-(e)an bidalia

Senitartekoa zaintzeko eszedentzia emateko arrazoia desagertzearen ondorio juridikoak

sentencia

Euskal Autonomia Erkidegoko Justizia Auzitegi Nagusiko (aurrerantzean, EAEJAN) Lan-arloko Salak, 2021/05/11n emandako epaian (674/2021 zk.dun Erregutzeko Errekurtsoa), bere enpresak aitaren familia-zaintzarako eskatu zuen eszedentzia eman zion langile baten kasua aztertu du. Aita adinean aurrera eginda zegoen eta gaixotasun larria zuen.

Enpresak eszedentzia hori eman zion urtebeterako eta adierazitako helburu bakarrerako.

Kontua da eszedentzia-egoera hori hasi eta hilabete batzuetara, eta emandako epea amaitu baino lehen, langilearen aita hil zela. Langileak ez zion horren berri eman enpresari, ez eta lanera itzultzeko eskatu ere, eta beste enpresa bati zerbitzuak ematen hasi zen.

Azkenik, jatorrizko enpresak emandako eszedentziaren epearen amaierako data hurbiltzen ari zenean, langileak lanera itzultzea eskatu zuen. Une hartan, enpresa horrek, beste bide batzuetatik jakin baitzuen langilea zaintzen ari zen pertsonaren heriotza, ezetsi egin zuen langilea lanera itzultzeko eskaera.

Enpresaren neurri horrekin ados ez zegoenez, langileak kaleratze demanda jarri zuen enpresaren aurka.

Lanpostua hutsik ez zegoelarik, enpresa horrek bi arrazoi zituen langileari lanera itzultzen ez uzteko. Lehena zen eszedentzian zegoen bitartean langileak beste enpresa bati zerbitzua emanez egin zuela lan. Bigarrenaren oinarria zen, hasieran eskatu eta eman zen arrazoia desagertu ondoren, eszedentzia borondatezkoa bihurtu zela.

Bigarren arrazoi horri dagokionez, EAEJANek adierazi du, Langileen Estatutuaren 46. artikuluan ezarritakoaren arabera, familia-zaintzarako eszedentziak araubide berezia duela, eta borondatezko eszedentziaren gainetik dagoela, besteak beste, lehenengo urtean lanpostua gordetzea barne hartzen baitu. Bada, Auzitegiak uste du senitartekoa zaintzeko berariazko eszedentzia hura eragin zuen arrazoia desagertu zenean, kasu honetan zaintzen zen aita hil zenean, langileak enpresara itzuli behar zuela. Hala egin ez duelarik, Auzitegiak uste du bere eszedentzia borondatezkoa bihurtu zela, eta horrek esan nahi du ez zuela babesten senitartekoa zaintzeko eszedentziarako aurreikusitako berariazko araubidea, baizik eta aplikagarria zitzaiola Langileen Estatutuaren 46. artikuluak berak borondatezko eszedentzietarako arautzen duena, zeinaren arabera ez den ezartzen lanpostu erreserbarik.

Azken finean, Auzitegiak ondorioztatzen du langilearen aita hiltzeak berarekin ekarri zuela senitartekoa zaintzeko eszedentziaren arrazoia desagertzea; beraz, langileak une hartan eskatu behar zuen lanera itzultzea, baina ez zuen hori egin. Beraz, jarraitzen zuen kontratua bertan behera uzteko egoera ez zegoen senitartekoa zaintzeko eszedentziaren babesean, eta borondatezko eszedentzia hasi berritzat jo behar zen, horri dagokion araubide juridikoarekin. Horrenbestez, araubide berezi hori aplikatu behar denez, eta horretan lanpostua gordetzea sartzen ez denez, Auzitegiak ondorioztatzen du enpresak lanera itzultzeari uko egitea, lanpostua hutsik ez dagoela kontuan izanda, ezin dela kaleratzetzat jo.

Kepa Bilbao

Mutualiako Aholkularitza Juridikoa

-(e)an bidalia

Euskal Kirola Telebista, euskal kirolaren bozgorailua

logo-ekfb

Unión de Federaciones Deportivas Vascas – Euskal Kirol Federazioen Batasunak sustatzen duen Euskal Kirola Telebista berria aurkezten dizuegu. Proiektu hau Bilboko Bizkaia Aretoan aurkeztu zen ofizialki, eta Euskal Kirol Federazioek antolatzen dituzten txapelketen eta ekitaldien bozgorailua da.

