Kategoria: Sin categoría

.

Diputatuen Kongresuko Barne Arazoetako Batzordeak oniritzia eman dio Trafikoari, Ibilgailu Motordunen Zirkulazioari eta Bide Segurtasunari buruzko Legea aldatzeari. 2022ko martxoan jarriko da indarrean aldaketa. DGTren asmoa da zenbait arau Europako gainerako herrialdeetan daudenekin bat egitea eta hildakoen kopurua murrizten jarraitzea, istripuen zergatiak aztertuz eta konponbideak ematen ahaleginduz.

Aldaketarik polemikoena errepide arruntetan aurreratzeko abiadura-muga gainditzea baimentzen duen araua kentzea da. Espainian, muga horren gainetik orduko 20 kilometro arinago ibil zitezkeen turismo-automobilak eta motozikletak.

Aldaketak egiten diren guztietan bezala, batzuk aurka azaldu dira, eta beste batzuek, berriz, egokitzat jo dute. Zenbait plataformak jarrera kritikoa agertu dute aldaketaren aurrean, Zirkulazioko Erregelamendu Orokorraren 85. artikuluak dioena oinarri hartuta: “Aurreratzeetan, aurreratzen ari den gidaria nabarmen azkarrago joan beharko da aurreratu beharrekoa baino, eta segurtasunez egiteko behar adinako tartea utzi beharko du alboan”.

Badira, bestalde, DGTk sustatu duen araudi-aldaketa hori justifikatu eta babesten duten elkarteak;esaterako, FESVIAL (Bide Segurtasunerako Fundazioa). Besteak beste, honako arrazoi hauek aipatu dituzte neurri horren alde agertzeko:

• Errepide arruntetako istripuek hildakoen % 70 baino gehiago eragiten dute. Normalean, aurreratzean edo aurreratzeko prestatzean gertatzen dira.
• Zenbat eta abiadura handiagoa izan, arrisku handiagoa dago hiltzeko, eta are gehiago buruz buruzko talketan, abiadurak elkarri batzen zaizkio eta. Datuek adierazten dutenez, aurrez aurreko talka batean bizia galtzeko aukera % 50ekoa da 77 km/h-ko abiaduran, % 65era igotzen da 80 km/h-koan, % 92ra 96 km/h-koa izanez gero, eta, 105 eta 110 bitartean (gaur egun aurreratzeko behar dena), hiltzeko arriskua %100ekoa da, autoarekin 14. solairutik jaustearen baliokidea. Hori guztia, beste ibilgailuarekin abiadura batu gabe.
• Zalantzan jartzen dute benetan premia ote dagoen 90 km/h-ko muga orokorra orduko 20 kilometroan gainditzeko, segurtasunez aurreratzeko, eta, gero, norberaren erreira itzultzean, berriz ere arauzko abiadurara itzultzeko. Abiadura-mugaren gainetik maiz gidatzera bultza dezake horrek.
• Europako herrialdetako araudiek ez dute baimentzen aurreratzeko orduan abiadura-muga gainditzea. Hortaz, salbuespena gara.
• Aldaketa hau onartzeak lagundu egiten du gizarteak eskatzen duen trafikoaren baretzea eta baketzea lortzen.

Arrazoi horiengatik, araudi berriari egokitu behar gatzaizkio, eta, hemendik aurrera, are kontu handiagoz egin maniobra hori. Aurreratzeko orduan, autoa ongi erabiltzea eta erabaki egokiak hartzea askoz faktore garrantzitsuagoak dira merkatuko autorik indartsuena edukitzea baino.

Hauek dira Trafiko Legearen testu bategina aldatzen duen legearen beste arau aipagarri batzuk:
Adingabeek ezin izango dute inola ere 0 alkohol-tasa gainditu (zikloak, ziklomotorrak, A1 baimeneko motozikletak eta MPIak).

• Aldaketak puntu-galerari dagokionez: gidabaimenaren 6 puntu galduko dira gidatzen den bitartean telefonia mugikorreko gailuak eskuz oratzeagatik, bidera edo haren ingurura objektuak botatzeagatik eta txirrindulariak aurreratzean arriskua sortzeagatik edo 1,5 metroko gutxieneko tartea ez uzteagatik. Orain arte 4 puntu galtzea eragin izan dute arau-hauste horiek. Segurtasun-uhala, haurrak atxikitzeko sistemak eta kaskoa ez erabiltzeak, edo era desegokian erabiltzeak, 4 puntu galtzea eragingo du, eta ez 3, gaur egun bezala.
• Derrigorrezkoa izango da ibilgailua abiaraztea eragozteko alkoholimetroa (alcoholock), 2022ko uztailaren 6tik aurrera matrikulatzen diren bidaiarien garraioko ibilgailuetan.

