalaren falta dela-eta, izan pertsonok lekualdatzeko, haien jarrera aldatzeko, edo errehabilitazioko ariketak, tratamenduak edo higiene-zereginak egiteko. “Pertsonak eskuz mobilizatzea” (PEM) esaten zaio horri, eta hor biltzen dira giza indarra erabilita pertsona bat edo haren pisuaren zati bat altxatu, jaitsi, eutsi, bultzatu edo arrastatzeko zeregin guztiak. 

 Horregatik guztiagatik, Mutualiak bere langile elkartuen esku jarri du Pertsonak mobilizatzeko eskuliburua. Gainera, formatu berritzailearekin aurkeztu da, “Pantonera” formatuan; hartara, modu bisual, azkar eta sinplean, pertsonak manipulatzeko mugimendu eta jarrera zuzenak zein diren ikusi ahal izango duzu, eta, hala, lesio-arriskua murriztuko duzu. 

Deskargatu hemen
-(e)an bidalia

MUTUALIA ETA DATUEN BABESA

Mutualia, Gizarte Segurantzarekin lankidetza duen mutua denez gero, babestutako besteren kontuko langileen nahiz autonomoen datu pertsonalen tratamendu-arduraduna da, erakundeak legez ezarrita dituen funtzioen kudeaketari dagokionez. Horregatik, Mutualiaren lehentasunen artean dago arlo horretako legedia betetzen dela bermatzea, hala Datuak babesteko 2016/679 (EB) Erregelamendu Orokorrak (DBLO), nola Datu pertsonalak babesteari eta eskubide digitalak bermatzeari buruzko 3/2018 Lege Organikoak (DPBEDBL) ezarritakoa, bai eta arlo horretako irizpideek, gidek eta zerikusia duen jurisprudentziak diotena eta, orobat, aplikatzeko gainerako legeriak ezarritakoa ere.

Horretarako, Mutualian lan egiten dugunok sentsibilizatzeko konpromiso osoa eta irmoa dugu lege-betebehar horiei eta segurtasun-neurriei dagokienez, une oro datu pertsonalen irisgarritasuna, osotasuna, erabilgarritasuna eta konfidentzialtasuna bermatzen baitute.

Mutualian, SEGURTASUN BATZORDEA (comitedeseguridad@mutualia.eus) dugu eratuta; politikei, prozedurei eta kudeaketa-dinamikei buruzko aholkuak emateko nahiz gainbegiratzeko lan egiten du. Gainera, informazioaren segurtasunarekin, datuen babesarekin eta pribatutasunarekin lotutako edozein zalantza, eskaera eta gorabehera izanez gero, Batzordeari jakinarazi dakioke.

Mutualiaren Informazioaren Segurtasuna Kudeatzeko Sistema egiaztatuta dago 2016az geroztik, eta 2020an berritu egin zen, ISO 27001 estandarraren arabera.

-(e)an bidalia

KONTSULTA JURIDIKOA 2021KO URTARRILA

KONTSULTA JURIDIKOA

Langile autonomo batek erretiro-pentsioa jaso dezake, konpentsazio-mekanismoaren bidez bere kotizazio-zorpekoak ordainduz gero?

Honako galdera egin digute kontsulta batean: ea bere kotizazioak “egunean” ez dituen langile autonomo batek Langile Autonomoen Araubide Bereziaren (LAAB) erretiro-pentsioa jaso dezakeen, konpentsazio-mekanismoaren bitartez kotizazio-zorpekoak ordainduz gero.

Erantzuna ezezkoa da ezinbestean. Izan ere, nahiz eta epaitegiren batek onartu, Auzitegi Goreneko Arlo Sozialeko Salak ukatu egin du aukera hori, 2020ko abenduaren 9an eman berri duen epaiaren bitartez (2084/2018 DBKE).

Goi-auzitegiaren epaiak baliogabetu egiten du eskatzaileari erretiro-pentsioa onartu zion auzialdiko epaia. Epai hori eskatzaileak LAABi zor zizkion kuotak ordaintzeko gonbidapena bete ez arren eman zen, errentarik jasotzen ez zuela aintzat hartuz eta pentsioaren kontura konpentsazioa eginez ordain zezakeela onartuz.