Emanaldiak duela hilabete batzuk hasi ziren, eta zuzenean ikusi ahal izan dira, adibidez, futbol eta saskibaloi partidak, hipika, karatea, errugbia, halterofilia, boleibola edo automobilismo probak. Gainera, egunero, astelehenetik ostiralera, 18:00etatik aurrera (Euskal Kirola Magazine -euskalkirolatb.eus-) kirol guztiak jorratzen dituen programa bat dago.

“Helburuetako bat da gure ekitaldi, txapelketa eta lehiaketa guztiak zabaltzea, Euskadin Kirol Federatuaren garapena sustatzeko. Hortik esperientzia berri hau Euskal Kirola Telebistarekin, non gure kirolei eta espezialitate ezberdinei ikusgarritasuna emateko beharrizan guztia jartzen dugun, logikoki, hori posible den neurrian. Euskal kirolaren telebista berriaren aurrean gaude”, nabarmendu du Angel Gurrutxagak, UFDV-EKFBko presidenteak.

Erronka handia da erakunde honentzat. Unión de Federaciones Deportivas Vascas – Euskal Kirol Federazioen Batasunaren oinarrietako bat den Euskadiko Kirol Federatuaren garapena sustatzeko hainbat ekitaldi, txapelketa eta lehiaketa zabaltzea da helburuetako bat. Hortik esperientzia berri hau Euskal Kirola Telebistarekin, non kirol eta espezialitate guztiei ikusgarritasuna emateko beharrizan hori betetzeko itxaropen guztiak jartzen dituzten.

Hasiera positiboa izan da, eta etorkizunerako aukerak oparoak dira. Federazioek eskertu egiten dute, eta kirolariek lehen urrats hauetan ikusgarritasun handia duten emanaldietan islatuta ikusten dute euren ahalegina.
Bestalde, Eusko Jaurlaritza eta Unión de Federaciones Deportivas Vascas – Euskal Kirol Federazioen Batasuna lanean ari dira kirol-jardueran sexuagatiko eta sexu-jazarpen eta -abusuko ekintzak gerta ez daitezen.

Horrela, Euskal Federazioek eta Jarduera Fisikoaren eta Kirolaren Zuzendaritzak egokitzat eta beharrezkotzat jotzen dute jarduteko eta laguntzeko esparru bat ezartzea, federatutako kirol-jarduera bakoitzean sexuagatiko eta sexu-jazarpena eta -abusua eragiten duten jokabideak prebenitzeko, ikertzeko eta, hala badagokio, zigortzeko.

Federazioek modu horretan lagunduko dute Zuzendaritza horrek erabakitzen dituen edo, UFDV-EKFBrekiko lankidetzan, gauzatzen diren jardueretan. Sexuagatiko eta sexu-jazarpen eta -abusuen arloan indarrean dagoen araudian aurreikusitakoa betetzeko behar diren ekintza guztiak egiten lagunduko dute, bai eta gai horiekin lotutako arau-hausteei buruzko diziplina-espedienteak hasi, izapidetu eta ebazten ere.

-(e)an bidalia

Gabon seguruak – Heimlich maniobra

Heimlich maniobra

Egun hauetaan, ospakizunekin lotutako etxeko istripuak ugaritzen dira, eta horietako bat janaria kontrako eztarritik joatea izaten da. Heimlichen Maniobra nola egin erakusten duen irudi bat emango dizuegu, kasu hauetan erabili behar den metodorik eraginkorrena baita.

-(e)an bidalia

MutuaLex- Kontsulta juridikoa 2021eko abendua

consulta

Ezkontidearen seme-alaba adingabea adoptatzen duen pertsona batek jaso al dezake adingabearen jaiotzagatiko eta zaintzagatiko prestazioa?

Aztertzen den gaia da ea eskubidea dagoen adingabearen jaiotzagatiko eta zaintzagatiko subsidioa jasotzeko, ezkontidearen edo ezkontzaren antzeko afektibitate-harremana duen pertsonaren ondorengoa adoptatuz gero.

