-(e)an bidalia

Pandemia garaian lo indarberritzailea izateko gomendioak

zzzzz sueño

Pandemiaren ondorioetako bat loaren nahastea areagotzea ari da izaten. Gaur egun dugun egoerak, birusari diogun beldurrak, lan- eta ekonomia-ezegonkortasunak, isolamendu sozialak eta abarrek gure loaren kalitateari eragin diezaioketen ondorioak ekar ditzakete. Gure ohitura eta errutinak aldatu behar izan ditugu, eta gerta liteke gure eguneroko atsedenean eragin negatiboa izatea horrek. Loa arinagoa da, eta gure egunerokoan neke-sentsazioa eragiten du. 

Martxoaren 19an, Loaren Munduko Eguna ospatuko da, “Lo erregularra etorkizun osasungarri baterako” goiburupean. The World Sleep Society (WSS) erakundeak sustaturiko ekimena da, eta helburu hau du: herritarrak sentsibilizatzea eta informatzea, loaren nahasteei eta kalitate oneko loak osasunean duen garrantziari buruz.  

Hona hemen The World Sleep Societyren gomendioak lo indarberritzailea izan dezazun:  

  • Jarri ordutegi bat oheratzeko eta ohetik jaikitzeko. 
  • Siesta egiteko ohitura baduzu, ez dadila izan 45 minutu baino luzeagoa. 
  • Ez edan alkoholik, bereziki oheratu baino 4 ordu lehenago, eta ez erre. 
  • Ez hartu kafeinarik oheratu baino 6 ordu lehenago; kafea, tea, freskagarriak eta txokolatea barne. 
  • Afari arinak egin. Ez afaldu oparoegi, pikante askorekin edo azukredun elikagairik oheratu baino 4 ordu lehenago.  
  • Ariketak egin erregularki, baina ez justu oheratu baino lehen. 
  • Saiatu zure ohea erosoa izan dadin. 
  • Garrantzitsua da tenperatura erosoa izatea eta logela aireztatuta izatea. 
  • Isolatu zarata eta argitik ahalik eta gehien. 
  • Gorde ohea lotarako eta sexurako soilik. Ez erabili ohea bulego, estudio edo aisialdirako leku gisa.  

Lo egitea funtsezko funtzio biologiko bat da gure organismoarentzat, era osasungarrian elikatzea edo egunerokoan ariketa fisikoa egitea bezainbat.  

-(e)an bidalia

MUTUALEX EPAIA 2021EKO MARTXOA

epai judiziala

Auzitegi Gorenaren epaia, Lan-arloko Salarena, 2021-02-3koa, 998/2018 doktrina bateratzeko kasazio-errekurtsoa (DBKE) ebazten duena. Epaia Ignacio García-Perrote Escartín jaunak eman du. 

Jarraian jorratuko dugun epaiak aztertzen du ea enpresaburuak langileari idatziz jakinarazi behar ote dion 2 urte baino lehen hobera egin duelako (48.2. art.) berrikusiko ez den ezintasun iraunkor osoaren ondoriozko lan-kontratuaren amaiera (Langileen Estatutuaren 49.1 e) artikulua), eta idatzizko jakinarazpen hori ez egitea bidegabeko kaleratzea ote den. 

Ustezko kasua hauxe da: etxeko laguntzaile gisa lan egiten duen langile bati bere ohiko lanbiderako ezintasun iraunkor osoa aitortzen zaio Gizarte Segurantzako Institutu Nazionalaren (GSIN) ebazpen bidez (jakinarazpen-data: 2017-01-20), eta ez da aurreikusten 2 urte bete aurretik lanpostura itzultzea ahalbidetuko lukeen hobekuntzaren ondoriozko ezintasun-egoera berrikusiko denik. 

Enpresak baja eman zion langileari Gizarte Segurantzan, 2017-01-18tik aurrerako ondorioekin. 

Langileak enpresari salaketa jarri zion, esanez idatzizko jakinarazpenik gabe Gizarte Segurantzan baja ematea bidegabeko kaleratzea zela. 