Entitate Kudeatzailearen helegiteari erantzuteko emandako baieste-epaian, goi-auzitegiak abiapuntutzat hartzen du GSLOren 47. artikuluak ezarritakoaren analisia, Gizarte Segurantzari egin beharreko kotizazioen ordainketak “egunean” izan beharraz, eta abuztuaren 20ko 2530/1970 Dekretuak (1970, 1501 eta 1608 LBK), Beren Konturako Langileen edo Langile Autonomoen Gizarte Segurantzako Erregimen Berezia arautzen duenak, bere 28.2 artikuluan aurreikusten duen ordainketa-gonbidapen mekanismoaz. Artikulu horren arabera:

“Era berean, aurreko artikuluko 1. zenbakiko a) eta e) bitarteko ataletan aipatzen diren prestazioak (horien artean erretiroari dagokiona) […] jasotzeko eskubidea izateko, nahitaezko baldintza da Araubide honen aplikazio-eremuaren barruan dauden pertsonek eguneratuta izatea eska dakizkiekeen kuoten ordainketa, dagokion prestazioa sortutzat jotzen den datan. Haatik, prestazioa jasotzeko eskubidea izateko bete behar den gutxieneko kotizazio-aldia beteta, hura eskatu eta Erregimen Berezi honen aplikazio-eremuaren barruan dagoen pertsonak ez baditu eguneratuta eska dakizkiokeen gainerako kuoten ordainketak, dagokion prestazioa sortutzat jotzen den datan, Entitate Kudeatzaileak interesdunari gonbidapena egingo dio zor dituen kuotak ordaintzeko, gonbidapena jaso eta 30 egun naturaleko epe luzaezinean.

Interesdunak gonbidapena aintzat hartu eta zor dituen kuotak ordainduz gero aurreko paragrafoan adierazitako epearen barruan, ordainketa horiek eguneratutzat joko dira, eskatutako prestazioari dagokionez. Zor diren kuotak epe horretatik kanpo ordainduz gero, […] ordainketa egin eta hurrengo hilabeteko lehen egunetik aurrerako ondoreekin emango da prestazioa”.

Beraz, lehenbiziko eta ezinbesteko baldintza da prestazioa jaso ahal izateko gutxieneko kotizazio-aldia ordainduta izatea (kasu honetan ez dago zuzentzeko aukerarik). Aldi hori beterik, nahitaezko baldintza da, halaber, gainerako kotizazioen ordainketa egunean izatea; hala ere, beste kotizazio horiez den bezainbatean, eta premia-egoeran behar bezalako babesa emate aldera, arauak berak onartzen du aukera dagoela zorpekoak kitatzeko, “ordaintzeko gonbidapena”ren derrigorrezko mekanismoaren bitartez hain zuzen.

Auzitegi Gorenak 2016ko ekainaren 29ko epaian (2700/2014 DBKE) dioen legez:

“… argi dago preskribatu gabeko kuotak ordaintzeko gonbidapena ez dela bidezkoa aldez aurretik gutxieneko gabealdia egiaztatu ez bada, eta egitate sorrarazlea gertatu ondoren ordaintzeak ez duela inolako birtualtasunik; edo, bestela esanda, egitate sorrarazlearen aurretik kitaturiko kuoten bidez eskuratzen da prestazioa, baina kotizazioak egunean izateko eskari osagarriak onartzen du zuzenketa egitea, ordaintzeko “gonbidapena” gerora egiteko derrigorrezko mekanismoaren bidez.

Interesdunak aintzat hartzen badu ordaintzeko gonbidapena, eta zor dituen kuotak kitatzen baditu emandako epea beteta, kuota horiek eguneratutzat joko dira prestazioaz den bezainbatean.

Interesdunak ez badio ordaintzeko gonbidapenari erantzun, aukera du zorrak geroratzea eskatzeko, garaiz eta forma egokian: lortutako geroratzea egitate sorrarazlearen aurrekoa bada, eguneratutzat joko dira haren kotizazioak, eta betetzat joko da prestazioa jaso ahal izateko egunean egoteko baldintza (hala ere, prestazioa eten liteke onuradunak ez balitu beteko geroratzearen baldintzak eta eskakizunak); lortutako geroratzea egitate sorrarazlearen ostekoa bada, zorpekoa ez da kitatzen, eta hortaz, langileak ez du betetzen egunean egoteko baldintza eta ezin du prestazioa jaso (aurrez ordaintzeko gonbidapena aintzat hartu eta bere kotizazioen zorpekoak ordaintzen ez duen arte).

