Hilabetea: iraila 2018

Euskal Kirol Federazioen Batasuneko beste federazioetako bat da arku-tiroarena, 1987an sortua, kirol hori maite duten zenbait arkulariri esker; esan gabe doa Parisko 1900eko Olinpiar Jokoetako programaren parte izan zela aipatutako kirola. Egiten diren lehiaketetan, hala nola, Euskadiko txapelketan eta dauden ligetan, agerian gelditzen da egunero nolako indarra, koordinazio eskerga eta punteria zorrotza behar diren. Eta, era berean, trebetasun ugari lantzen dituzte hura praktikatzen dutenek. Makina bat alderdi on dakar kirol hau praktikatzeak: besoen koordinazioa, erreflexu eta ikusmen gaitasuna, kontzentrazioa eta autokontrola, bihotz-biriketako gaixotasunen arreta, eta, orobat, estresa arintzea eta gutxitzea, pentsamendu baikorrak sortzeko onura eta goiko gorputz atalak sasoian edukitzen laguntzea, besoak, sabela eta gerria lantzen baitira. Terapia gisa ere erabiltzen da, lesioak izan dituzten pazienteak oneratzeko. Hain zuzen ere, hanketan lesioak izan dituztenek (bihurrituak, hausturak eta bestelako minak) espezialitate hau erabili izan dute, egokia baita minetik berreskuratzeko aldi horretan. Are gehiago, espezialistek ere gomendatzen dute desgaitasunak dituztenen terapietarako.

Arku-tiroa dagoen kirolik antzinakoenetakoa da, eta hala dator Guinness errekorren liburuan. Izan ere, olinpiar lehiaketa bihurtu aurretik, lerro batzuk gorago esan dugun bezala, bizirik irauteko era bat zen, eta zorroztasun eta trebetasun handia eskatzen zituen. Iraganeko denbora haietatik gaur arte, arkua eboluzionatuz joan da, eta, gaur egun, tresna sofistikatua eta zehaztasun handikoa da; hala dakar Arku Tiroaren Espainiako Federazioak. Gauza bera gertatu da arkulariekin ere, beraien teknika landu eta hobetu egin behar izan baitute. Kirol honek onura handiak dakartza osasunerako; izan ere, giharrak bizkortu eta erreflexuak garatzen ditu, eta ikusmena ondo menderatu behar da. Horrez gainera, praktikatzeko, beharrezkoa da profesionalek zainduta eta orientatuta praktikatzea. Horregatik, egokiena da Federaziora deitzea, informazioa eskuratzeko (943 45 49 49).

Gainera, haurrengan koordinazioa, lasaitasuna eta kontrola indartzen dira, eta kirolik gomendagarrienetako bat da norbere izaera eta heldutasuna lantzeko eta indar fisikoa garatzeko, betiere, prestakuntza adin bakoitzera behar bezala egokituta. Arku-tiroak gizarteratzen laguntzen die haurrei. EKFBkook azaldu ditugun ezaugarri itzel horiek denak egiaztatzeko modukoak dira edozein arkularirekin hitz eginda. Hala, segituan ohartuko gara arkulari batek nolako pasioa erakusten duen kirol onen alde. Pertsona eta arkua elkartzen direnean, egonkortasun emozionala eta psikologikoa gailentzen dira egunerokoan. Tiroa botatzeko orduan, lehenengo arnasa sakon eta mantso hartu behar da; helburua ikuskatu, eta kontzentrazio osoa hartan jarri. Egonkortasuna erabatekoa da; gorputzak T itxura hartzen du besoak lerrokatzen direnean, eta, leun-leun utzita, gezia ziztuan ateratzen da. Tentsio guztia erlaxatzen da gezia helburura doan heinean. Proba ezazue. Merezi du-eta.