Dagokion Lan-arloko Epaitegiak demanda gaitzetsi zuen, baina langileak erregutze-errekurtsoa jarri zuen, eta Euskal Autonomia Erkidegoko Justizia Auzitegi Nagusiko Lan-arloko Salaren 2017-10-31ko epaiak baietsi egin zuen. Epai horren arabera, enpresaburuak idatziz jakinarazi behar dio langileari kontratua iraungitzeko erabakia; hortaz, kaleratzea bidegabetzat jo behar da, ez baitira betetzen Langileen Estatutuaren 55. artikuluaren formak. Epai horren aurka, enplegatzaileak kasazio-errekurtsoa aurkeztu zuen Auzitegi Gorenean. 

Auzitegi Gorenak, duela gutxi emandako epaian, doktrina bateratu du, eta adierazi du Langileen Estatutuaren 49.1 e) artikuluan jasotako lan-kontratua ezintasun iraunkor osoagatik iraungitzea, 2 urte bete baino lehen hobera egin duelako berrikusiko ez dena, lan-kontratua iraungitzeko legezko arrazoi bat dela: ez da beharrezkoa enpresaburuak langileari idatziz jakinaraztea, eta, beraz, idatzizko jakinarazpen hori ez egitea ez da bidegabeko kaleratzea. 

Era berean, Auzitegi Gorenak nabarmendu du, 1300/1995 Errege Dekretuaren 6.4 artikuluaren arabera, ezintasuna aitortzen duten GSINko probintzia-zuzendarien ebazpenak berehala betearaztekoak dira; hortaz, errekurtsoa jartzeko aukera alde batera utzita, ondorio guztiak zabaltzen ditu, hala nola lan-harremana iraungitzea. 

Horrez gain, adierazi behar da indarreko legeriak ez diola enpresaburuari ezartzen langileari jakinarazteko betekizun formalik, ezintasun iraunkorragatik kontratua iraungitzen bada, Langileen Estatutuaren 49.1 e) artikuluan ezarritakoaren babesean. 

Ondorioz, doktrina zuzena da ulertzea legez ez dagoela ezarrita inolako formalitaterik lan-kontratua ezintasun iraunkor osoagatik iraungitzeko, eta, ondorioz, ezin zaizkiola eskatu legez diziplinazko kaleratzeari eskatzen zaizkion formak, indarrean dagoen legeriak ez duelako horrela xedatu. 

icono pdf SENTENCIA-03.02.2021 (gaztelaniaz)PDF-a Jaitsi

Raquel Martínez. 

Mutualiako Aholkularitza Juridikoko abokatua 

-(e)an bidalia

KONTSULTA JURIDIKOA 2021EKO MARTXOA

CONSULTA-JURÍDICA
KONTSULTA JURIDIKOA

NOLA ULERTZEN DA “LAABen TARIFA LAUA” LORTZEKO EGUNEAN EGOTEAREN KONTZEPTUA? 

Lan Autonomoaren Estatutuari buruzkoren uztailaren 11ko 20/2007 Legeak (aurrerantzean, LEAL) eta ekoizpen-jarduera sustatzeari buruzko beste arau batzuek, esate baterako Hazkundea eta Enplegua Hobetzeko abenduaren 29ko 43/2006 Legeak, hainbat modu jasotzen dituzte Gizarte Segurantzako kotizazioaren kostua eramangarriagoa egiteko beren kontura ekoizpen-lanak egiten dituzten pertsonentzat. 

Zentzu horretan, ohikoa da kotizazio-oinarrietan edo Gizarte Segurantzako kuotetan murrizketak edo hobariak aitortzea langile autonomoen kolektibo jakin batzuentzat, haien baldintza pertsonalak edo gauzatutako jardueraren ezaugarri profesionalak kontuan hartuta. 

Kontsulta honen xedea hauxe da: jakitea ea LEALen 31. artikuluan langile autonomoentzat ezarritako kotizazio-onurak lortzeko (tarifa laua izenekoa), langileak Gizarte Segurantzaren kuoten araberako zorrak edukitzeagatik baldintzatuta bakarrik dauden ala ez, edo baterako diru-bilketaren kuotetan eta kontzeptuetan egunean egon behar duten; izan ere, kontsultatu zaigun kasuan, zor batzuk mantentzen dira bidegabe jasotako prestazioengatik. 