Egindako kontsultaren kasuan, goi-auzitegiak ebatzitako adibidean bezala, eskatzaileak ez du betetzen kotizazioak “egunean” izateko lege-baldintza, eta baldintza hori gabe, ezin du jaso eskatzen duen LAABen pentsioa.

Azken batean, ezin da prestazioa aitortu “kotizazioetan zorpekoa” edukiz gero, proposatutako planteamenduan gertatzen den bezala.

Cristina Cearra.

Mutualiako Aholkularitza Juridikoko legelaria.

-(e)an bidalia

AUTONOMO BATEK DESKONTA DITZAKE NOIZBEHINKA EGINDAKO TELELANAREN ONDORIOZKO GASTUAK?

Autonomoek ezin izango dute telelanaren ondoriozko hornidura-gasturik deskontatu, hala nola argindarra eta internet, telelanean aritzearen zergatia noizbehinkako egora bat bada; pandemia, esaterako.

Hala ebatzi du Zergen Zuzendaritza Nagusiak (V3461-20 Kontsulta Loteslea, 2020ko azaroaren 30ekoa, Pertsona Fisikoen Errentaren gaineko Zergen Zuzendariordetza Nagusiak emana).
Kontsultaren egilea autonomo gisa jarduera ekonomikoa duen langile bat da, ohiko bizitokitik kanpoko bulego batean aritu ohi dena. Jardueraren etekin garbia zuzeneko balioespen-metodoaren bidez kalkulatzen da.

COVID-19ak sortutako egoera dela-eta, ez da egunero joaten bulegora. Horren ordez, bere etxean egiten du lan, eta, hortaz, eremu profesionalaren barruan erabiltzen ditu zenbait hornidura (argindarra, Internet, etab.). Ondorioz, horien gastua handiagoa da ohikoa baino, eta horregatik galdetu du langileak ea hornidura horietatik eratorritako gastuak deskontatzeko aukera duen.

Zergen Zuzendaritza Nagusiak erantzuna eman dio kontsultari, eta gogora ekarri du zer dioen, bere 30.2.5.b) artikuluan, azaroaren 28ko 35/2006 Legeak, Pertsona Fisikoen Errentaren gaineko Zergarenak, Sozietateen gaineko zergak partzialki aldatzekoak, Ez-egoiliarren gaineko Errentari buruzkoak eta Ondareari buruzkoak (azaroaren 29ko BOE). Honakoa ezartzen du arau horrek:

“5. Etekin garbia zuzeneko balioespenaren bidez kalkulatzean, hauek joko dira gastu kengarritzat:
(…). Zergadunaren ohiko bizitokia jarduera ekonomikoari partzialki lotuta dagoen kasuetan, bizitoki horri dagozkion hornidura-gastuak, hala nola urarena, gasarena, argindarrarena, telefoniarena eta Internetena. Zenbatekoa ezartzeko, jarduerarako baliatzen diren bizitokiaren metro koadroen eta haren azalera osoaren arteko proportzioari ehuneko 30eko portzentajea aplikatuko zaio, portzentaje horrek handiagoa edo txikiagoa izan behar duela frogatzen den kasuetan izan ezik”.

Hortaz, Zergen Zuzendaritza Nagusiak ondorioztatzen du, araudi horren arabera, zergadunaren ohiko bizitokiko zenbait hornidura jarduera ekonomikoari atxikitako gastu kengarritzat hartu ahal izateko beharrezkoa dela ohiko bizitokia jarduera horri lotuta egotea partzialki.

Ez da halakorik gertatzen azaldutako kasuan. Izan ere, bizitokia ez dago jarduerari partzialki lotuta, eta jarduerarako erabiltzearen arrazoia noizbehinkako eta salbuespenezko egoera bat da. Ondorioz, ezin izango dira deskontatu kontsultan aipatutako hornidura-gastuak (ura, argindarra, Internet…).

Bizitokia jarduera ekonomiko edo profesionalari partzialki lotuta egoteak baizik ez du aukera ematen erabilitako horniduren gastua dagokion proportzioan deskontatzeko.

Cristina Cearra.