Martxoaren 1eko 6/2019 Errege Lege-dekretuak erreforma sakona egin zuen seme edo alaba jaio ondoko amatasun- eta aitatasun-baimenen erregimenean. Aurreko erregimenean, amak hartzen zuen erditzearen ondoko 16 asteko baimenaren onura; lehenengo sei asteak nahitaez hartu behar zituen amak, eta gainerakoak aitari laga ahal zizkion. Alabaina, erregimen hori guztiz aldatu zuen aipatu dugun arauak.

Erreformarekin, Langileen Estatutuan aurreikusitako amatasun- eta aitatasun-atsedenaldiak ezabatu egin ziren, eta haien ordez atsedenaldi bakar bat ezarri. Hala, amatasun- eta aitatasun-prestazioak desagertu egin ziren Gizarte Segurantzan, eta, horren ordez, “adingabearen jaiotzagatiko eta zaintzagatiko” prestazioa ezarri zen, eta prestazio hori guraso bakoitzari aitortzen zaio, Langileen Estatutuan aurreikusitako atseden-egoeretan. Hau da, hasiera batean amak sortutako eta aitari partzialki eskualda zekiokeen baimena bazter utzi, eta beste erregimen batera jo da; eta, hor, bi gurasoek beren baimena dute, iraupen eta zenbateko berekoa, elkarri transferitzeko aukerarik gabe.

Arau-aldaketa horrek ez zuen berariaz jaso zer gertatuko zen ezkontidea edo antzeko ezkontza-afektibitateko harremana zuen pertsona bere bikotekidearen ondorengoaren guraso bihurtzen bazen adingabea adoptatuta. Adoptatzaileak, guraso bihurtzen denak, jaso al ditzake adingabearen jaiotzagatiko eta zaintzagatiko baimena eta prestazioa?

Gai hori Gizarte Segurantzako Institutu Nazionalak ebatzi du 2021eko urriaren 19an, kontsulta bati erantzunez, eta kasu horietan baimena eta prestazioa onartzearen alde egin du. GSINren ustez, aipatutako erreformaren ondorioz, baimen horiek langileen eskubide indibidual bihurtzen dira, eta eskubide horiek guraso, adoptatzaile, adopzio-helburuko zaintzaile edo hartzaileetako batek baliatu ahal izango ditu, iraupen berarekin eta transferitzeko aukerarik gabe.

GSINk adierazten du indarrean dagoen Gizarte Segurantzaren Lege Orokorraren 177. artikuluak, adingabearen jaiotzagatiko eta zaintzagatiko prestazioa aitortzeari dagokionez, babestutako egoeratzat hartzen dituela jaiotza, adopzioa, adoptatzeko asmoz egindako zaintza eta familia-harrera –betiere, azken kasu horretan gutxienez urtebeteko iraupena badu–, egoera horiengatik Langileen Estatutuaren 48. artikuluaren 4, 5 eta 6. paragrafoen arabera eta Enplegatu Publikoaren Oinarrizko Estatutuaren 49 a), b) eta c) artikuluaren arabera erabiltzen diren atsedenaldietan.

Amaitzeko, adierazten du lan-kontratuaren 16 asteko etenaldia baliatzen duen adoptatzaile, zaintzaile edo hartzaile bakoitzak eskubidea sortu ahal izango duela adingabearen jaiotzagatiko eta zaintzagatiko prestazioa jasotzeko, indarrean dagoen legeriak jaiotza-kasuetarako jasotzen dituen modu eta baldintza berberetan, eta hori alde batera utzita beste gurasoak adingabearen jaiotzagatiko eta zaintzagatiko prestazioa hartu duen edo ez, eskubide indibidual eta independenteak baitira guraso bakoitzarentzat.

Iñaki Esnal

Mutualiaren Aholkularitza Juridikoko abokatua

-(e)an bidalia

MutuaLex – Epaia 2021eko abendua

epaia

Baja, lan-kontratua iraungita zuen beste bat amaitu ondoren. prestazioa bidezkoa al da baja berrian?