Planteatzen zaigun gaiak izaera erabat juridikoa du; garrantzi praktiko handikoa da, eta langile autonomoen kopuru handi bati eragin diezaioke. 

Erantzuna gure ordenamendu juridikoak emango digu, Gizarte Segurantzaren Lege Orokorra (GSLO) onartzen duen urriaren 30eko 8/2015 Legegintzako Errege Dekretuaren 20. artikuluan xedatutakoaren arabera. Lege horrek kotizazioan onurak eskuratzea, haiei eustea, haiek galdu eta itzultzea jorratzen du. 

Artikulu horrek xedatzen duenez, Gizarte Segurantzaren oinarri, tasa eta kuotetan eta baterako diru-bilketaren kontzeptuengatik murrizketak, hobariak edo beste edozein onura jaso ahalko dute soilik kotizatzeko betebeharra betetzeko erantzukizuna duten enpresek eta gainerako subjektuek, baldin eta haiek emateko datan haien ordainketan egunean daudela ulertzen bada. 

Hori izango da funtsezko artikulua, Hazkundea eta Enplegua Hobetzeko abenduaren 29ko 43/2006 Legearen 5. artikuluak ezin duelako planteatutako arazoa konpondu, enplegua sustatzeko programa bat arautzen baitu, lan-araubideko kontratazioa jasotzen duena, eta ez norberaren konturako jardueran sartzea. 

Horrenbestez, kontuan hartuta Gizarte Segurantzaren sistema osoari aplika dakiokeen Gizarte Segurantzaren Lege Orokorraren 20. artikuluan xedatutakoa (LAAB barne, kotizatzeko betebeharra duen edozein subjektu barne hartzen baitu), honako ondorio hau atera behar dugu: Langile Autonomoaren Estatutuari buruzko uztailaren 11ko 20/2007 Legearen (LEAL) 31. artikuluan araututako langile autonomoentzat ezarritako kotizazio-onurak lortzeko, Gizarte Segurantzako betebeharrak egunean eduki behar dira (hau da, kotizazio-kuotak). Ondorioz, kontsultatutako gaian, kuotak eguneratuta daudenez, kotizazioaren onurak lor daitezke, nahiz eta zor bat eduki bidegabe jasotako prestazioengatik. Irizpide hori du Auzitegi Gorenaren Administrazioarekiko Auzien Salaren 2020ko urriaren 1eko epaiak. 

Raquel Martínez. 

Mutualiako Aholkularitza Juridikoko abokatua 

-(e)an bidalia

SEME-ALABAK JAIOTZEAGATIK ORDAINDUTAKO BAIMENA ETA “AITATASUNAGATIK” KONTRATUA ETETEA. BATERAGARRIAK DIRA?

bebe enciam del pecho de la madre

Eboluzio handia gertatu da bi figura horien inguruko legegintzari dagokionez, eta haien analisia oinarrizko lanabesa izango da, baloratzeko ea seme-alabak jaiotzeagatik emandako baimenak, oraindik ere hitzarmen kolektibo ugaritan jasota daudenak, bateragarriak diren aitatasun-baimenarekin, edo, terminologia zehatzagoa erabiltzearren, jaiotzagatiko baimenarekin.    

Langileen Estatutuak (LE), zeina martxoaren 25eko 1/1995 Legegintzako Errege Dekretuaren bidez onartu baitzen, 37.3 b) artikuluan onartzen zuen 2 eguneko ordaindutako baimen tradizionala haurra jaiotzeagatik, eta ez zuen aitatasuna lan-kontratua eteteko arrazoitzat hartzen. Bai, ordea, amatasuna, eta huraxe besterik ez, 45.1 d) artikuluan, hamasei astez.

Emakumeen eta Gizonen Berdintasun Eragingarrirako martxoaren 22ko 3/2007 Lege Organikoak sortu zuen kontratua eteteko beste arrazoi bat: aitatasuna. Hala, LEren 45.1 d) artikulua aldatu, eta lege-testuari artikulu bat erantsi zion, 48 bis zenbakiduna eta aitatasunagatik kontratua etetea izenekoa, hain zuzen ere. Lege Organiko horren zioen azalpenean esaten zen aitatasunagatik kontratua etetea zela bizitza pertsonala, familia eta lana bateragarri egiteko neurririk berritzaileena, eta azpimarratzen zen aitari besterik ez zegokion eskubide indibiduala zela. 