Mutualiako Aholkularitza Juridikoko abokatua

-(e)an bidalia

MUTUALEX EPAIA 2021EKO urtarrila

SENTENCIA
epai judiziala

Izatezko bikotekidearen alarguntasun-pentsioa jasotzeko eskubidea, genero-indarkeriagatiko bizikidetza eten ondoren. Auzitegi Nagusiaren Epaia, 2020/10/14

Auzitegi Nagusiaren arabera, genero-ikuspegiarekin egindako interpretazioak 1994ko Gizarte Segurantzaren Lege Orokorraren 174.3 artikulua interpretatzera garamatza (egungo 2015eko GSLOren 221. artikulua); izan ere, gainerako baldintza guztiak betetzen baditu, genero-indarkeria zela-eta jada kausatzailearekin elkartuta ez zegoen eta bizi ez zen emakumeak izatezko bikotekideen alarguntasun-pentsioa jasotzeko eskubidea du kausatzaile hori hil ondoren.

Auzitegi Nagusiak, 2020ko urriaren 14ko epaian, ezetsi egin zuen Gizarte Segurantzaren Institutu Nazionalak Kataluniako Justizia Auzitegi Nagusiaren 2018ko martxoaren 26ko epaiaren aurka jarritako doktrina bateratzeko errekurtsoa. Errekurtso horrek arrazoia eman zion emakume bati, eta alarguntasun-pentsioa kobratzeko eskubidea aitortu zion, izatezko bikotekidea izan zuena 2012an zirkulazio-istripuan hil zen egunetik aurrera, harekin elkarbizi ez zen arren 2000. urteaz geroztik genero-indarkeriaren ondorioz. Biek seme bat izan zuten 1996an, eta zurztasun-pentsioa aitortuta du.

Auzitegi Nagusia bat dator errekurritutako epaian baieztatzen denarekin, hau da, genero-indarkeriaren biktima diren izatezko bikotekideen alarguntasun-pentsioa eskatzen duenari ezin zaiola eskatu “alarguntasun-pentsioa jasotzeko eskubidea izateko, bizikidetza mantendu beharra, nahiz eta tratu txarrak jasan, legegileak lortu nahi zuen helburua beti izan denean, eta batez ere 1/2004 Lege Organikotik aurrera, genero-indarkeriako egoera guztien aurka jardutea, bai ezkontzan, bai antzeko afektibitate-harremana dutenen artean.”

Alarguntza-pentsioari dagokionez, banantze- eta dibortzio-kasuetan genero-indarkeriaren aurreikuspena (1994ko GSLOren 174.2 artikulua eta 2015eko GSLOren egungo 220.1 eta 2 artikuluak) 2010erako Estatuko Aurrekontu Orokorren abenduaren 23ko 26/2009 Legearen hirugarren azken xedapeneko hamargarren atalaren bidez egin zen, genero-indarkeriaren biktima ziren emakumeak banantzeko edo dibortziatzeko unean konpentsazio-pentsioaren hartzekodun izateko betekizunetik salbuesteko. Hori dela eta, auzitegiak kontuan hartu behar du aurreikuspen hori analogikoki aplikatu behar zaiola izatezko bikotekideen alarguntasun-pentsioari (1994ko GSLOren 174.3 artikulua eta 2015eko GSLOren egungo 221. artikulua).

Horrela arrazoitzen du: “Lehenik eta behin, genero-indarkeriaren konkurrentziak zenbait baldintza betetzetik salbuetsi behar du, izan ere, indarkeria hori dagoenean baldintzok zentzurik ez izateaz gain (gure kasuan, heriotzaren unean bizikidetza eskatzea, nahiz eta bizikidetza emakumearen aurka erabilitako indarkeriaren ondorioz eten behar izan den), indarkeria-egoera horietan bizikidetza hori eskatzea guztiz bateraezina da tratu txarren biktima den emakumearen babesarekin. … Eta, bigarrenik, eta, batez ere, genero-indarkeriaren biktima diren emakume banandu eta dibortziatuek alarguntza-pentsioa jaso badezakete, gauza bera gertatu behar da izatezko elkarteak osatzen dituzten eta genero-indarkeriaren biktima diren emakumeekin”.