Auzitegi Goreneko Gizarte-arloko Salaren epaia, 2021eko azaroaren 17koa

Aipatutako epaiaren abiaburua honako egitate-kasu hau da: langile batek baja medikoa hartu du kontingentzia arruntengatik, lan-istripuaren ondoriozko prozesu batean alta medikoa eman eta berehala. Kontingentzia profesionalagatiko bajan zegoela lan-harremana amaitu zitzaion, eta subsidioa zuzenean ordaindu zioten alta medikoa jaso arte. Langileak nahi zuen bigarren baja medikoa lan-istripuagatik izatea, baina asmo hori baztertu egin zen, beste diagnostiko bat izan zelako. Ebatzi beharreko kontua zen ea langileak aldi baterako ezintasunagatiko subsidioa irabaz zezakeen bigarren bajagatik, edo, lan-harremana aurreko bajan amaitu zenez, ea ez al zen haren hasieran oinarrizko baldintza betetzen, hau da, Gizarte Segurantzaren sisteman alta emanda edo altarekin parekatuta egotea (Gizarte Segurantzaren Lege Orokorraren 165. eta 166. artikuluak).

Prestazioa hasiera batean ukatu ondoren, langileak demanda aurkeztu zuen, eta subsidiorako eskubidea aitortzeko eskatu. Gero, eskaera hori aitortu zitzaion auzialdiko epaitegiaren epai bidez, eta erakunde kudeatzaileek erabaki horren aurka egin zuten, Kataluniako Justizia Auzitegi Nagusian erregutze-errekurtsoa jarriz. Auzitegiak errekurtsoa atzera bota zuen, subsidioa kobratzeko eskubidea berretsiz, eta erabaki hori Auzitegi Gorenaren esku jarri zen, erakunde kudeatzaileek errekurtso-bideari eutsi ziotelako.

Azkenik, aipatutako epaiaren bidez, Auzitegi Gorenak erakunde kudeatzaileen postulatuak hartu zituen, aurreko epaiak indarrik gabe utzi zituen, eta adierazi zuen kasu honetan ez dagoela prestazioa jasotzeko oinarrizko betekizuna, alegia, babestutako egoera eragin duen gertaeraren egunean Gizarte Segurantzako sisteman alta emanda edo altarekin parekatuta egotearena.

Auzitegiak egiaztatu duenez, elementu erabakigarriak dira, alde batetik, lehenengo ezintasun-prozesuan kontratua azkentzea, eta, horren ondorioz, altarik edo antzeko egoerarik ez duen egoera; eta, bestetik, bi prozesu ezgaitzaileen arteko deskonexioa; izan ere, lehena kontingentzia profesional baten ondorioa da, eta bigarrena, berriz, kontingentzia komun batena. Hori abiapuntutzat hartuta, uste du kasu honetan ez dagoela arauzko babesgabetasunik altaren betekizunaren interpretazio malgua aplikatu ahal izateko. Auzitegiak ez du inolako lege-hutsunerik ikusten Gizarte Segurantzaren Lege Orokorraren 238.1 artikuluaren interpretazioari dagokionez, kontrakoa baizik; arau horrek lan-harremana azkentzeko kasuak arautzen ditu, kontingentzia profesional eta arruntengatiko aldi baterako ezintasun-egoeretan.

Arau horrek arautzen ditu, kontingentzien arabera, lan-azkentzeak prestazioaren zenbatekoari eta langabezia-subsidioaren kontsumoari dagokienez izango dituen ondorioak; eta haren edukitik ez da lege-hutsunerik ondorioztatzen prestazioa eskuratzeko oinarrizko araua aplikatzea eragozteko, hau da, irabazi nahi den prestazio-erregimenean sartzeko baldintza komuna, alegia, gertaera eragilea gertatzen den unean sisteman altan edo antzeko egoeran egotea; kasu honetan ez da gertatzen, lan-harremana amaitu delako lan-kontingentziagatiko hasierako bajan.

Iñaki Esnal

Mutualiaren Aholkularitza Juridikoko abokatua 

-(e)an bidalia

ERAGINTZA FUNDAZIOAK 30 urte bete ditu.

Begoña errazti fundacion eragintza

Eragintza Fundazioa BBK-k, Bizkaiko Foru Aldundiak eta Confebaskek eratu zuten 1991n eta, sortu zenetik, gaixotasun mentala duten Bizkaiko pertsonei enplegua lortzea errazten die, haien banakako beharretara egokitutako laguntzak eta baliabideak sortuz. Begoña Errazti zuzendari nagusia elkarrizketatu dugu

Zer da Eragintza? 