Haurra jaiotzeagatik legez edo konbentzionalki aurreikusitako baimena bukatu ondoren has zitekeen gauzatzen eskubide hori. Beraz, oso erlazio argia zuten haurra jaiotzeagatiko 2 eguneko baimen ordainduak eta aitatasunagatiko etete-kausa berriak: lehenik 2 eguneko baimenaz gozatzen zen, eta, hura bukatutakoan, 13 eguneko kontratu-etenaldia hasten zen, aitatasunagatik. 

Urriaren 6ko 9/2009 Legeak 4 asteraino luzatu zuen aitatasun-baimenaren iraupena, etetearen zioa hasteko denbora-unea aldatu gabe.

2018rako Estatuaren Aurrekontu Orokorren uztailaren 3ko 6/2018 Legeak, 38.1 Azken Xedapenaren bidez, 5 asteraino luzatu zuen aitatasunagatiko kontratu-etetea, eta, azkenik, 6/2019 Errege Lege-dekretuak aldaketak ezarri zizkion Langileen Estatutuaren testu bateginari, zeina urriaren 23ko 2/2015 Legegintzako Errege Dekretuak onartu baitzuen, eta gaur egun indarrean baitago. Batetik, seme-alabak jaiotzeagatiko baimen ordainduari buruzko aipamen oro ezabatu zen (37.b) artikulua), eta, bigarrenik, amatasunak eta aitatasunak utzi egin zioten kontratua eteteko arrazoi bat izateari, eta haien ordez jaiotza ezarri zen etete-kausa berri gisa (LEren 45.1 d) artikulua).              

Kontratua “jaiotzagatik” eteteak “ama biologikoaren” lan-kontratua eteten du 16 astez, eta “ama biologikoa ez beste gurasoaren” lan-kontratua eteten du 16 astez, halaber. Era horretan, parekatu egiten du jaiotza dela-eta bi gurasoei ezartzen zaien lan-kontratuaren etenaldiaren iraupena, gizon eta emakumeen arteko berdintasun eragingarria lortzeko, eta bizitza pertsonala, familia eta bi gurasoen erantzukidetasuna sustatzeko. Parekatze hori erabatekoa da 2021eko urtarrilaren 1etik.        

Bi gurasoen lan-kontratuaren etenaldia legez parekatu eta haren iraupena 16 astekoa dela ezartzeak ekarri du ordaindutako 2 eguneko baimena ezabatzea LEren testutik. Ohikoa izaten zen negoziazio kolektiboak legezko baimen horren iraupena hobetzea, eta, hortaz, geure buruari galdetzen diogu nola interpretatu behar diren ezabatutako legezko baimen bat hobetzen duten Hitzarmenak.       

Auzitegi Goreneko Lan-arloko Salaren 2021/01/27ko epaiak, Doktrina bateratzeko Kasazio-helegitean emanak, araudiaren bilakabide hori aztertu eta xehatzen du. Haren izaera teleologikoaren arabera, bi gurasoek jaiotzagatik duten kontratu-etenaldiaren iraupena parekatzearen ondorio zuzena da haurra jaiotzeagatiko ordaindutako 2 eguneko baimena kentzea; horrez gain, eutsi egingo balitzaio haurra jaiotzeagatiko ordaindutako 2 eguneko baimenari (zeinak oso lotura estua baitzuen lehengo aitatasuneko kontratu-etenaldiaren iraupena laburragoa izatearekin), paradoxa bat gertatuko litzateke: ama biologikoa ez den gurasoak lan egiteko beharraren salbuespen-aldi luzeagoa edukitzea ama biologikoak berak baino.          

Hitzarmen Kolektiboaren aurreikuspenak lotzen badira LEren 37.3 b) artikuluan legez ezarritako baimenarekin, hark ezin du autonomia izan, legez ezabatu eta indargabetu baita baimen hura aitortzeko justifikazioa.  