Abenduaren 1ean, jardunaldi profesionala antolatu du Eusko Jaurlaritzako Trafiko Zuzendaritzak Donostian, lan-arloko bide segurtasuna ardatz hartuta. 

Josu Erkoreka Eusko Jaurlaritzako Lehen Lehendakariorde eta Segurtasuneko Sailburuak inauguratu du ekitaldia. Azaldu duenez, “Euskadin hildako edo larri zauritutako lau trafiko istriputatik bat lan-eremuan gertatzen da”. Eta datu hauek eman ditu: “Aurten, 552 istripu izan dira in itinere edo in mision, eta horietan 11 pertsona hil dira guztira, eta 47 pertsona larri zauritu dira”. 2020. urtean –urte atipikoa pandemiak eragindako mugikortasun murrizketak direla-eta– 568 istripu gertatu ziren, eta horietan 8 pertsona hil eta 52 zauritu ziren. Bide-segurtasunaren arloan sentsibilizazio- eta kontzientziazio-neurriak sustatzeko asmoz, 2018an Eusko Jaurlaritzako Segurtasun Saileko Trafiko Zuzendaritzak enpresen kudeaketan integratutako bide-segurtasuneko jardunbide egokien proiektu bat sortu zuen, INNOVABIDE izenekoa, eta Mutualia ere proiektu horretako kide da.

Jardunaldia hiru panel hauetan banatuta egon da: 

Lehenengo panela: “Innovabide, kudeaketa eta berrikuntza prozesuen bidez Bide Segurtasunarekin konpromisoa duten euskal enpresen sare estrategikoa”. Hizlari izan dira Fernando Sierra, Euskaliteko zuzendari kudeatzailea; M. del Mar Crespo, Mutualiako prebentzio arduraduna; eta Noemí Revilla, Garlaneko administrazio arduraduna. 

Mutualiaren parte-hartzearen barruan, Prebentzio Aholkularitzaren arduradun M. Mar Crespok mutualitate horri lotutako enpresen datuak aipatu ditu, hau da, EAEko langileen % 43 ingururi buruzkoak. 

Datu horien artean azpimarratzekoa da, 2020ko datuak kontuan hartu gabe, 2019ko zirkulazioko lan-istripuak guztizkoen % 8 izan zirela, horietatik ia erdiak lanera joateko bidean gertatu zirela, eguneko lehen orduetan, eta istripu horietako gehienak ibilgailuaren kontrola galtzeagatik izan zirela. 

Azpimarratu duenez, hala eskatzen duten enpresa elkartuetako pertsonei laguntza ematen zaie mugikortasun eta aholkularitza plan baten bidez, bide segurtasunari buruzko on line prestakuntzaren bidez, aurrez aurreko tailerren bidez, gure webgunean jarritako dokumentazioaren bidez, eta, Biltzarretara joanda, arazo horren berri emanez eta arazoari aurre eginez. 

Bigarren panelaren bitartez, enpresa erakundeetako mugikortasun seguruaren ikuspegi europarra landu da. Bertan izan dira Annick Starren, Laneko Segurtasun eta Osasunerako Europako Agentziaren Proiektu arduraduna; Jennifer Carson, Garraioaren Segurtasunerako Europako Kontseiluaren Proiektuaren arduraduna; eta Rui Ribeiro, Portugalgo Bide Segurtasunerako Agintaritza Nazionaleko presidentea. 

Hirugarren panela laneko istripu-tasan eragiten duten kausei eta faktoreei buruzkoa izan da. Hizlari izan dira Aitor Aritzeta, EHUko Psikologiako doktorea eta irakaslea eta Eusko Jaurlaritzaren IN-ITINERE ekimenaren zuzendaria, eta Jesús Monclús, Mapfre Fundazioko Prebentzio eta Bide Segurtasuneko zuzendaria. 

Trafikoko zuzendari Sonia Díaz de Corcuerak eman dio amaiera jardunaldiari. Adierazi duenez, “bideen erabiltzaileen eta erakundeen arteko erantzukizuna da bide-segurtasuna”, eta Innovabide Sarearen proiektua nabarmendu du, euskal erakundeek laneko bide-segurtasunarekin duten benetako konpromisoaren erakusle baita.