Eragintza irabazi-asmorik gabeko fundazio bat da, eta osasun mentaleko arazoak dituzten pertsonen gizarte- eta lan-beharrei erantzuteko sortu zen. Dakigun moduan, eta OMEren datuen arabera, munduan gaixotasun mentala duten pertsonen % 90 langabezian dago. Edo, bestela esanda, gaixotasun mentalaren estigmak askatasunez eta berdintasunean garatzea eragozten dio herritarren zati bati. Eta, nahiz eta Euskadin zifrak apur bat hobeak izan, lan handia dugu egiteko. 

1991tik, enplegagarritasuna errazten duten zenbait baliabide eta zerbitzu garatu ditugu, lana bilatzeko, laneratzeko eta, ondoren, enpleguari eusteko orduan. 

Pertsona bakoitzarekin banakako plan bat prestatzen da, zeina sistematikoki ebaluatzen den, eta, plan horretan, pertsonak bere bizitzarako nahi dituen helburuak jasotzen dira. Prozesu horretan, askotariko zerbitzuak dituzte: errefortzu psikologikoa, prestakuntza, laneko orientazioa, enplegu arrunt eta babestuan laguntzea, lau zentro okupazional eta gure Lavanindu SL Enplegu Zentro Berezia. 

Horrek zuzeneko eragina du erabiltzaileen bizi-kalitatean (haien ongizatea, ahalduntzea, garapen pertsonala eta gizarte-partaidetza areagotzen ditu), baita zeharkakoa ere familiengan eta, oro har, gizartean, partaidetza aktiboa sustatzen baitu.  

Nolako prestakuntza eta orientabidea ematen dute? 

Ematen duten prestakuntzak enplegagarritasuna hobetzeko xedea du. Curriculuma hobetzeko, lan-mundurako prestatzeko eta horretarako behar diren trebetasunak lortzeko hainbat ikastaro eta programa dira: Profesionaltasun Ziurtagiri arautuak enpresetako praktikekin, administrazio publikoetako EPEetarako prestakuntza eta merkatu enplegu-emailearen beharretara egokitutako prestakuntza-ekintza aldakorren zerrenda oso bat. 

Horretarako, funtsezkoa da enpresariekin harremana izatea. Enpresetan egiten den prospekzioari esker, batetik, osasun mentalaren inguruan sentsibilizatu dezakegu, eta, bestetik, Eragintzako pertsonentzat enplegu-aukerak sor ditzakegu, baita, aldi berean, prestakuntzak merkatuaren benetako beharretara egokitu ere. Era berean, Eragintza enpresentzako baliabide bat da, haiei ere osasun mentaleko gaietan prestakuntza eta laguntza eskaintzen baitie. 

Nola gauzatzen dituzue gaixotasun mentala duten pertsonak laneratzeko prestakuntza-programak? 

Prestakuntza ez da egitate isolatua Eragintzan, hau da, kontua ez da ikastaroak egite hutsagatik egitea; aldiz, pertsona bakoitzaren Banakako Planean zehaztutako ibilbide baten zati bat da prestakuntza, eta enplegua lortzea da helburua, betiere. Batetik, lanbide-ezagutzari buruzko ikastaroek, eta, bestetik, lan-trebetasunekin lotutako beste batzuek, laguntza psikologikoarekin eta lan-orientazioarekin osatuta, aukera ematen dute azkenean enplegua lortzeko. Ez dugu ahaztu behar lau zentro okupazional ditugula lanbide-ikaskuntzarako eta askotariko lanbideak zuzenean praktikatzeko. 

Pertsona bakoitza mundu bat da, eta laguntza-premia profesional eta psikologiko desberdinak ditu; hortaz, indibidualizatu egin behar dira, enplegu-arloko helburua betetzeko. 

Gogoratu behar da, halaber, Osakidetzako erreferentziazko profesional mediko eta sozialak eta beste profesional batzuk etengabe koordinatzen direla, haien osasun-beharrak hauteman eta uneoro egokitzeko. 