Raquel Martínez.

Mutualiako Aholkularitza Juridikoko abokatua

-(e)an bidalia

MutuaLex 145 zk.

mutualex

Azken berri juridikoak. Interes orokorreko antolamenduak, buletinetan argitaratuta (E.A.E., E.H.A.A., A.L.H.A.O., B.A.O., G.A.O. eta E.B.A.O.). 2021eko martxoaren 6tik 12rako astea.

-(e)an bidalia

Arrisku kardiobaskularrak prebenitzea: zuk ere egin dezakezu!

Martxoaren 14an, Arrisku Kardiobaskularrak Prebenitzeko Europako Eguna ospatzen da, arrisku kardiobaskularreko faktoreen prebentzioan eta kontrolean aurrera egiteko kontzientzia handitzeko helburuarekin. 

Gogoan izan… NAHI BADUZU, EGIN DEZAKEZU. 

Egoneko bizitzatik ateratzeko sufritu behar duzula uste baduzu, oker zaude!  

Nahiz eta zure bizitza jardueragabea izan, pixkanaka has zaitezke zure gorputza martxan jartzen. Lehenengo pausua ez da gimnasiora joan eta hainbat ordu kirola egiten pasatzea. Aldaketaren oinarria ohiturak aldatzen hastea da, eta horrela egin dezakezu: 

· Ibili. Egunero 30 minutu gutxienez. Joan etxetik hurbil dagoen parke batera ibiltzera; bakarrik edo lagunen batekin hitz egiteko aukera aprobetxatu dezakezu. Mugimenduan egoteaz gain denbora atsegina igaroko duzu. 

· Aparkatu kotxea. Saiatu zaitez leku batetik bestera oinez joaten. Garraio publikoa erabiltzen baduzu, zergatik ez zara pare bat geltoki lehenago jaisten? 

· Erabili eskailerak. Etxean, lanean edo erosketa-zentro batera joaten zarenean eskailerak erabiltzea onuragarria izango da. Utzi igogailua benetan behar dutenentzat. 

· Atera bizikleta. Erabili garraiobide gisa: ez du zikintzen, eta zu osasuntsu mantentzeaz gain mesede izugarria egiten diozu ingurumenari. 

· Bulegoan lan egiten baduzu, egin atsedenaldi bat kanpora atera eta ibiltzeko. Mugitzeak lan-arazo eta -tentsioetatik urruntzeko aukera emango dizu. 

· Bat egin ezazu mugitzeko aukera eskaintzen dizuten hainbat talderekin. Bisitak, irteerak, bidezidor kirola, eta abar egiten duten taldeak eskura dauzkazu. 

· Aprobetxatu itzazu etxeko lanetan zabiltzan momentuak. Garbitu, margotu eta etxeko altzariak mugitzea esfortzua dira eta onuragarriak dira zuretzat. 

· Telebista ikustea gustuko duzu? Hori ere aprobetxatu dezakezu! Bizikleta estatikoa baldin baduzu jarri telebistaren aurrean eta eman pedalei! 

· Internet ere erabili dezakezu. Bilatu ariketa errazak dituzten bideoak etxean egiteko. Yoga egin dezakezu, adibidez. 

· Jarri musika etxean eta egin dantza. Ez dago hori bezain jarduera alai eta atseginagorik. 

Ez duzu aitzakiarik sofan eserita gelditzeko. Jarri zaitez martxan proposatutako ekintzaren batekin edo asmatu ezazu bururatzen zaizun gauzaren bat. Askoz hobeto sentituko zara! 

-(e)an bidalia

TESA ASSA ABLOYk 80 urte

Mikel Cristobalena

TESA ASSA ABLOYk 80 urte bete ditu. Eskoriatzan hasi zen (Gipuzkoan), maleten burdineria-fabrikatzaile gisa. Ibilbide luze eta aitorpen handikoa egin ondoren, gaur egun dena izatera iritsi da: sarbideak ixteko eta kontrolatzeko Espainiako fabrikatzaile eta hornitzaile nagusia.