Epaiak, azkenik, oso faktore garrantzitsu bat nabarmentzen du, egiten duen azterketan kontuan hartu beharrekoa eta egiten duen genero-ikuspegidun interpretazioa ondorioztatzen duena, Emakumeen eta Gizonen Berdintasun eragingarrirako

martxoaren 22ko 3/2007 Lege Organikoak; zehazki, 4. artikuluak (“berdintasun-printzipioa txertatzea arauak interpretatu eta aplikatzean”) honako hau ezartzen du: “Emakumeen eta gizonen arteko tratu- eta aukera-berdintasuna ordenamendu juridikoaren printzipio informatzailea da, eta, beraz, arauen interpretazioan eta aplikazioan integratu eta beteko da”. Gainera, 3/2007 Lege Organikoaren 15. artikuluak honako hau xedatzen du: “Emakumeen eta gizonen arteko tratu- eta aukera-berdintasunaren printzipioak botere publiko guztien jardunaren berri emango du, zeharka. (…)”. Auzitegi Nagusiaren Osoko Bilkuraren 2009ko abenduaren 21eko 4. epaitik aurrera (201/2009 dbke), Sala honek genero-ikuspegia interpretatzeko irizpide hori aplikatu du Auzitegi Nagusiaren 864/2018 epaian, 2018ko irailaren 26koan (1352/2017 dbke); 2019ko azaroaren 13ko 778/2019 epaian (75/2018 errek.); 2019ko abenduaren 3ko 815/2019 epaian (Osoko Bilkuraren 141/2018 errek.); 2020ko urtarrilaren 29ko 79/2020 epaian (3097/2017 dbke, Osoko Bilkura); 2020ko otsailaren 6ko 115/2020 epaian (3801/2017 dbke) eta 2020ko uztailaren 2ko 580/2020 epaian (201/2018 dbke). Eta gauza bera egin behar da kasu honetan.”

Susana Castaños.

Mutualiako Aholkularitza Juridikoko abokatua

STS-14-octubre-2020_4138-1Jaitsi
-(e)an bidalia

MUTUALIA Gipuzkoako zentroen ordutegi berria

mutualia gipuzkoa

Urtarrilaren 25etik, astelehena, aurrera gipuzkoako Mutualiaren sorospen-zentroen ordutegia zabaldu egingo dela. Atxikita bidaltzen dizugu ordutegi berria: 

AZKOITIA
Ordutegia Astelehenetik ostegunera 8:00 – 15:30.
Ostirala itxita.
BEASAIN
Ordutegia : Astelehenetik ostiralera 8:00 – 17:30.
BERGARA
Ordutegia : Astelehenetik ostiralera 8:00 – 15:30.
EIBAR
Ordutegia : Astelehenetik ostiralera 8:00 – 17:30.
IRUN
Ordutegia : Astelehenetik ostiralera 8:00 – 17:30.
-(e)an bidalia

Iraupen eskia: Trebetasunak indartzen dituen modalitatea

Esqui-de-fondo
Esqui-de-fondo

Euskal Kirol Federazioen Batasunaren atal honetan, hilabete honetan, neguko garai honen oso berezkoa den jarduera bat jorratuko dugu: iraupen-eskia. Pandemia garai arraroetan murgilduta egonik, eta joan-etorriek eta eguraldiaren baldintzek ahalbidetzen badute, espezialitate hau askok praktikatzen dute, gure lurraldeko hainbat txokotan goza ditzakegun inguru liluragarrietan. Iraupen-eskia oso kirol osotzat hartzen da, eta besoetako, hanketako eta enborreko muskulu-taldeak neurri berean lantzen ditu. Teknika maila jakin bat lortu ondoren, erresistentzia-jarduera zailenetako bat ere bada.

Eskakizun aerobikoaren mailak maila altuko entrenamendua duten kirolariengan agertzen dira, birika-gaitasuna eta gehieneko oxigeno-bolumena beste edozein kirolari-taldetan baino zertxobait handiagoa denean. Kirol hau egiten dutenentzat, aipatu beharreko beste abantailetako bat da mugitzeko gakoa bultzatzea eta irrist egitea dela, eta ez duela inolako inpakturik. Beraz, ez da running-a bezain kaltegarria inondik ere; hortaz, lesioak sortzen badira, erortzearen edo talken ondorio izango dira. Pistak eski alpinokoak baino askoz ere lauagoak dira, eta, beraz, pertsona batzuek paseatzen eta patinatzen ariko balira bezala gozatzen dute. Iraupen-zirkuituetako maldak leunak direnez, ez da eski alpinoa bezain arriskutsua. Gainera, eskiatzen ikasteko modu bikaina da, lehenago eskiaren arloko ezer egin ez bada. Eta baten bat modalitate alpinoko eskiatzailea bada, errazagoa izango da, bi diziplina oso desberdin izan arren. Iraupen-eskia erresistentziako beste kirol batzuetatik bereizten da, adibidez, korrika egitetik edo bizikletan ibiltzetik, gorputzaren goiko aldeak oso zeregin garrantzitsua duelako honako honetan.