Bizkaiko garapen sozialarekin konprometitutako erakundea da, eta boluntariotza bere gizarte-balioaren funtsezko alderdien artean sartzeko apustua egiten du. Boluntariotzan parte hartzeko zer nolako profila eskatzen da? 

Boluntarioei gure gizarteari egiten dieten ekarpen handia aitortu behar diegu, bai eta boluntariotzaren atzean dagoen eskuzabaltasuna ere. Gaur egun ditugunak baino boluntario gehiago izatea gustatuko litzaiguke. Eta gustatuko litzaiguke elkarrizketa honi esker jendea animatzea eta gaixotasun mentalaren inguruko beldurrak galtzea. Jo dezatela Eragintzara eta hitz egingo dugu. 

Horretarako eskatzen den profila oso zabala da. Sen oneko jendea, beste pertsona batzuei enplegurako bidean laguntzeko gogoa duena, ezagutza profesionalak dituena, informatikakoak eta psikologiakoak, esaterako, gure jarduera-sorta oso zabala baita. 

Osasun mentaleko arazoak dituzten pertsonak gizarteratzeko eta laneratzeko jardueran, nola definitzen duzue gizarteari egiten diozuen balio-ekarpena?  

Gizarte-erakundeak gastu bat direla pentsatzea ez dago jada batere modan. Argi eta garbi, ez Eragintzan edo Hirugarren Sektoreko beste erakunde batzuetan esaten dugunagatik, besterik gabe, gure ekarpenen monetarizazioak merkatuaren zuzeneko eta zeharkako balioan edo ez-merkatuko balioan horixe frogatzen duelako. 

Egoera zaurgarrian dauden pertsonei modu paternalistan laguntzeko joera zutenen pentsamoldetik, zorionez, justiziazko eta eskubidezko gizarte-pentsamolde batera igaro gara, zeinak aukera-berdintasunaren eta corpus soziala osatzen dugun pertsona guztien beharrezko partaidetzaren eta ekarpen sozialaren alde egiten duen. 

Gizartearekin konprometitutako erakunde bat gara; horregatik, gure entitatean egindako inbertsioa itzultzen saiatzen gara. Horretarako bideak askotarikoak dira: horietako bat unibertsitateko ikasleei gure ezagutza ematea da. Urtero 15 pertsonak egiten dute unibertsitateko eta graduondoko praktika. 

Baina beste asko, gastuari dagokionez, oso altuak dira: adibidez, gure laguntza psikologikoa edukitzeagatik gertatzen ez diren ospitaleratzeen gastuak saihesten dira, eta Eragintzan lana aurkitzen duten pertsonek erkidegoari ekarpena egiten diote eta beren zerga-betebeharrak betetzen dituzte, erraz ulertzeko modukoak diren bi adibide aipatzearren. 

Gaur egun, zenbait ikerketa frogatuk erakusten dutenez, jasotako euro bakoitzeko gutxienez bost euro itzultzen dira. Diruaren arloan, datuak argiak dira, baita gizarteratzeaz eta gizartean aktiboki parte hartzeaz hitz egiten dutenak ere. 

-(e)an bidalia

DONOSTIAKO EGOITZAREN ETA BULEGOAREN LEKUALDAKETA

Datorren 2022ko urtarrilean, Mutualiak bere Donostiako egoitza den bulegoa lekualdatuko du; mutuaren Camino kaleko kokapen historikoa utzi eta Mirakontxa pasealekura aldatuko da. Posta bidezko komunikazioari dagokionez, honako hau izango da helbide ofiziala:

MUTUALIA
Mirakontxa pasealekua 7, beheko solairua
20007 Donostia

Telefonoa: 943 426500


-(e)an bidalia

2022: URTE BERRIA ETA ARAU BERRIAK

.


Diputatuen Kongresuko Barne Arazoetako Batzordeak oniritzia eman dio Trafikoari, Ibilgailu Motordunen Zirkulazioari eta Bide Segurtasunari buruzko Legea aldatzeari. 2022ko martxoan jarriko da indarrean aldaketa. DGTren asmoa da zenbait arau Europako gainerako herrialdeetan daudenekin bat egitea eta hildakoen kopurua murrizten jarraitzea, istripuen zergatiak aztertuz eta konponbideak ematen ahaleginduz.