Mikel Cristobalena elkarrizketatu dugu: ASSA ABLOY Opening Solutions – Iberiako HR and H&S Director dena, hain zuzen. Enpresaren eguneroko jardunera hurbilarazi gaitu, baita, bere estrategiaren ardatz gisa, bertako pertsonen segurtasunarekin eta osasunarekin duen konpromiso tinkora ere.

Zein da enpresaren jarduera nagusia, eta zeintzuk dira lortutako mugarriak?

TESA ASSA ABLOY talde multinazional bateko kidea da (ASSA ABLOY), eta produktu-aukera zabala eta betea dauka; horien artean, larrialdi-irteerako dispositiboak, zilindroak, segurtasun-sarrailak, eskuleku eta heldulekuak, ate-itxigailuak, sarbidea kontrolatzeko gailuak (zilindro elektroniko bidezkoak, elektromekanikoak eta elektromagnetikoak) eta ate korazatuak. TESA ASSA ABLOYk Latinoamerikako, Ekialde Hurbileko, Europako, Ozeano Bareko, Asiako eta Ipar Afrikako herrialdeetako merkatuetara esportatzen du.

1980an aitzindariak izan ginen: hoteletara zuzendutako aurreneko sarraila atera genuen, eta, 1995ean, hoteletarako sarraila elektronikoaren merkatuaren mundu mailako lider bilakatu ginen.

Segurtasun mekanikoaren mailan, 1982an gure lehenengo zilindro patentatua erregistratu genuen: T12 izena duena. 2011n, berriz, “DropOrbital” teknologiako ziurtasun handiko lehenengo TESA zilindroa: hain ezaguna den TK100 izenekoa.

Gure ikuspegi estrategikoaren arabera, ateak irekitzeko gailurik berritzaileenen lider eta hornitzaile izan nahi dugu. Jasangarritasuna gizarte mailako lehentasuna da ingurumenaren gaineko eragina gutxitze aldera, osasun- eta segurtasun-indizeak hobetze aldera, baita hornikuntza-katearen jasangarritasuna hobetze aldera ere. Gure beste helburuetako bat kalitateko ISO 9001 eta ingurumeneko ISO 14001 ziurtagiriak lortzea da.

Zenbat lagunez dago osatua eta zeintzuk dira haien lanbide-profilak?

Enpresa 400 bat langilek osatzen dugu. Estatuaren esparru geografikoan, ordezkaritza komertzialak ditugu Bartzelonan, Madrilen eta Irunen, eta bi ekoizpen-zentro dauzkagu, Eskoriatzan eta Irunen; azken hori da egoitza nagusia, eta 238 langile ditu. Era berean, nazioarteko hainbat bulego komertzial ditugu Lisboan, Oporton, Panaman, Dubain eta Casablancan.

TESA ASSA ABLOYk oso maila altuko I+G+b saila dauka; bertan, 28 langile daude merkaturako ebazpen teknologiko eta berritzaileak garatzera emanak, alderdi mekanikoa jorratzen dutenak zein alderdi elektronikoa jorratzen dutenak. Gainera, industria-alorreko kualifikazio altuko profilen beharra dugu, hala nola fabrikazioan, erosketetan eta kalitatean, besteak beste; horiek denak, produktua fabrikatzera eta garatzera bideratuta daude.

Bezeroarenganako orientazioa dugunez, oso langile kualifikatuak dauzkagu salmenten kudeaketan, marketinean, zerbitzu teknikoan eta bezeroaren arretan. Horietaz gain, languntza-profilak ere baditugu, informatikan, administrazioan eta giza baliabideetan.

Zer ekintza egiten dituzue lan-giro seguru eta osasungarria sortzeko?

Lehenik, laneko segurtasunaren inguruko konpromiso/kontzientziazio sendoa sortu nahi dugu. Gure helburua 0 istripu izatea da. Zorionez, bide onean goaz, oso ezbehar-tasa baxuak baititugu. Baina horrekin ez dugu nahikoa.

Horretaz gain, ekintza hauek garatzen ditugu:

  • Formakuntza eta sentsibilizazioa, gure segurtasun- eta osasun-kulturan heldutasuneranzko bidea egiteko.
  • Laneko aarriskuak desagerraraztea edo minimizatzea; horretarako sortu nahi dugun kulturaren arabera, langile-taldeak euren buruen eta lankideen segurtasunaren eta lan-osasunaren jabe sentituko dira.