Lehen aipatu dugu, batez ere, artikulazioetarako ez dela horren traumatikoa inondik ere, eskiekin irrist egiterakoan gure gorputzarekiko inpaktuak desagertzen baitira. Eta erresistentziako kirol gisa oso onuragarria da, altueran egiten baita. Espazio horietan oxigeno gutxiago dago eta bihotza indartu egiten da, eta sistema kardiobaskularrarentzat onuragarria da.

Muskulaturari dagokionez, iraupen-eskiak irudia estilizatzen du eta oso kirol osoa da, hanketako zein besoetako giharrak tonifikatzen baititu. Beste abantailetako bat da modu autonomoan jardun daitekeela, edozein estilotan: zeharkaldia, klasikoa, patinatzailea edo biatloia, bakarka edo taldean. Gainera, naturarekin etengabeko harremana edukitzea ahalbidetzen du, eta garai honetan dugun estresa murrizten du horrek. Izan ere, iraupen-eskia egiteko zirkuituak paraje ederrak dira, pinudien artean, haranetan, bide elurtuetan… Aukeratzen den modalitatea zeharkaldikoa baldin bada, seinaleztatuta dauden ibilbideetatik ere atera daiteke, zuhurtziaz betiere.  Gainera, oso kirol dibertigarria da, bai igoeretan, bai jaitsieretan; izan ere, berriro diogu, irrist egiten joatea da modalitate honen praktikaren zati nagusia, iraupen-lasterkari ona izateko teknika beti dagoelako indarraren gainetik.

Iraupen-eskiak, beraz, gure egunerokotasunerako oso baliagarriak diren kirol-trebetasunak sustatzen ditu, eta modu erraza da irteteko eta negu honetaz familian gozatzeko. Kirol honek orekaren zentzumena ere indartzen du, giharren tonua areagotzen du, eta, bereziki, paisaia ederrez gozatzeko aukera ematen du. Une aparta da iraupen-eskia praktikatzeko.

-(e)an bidalia

2021: URTE BERRIA, MUGIKORTASUN BERRIA

e-scooter

Urte berria hasi dugu, eta, beti bezala, bi esaldi atera ohi zaizkigu ia pentsatu ere egin gabe lehenengo egun hauetako elkarrizketa guztietan, “Urte berri on” eta “Urte berria, bizitza berria”.

Trafiko Zuzendaritza Nagusiak (DGT) ere arau berrien iragarpenekin hasi nahi izan du urtea. Urtarrilean indarrean jarri diren neurrien artean, aipatzekoak dira Mugikortasun Pertsonaleko Ibilgailuei buruzkoak, hau da, patinete elektrikoei eta antzekoei buruzkoak. DGTk estatu mailako araudi bat ezarri du. Orain arte erregulazioa udal mailako araudien araberakoa zen, eta, era honetara, udal gehienen aldarriari erantzun zaio.

⇒ Mugikortasun Pertsonaleko Ibilgailuek (MPI) ezingo dute autopistetan eta autobideetan ibili, ezta herri arteko bideetan, zeharbideetan eta hiriko tuneletan ere. Horrez gainera, ezingo dute oinezkoentzako eremuetan eta espaloietan ibili. Galtzadara jaitsi beharko dute.

⇒ Ezingo dira 25 km/h-ko abiadatik gora ibili, eta laster hainbat irizpide definituko dituzte Zirkulazio Ziurtagiri bat lortzeko. Ziurtagiri hori ezinbestekoa izango da eskatutako baldintza teknikoak betetzen dituztela egiaztatzeko. 

⇒ Eta kaskoa? Erabil ditzakete gordetako erreiak, esaterako Bus eta/edo Bus-Taxi erreiak? Ikusten denez, estatu mailako irizpideen bateratze horretan ez da gai horiei buruzko ezer azaltzen, beraz, orain arte bezala jarraituko da horiek betetzeari dagokionez, udal araudiari lotuta alegia.

MPIek gero eta garrantzi handiagoa dutenez, DGTk izaera berezia eta hiriko ibilgailuaren “estatusa” eman die; beraz, ibilgailu ororen antzera, finkatutako araudira egokitu beharko dute.

MPIak, ongi etorriak araudira. “Urte Berria, Mugikortasun Berria!”