Aldaketarik polemikoena errepide arruntetan aurreratzeko abiadura-muga gainditzea baimentzen duen araua kentzea da. Espainian, muga horren gainetik orduko 20 kilometro arinago ibil zitezkeen turismo-automobilak eta motozikletak.

Aldaketak egiten diren guztietan bezala, batzuk aurka azaldu dira, eta beste batzuek, berriz, egokitzat jo dute. Zenbait plataformak jarrera kritikoa agertu dute aldaketaren aurrean, Zirkulazioko Erregelamendu Orokorraren 85. artikuluak dioena oinarri hartuta: “Aurreratzeetan, aurreratzen ari den gidaria nabarmen azkarrago joan beharko da aurreratu beharrekoa baino, eta segurtasunez egiteko behar adinako tartea utzi beharko du alboan”.


Badira, bestalde, DGTk sustatu duen araudi-aldaketa hori justifikatu eta babesten duten elkarteak;esaterako, FESVIAL (Bide Segurtasunerako Fundazioa). Besteak beste, honako arrazoi hauek aipatu dituzte neurri horren alde agertzeko:

  • Errepide arruntetako istripuek hildakoen % 70 baino gehiago eragiten dute. Normalean, aurreratzean edo aurreratzeko prestatzean gertatzen dira.
  • Zenbat eta abiadura handiagoa izan, arrisku handiagoa dago hiltzeko, eta are gehiago buruz buruzko talketan, abiadurak elkarri batzen zaizkio eta. Datuek adierazten dutenez, aurrez aurreko talka batean bizia galtzeko aukera % 50ekoa da 77 km/h-ko abiaduran, % 65era igotzen da 80 km/h-koan, % 92ra 96 km/h-koa izanez gero, eta, 105 eta 110 bitartean (gaur egun aurreratzeko behar dena), hiltzeko arriskua %100ekoa da, autoarekin 14. solairutik jaustearen baliokidea. Hori guztia, beste ibilgailuarekin abiadura batu gabe.
  • Zalantzan jartzen dute benetan premia ote dagoen 90 km/h-ko muga orokorra orduko 20 kilometroan gainditzeko, segurtasunez aurreratzeko, eta, gero, norberaren erreira itzultzean, berriz ere arauzko abiadurara itzultzeko. Abiadura-mugaren gainetik maiz gidatzera bultza dezake horrek.
  • Europako herrialdetako araudiek ez dute baimentzen aurreratzeko orduan abiadura-muga gainditzea. Hortaz, salbuespena gara.
  • Aldaketa hau onartzeak lagundu egiten du gizarteak eskatzen duen trafikoaren baretzea eta baketzea lortzen.


Arrazoi horiengatik, araudi berriari egokitu behar gatzaizkio, eta, hemendik aurrera, are kontu handiagoz egin maniobra hori. Aurreratzeko orduan, autoa ongi erabiltzea eta erabaki egokiak hartzea askoz faktore garrantzitsuagoak dira merkatuko autorik indartsuena edukitzea baino.

Hauek dira Trafiko Legearen testu bategina aldatzen duen legearen beste arau aipagarri batzuk:
Adingabeek ezin izango dute inola ere 0 alkohol-tasa gainditu (zikloak, ziklomotorrak, A1 baimeneko motozikletak eta MPIak).

  • Aldaketak puntu-galerari dagokionez: gidabaimenaren 6 puntu galduko dira gidatzen den bitartean telefonia mugikorreko gailuak eskuz oratzeagatik, bidera edo haren ingurura objektuak botatzeagatik eta txirrindulariak aurreratzean arriskua sortzeagatik edo 1,5 metroko gutxieneko tartea ez uzteagatik. Orain arte 4 puntu galtzea eragin izan dute arau-hauste horiek. Segurtasun-uhala, haurrak atxikitzeko sistemak eta kaskoa ez erabiltzeak, edo era desegokian erabiltzeak, 4 puntu galtzea eragingo du, eta ez 3, gaur egun bezala.
  • Derrigorrezkoa izango da ibilgailua abiaraztea eragozteko alkoholimetroa (alcoholock), 2022ko uztailaren 6tik aurrera matrikulatzen diren bidaiarien garraioko ibilgailuetan.