Jakina, horrekin guztiarekin bat, hainbat jarduera bultzatzen dituen kudeaketa-sistema bat dugu (arrisku-ebaluaketa, ikuskapenak, auditoriak, etab.), baita lan-metodo eta ohitura seguruak ere.

Era berean, Segurtasunaren Astea egiten duzue. Noiz eta nola sortu zen ekimen hori?

Segurtasunaren Astea 2019ko urtarrilean egin zen lehenengo aldiz, eta, ondoren, 2020an eta 2021ean egin dugu. Horren helburua zera da: langile guztiak sentsibilizatzea, eta guztiei oroitaraztea lehentasuna segurtasuna dela. Eta, hain zuzen, lehentasuna segurtasuna izatea da garamatzana, sinbolikoki, Segurtasunaren Astea urteko aurreneko jardueren artean egitera.

Zer ekintza egiten dira?

Segurtasunaren Astea aste horretako 5 egunetan egiten da. Horietan zehar, hainbat jarduera egiten dira. Lehenik, Erakunde osoari zuzendutako hitzaldiak egiten dira. Horietan, TESA ASSA ABLOYk segurtasunarekin duen konpromisoa adierazten da; lan-zentro guztietako lan-taldeei Laneko Arriskuen Prebentzioaren arloko ekintza nagusiak ezagutzera ematen zaizkie; eta, era berean, haien konpromisoa eskatzen da laneko segurtasunarekin eta osasunarekin, maila indibidualean zein kolektiboan.

Hurrengo egunetan, hainbat arduradun lanpostuz lanpostu joaten dira arrisku handienak zein diren azalduz eta horiek prebenitzeko beharrezkoak diren neurriak hartzeko erne egon behar dugula gogoraraziz. Era berean, azken urtean ezarri diren segurtasun-neurri giltzarriak errepasatzen dira. Horietako hainbat langileek eurek proposatutakoak izaten dira –ekarpen horien aitorpena egiteko aprobetxatzen da–, eta hobekuntza-aukera berriak in situ detektatzeko aukera ematen da. Hobekuntza-aukera horiek honako hauei buruzkoak izaten dira: baliabide humano zein materialak, prozesu-aldaketak, baita segurtasunarekiko jarrera eta jokaera proaktiboen bilaketa ere, maila indibidual zein kolektiboan.

Azken egunean, zuzendari nagusiak, fabrikazioko zein Laneko Arriskuen Prebentzioaren arloko arduradunekin batera, aurreko eguneko segurtasun-ibilaldian detektatutako hobekuntza-aukerak in situ ezagutzen ditu.

Horrela, erakundearen egiturari transmititzen zaio zuzendaritza honek laneko segurtasunarekin duen konpromiso zalantzarik gabea eta hurbila. Era berean, 5 egun horietan zehar langile guztiei informazioa ematen zaie ongizateari lotutako hainbat gairi buruz, hala nola elikadurari buruzko jarraibideak, lantegiko ohitura osasungarriak, sedentarismoaren prebentzioa, bizkarraren eskola, etab. Asko estimatzen dute guztiek.

2021ean, Segurtasunaren Astea ekitaldi ludiko eta berritzaile batekin bukatu dugu: segurtasunari eta ongizateari buruzko galderen lehiaketa bat, online. Langile guztiek aldi berean parte hartu ahal izan dute.

Zeintzuk dira, etorkizunera begira, erronka nagusiak?

Lau zutabetan egituratuko genuke:

  1. Merkatuan hazten jarraitzea, hazkunde organikoaren bidez, baita erosketen bidez ere.
  2. Garai eta errealitate berrietara egokitzea, produktua berrituz, mekanikaren zein elektronikaren alderdietan.
  3. Prozesu efizienteak zehaztea, bezeroen eta enplegatuen asebetetzea handitzeko.
  4. Antolaketa dinamikoa izatea, une bakoitzean behar diren trebetasunak dituena, ingurune aldakor eta etengabe eboluzionatzen ari den batera egokitu ahal izateko.