Elkarrizketa: Trelleborg Izarra

18 iraila, 202021 iraila, 2020-(e)an

Elkarrizketa: Trelleborg Izarra

Trelleborg Izarrara hurbilduko gara; izan ere, enpresa hau liderra da Europan kautxuzko gaien fabrikazioan. Giza Baliabideen arduradun Rafael Garcíak elkarrizketa honetan azalduko digu nola ezarri duten laneko arriskuen prebentzioa enpresan; langileen laneko segurtasuna eta osasuna balio estrategiko eta funtsezkoetako bat da.

Elkarrizketa osoa entzun dezakezu podcast formatuan (gaztelaniaz) edota elkarrizketa osoa irakur dezakezu hemen.

Zein da Trelleborg Izarraren jarduera?

Trelleborg Izarra enpresa 60ko hamarkadatik dator. Aurreko mendean sortu zen, eta 1978an Barakaldotik (Bizkaia) Izarrara (Araba) joan zen.

Kautxuzko gaiak ekoizten dituen enpresa bat da, batez ere plantxa, eta produkzioa esportazioaren sektorera bideratuta dago. Europan aitzindari da, batez ere plantxaren merkatuan.

Zer esan nahi du prebentzioak Trelleborg Izarrarentzat?

Guztion segurtasuna eta osasuna balio estrategiko eta funtsezkoetako bat da Trelleborg Izarra enpresarentzat.

Seguru sentitzeko moduko lantokia eskaintzea ezinbestekoa da enpresaren etorkizunari eta emaitzei begira, bai eta pertsonen motibazioari begira ere.

Gainera, Prebentzio Sailean egiten ditugun jarduerak presente daude eta lagungarriak dira parte-hartzea, lankidetza, talde-lana eta etengabeko hobekuntza sustatzeko, baita beste sail batzuetan ere.

Zer bilakaera izan du prebentzioak zure enpresan?

Trelleborg Izarrako prebentzioaren bilakaera nabarmen hobetu zitekeen egoera batetik abiatzen da, azken lau urteetan planteamendu askoz positiboagora eboluzionatu baitu, eta emaitza ikusgarriak lortu baititu.

Hala izan zen, talde bat sortu zelako, bere maila profesional altua eskaintzeaz gain, ilusio handia ekarri zuena segurtasun-proiektuaren barruan. Ilusio horren ondorioz, langile guztiak ohartu ziren segurtasunaren garrantziaz, eta enpresa barruan parte hartu zuten, ideiak emanez, lankidetza jarraituak eginez, eta, batez ere, zuzendaritzaren bultzada irmoa izan da, batetik, baliabideekin eta, bestetik, pertsonen beraien parte-hartzearekin. Kasu askotan, arlo honetan aurrera egiteko beharraren eredua izan da.

Ondorioak ikaragarriak izan ziren: istripu-tasa murriztu zen, enpresaren barruan maila historikoetara iritsi zen, enpresak ISO 45001 ziurtagiria lortu zuen, eta multinazionalak zoriondu egin zuen benetan lan handia egin zuelako.

Zer politika jarri dira abian arlo horretan?

Azken urte eta erdian, informazio- eta komunikazio-fluxua hobetzeko proiektu integral bat jarri dugu martxan, istripuak murrizteko tresna gisa.

Proiektu honen bidez, laneko arriskuen prebentzioa eguneroko jardueretan txertatu nahi da, eta, horretarako, RP (plantako langile bakoitzak erabiltzen duen ekoizpen-aplikazioa) oinarrizko tresna izan behar da segurtasun-jarraibideak transmititzeko, konektatutako ekipoen larrialdi-geldialdiak egiaztatzeko, prestakuntzako eskuliburuak eskuragarri jartzeko eta arrisku-egoeren berri emateko. Horretarako, taldean lan egin behar izan dugu produkzioak, informatikak, giza baliabideek, erosketek, laneko arriskuek eta, jakina, erabiltzaileek; horrek erakusten du laneko arriskuen prebentzioa maila guztietan sartu dela.

Hori guztia funtsezko bi elementurekin lotu dugu: batetik, informazio-adierazle garrantzitsu bat erabiltzea, etengabeko emisioko telebistak, non laneko arriskuen sailak egindako jarduera erakusten baitugu –istripuak, gorabeherak, hobekuntzak, inbertsioak, bideoak, azterketak, etab.–, eta, bestetik, entrenamendu praktiko edo safety dojo bat sortzea, jolastuz ikasteko eta aldian-aldian eguneratzen diren arrisku-egoerak eta prebentzio-neurriak espazio praktikoekin aurkezteko.

17 iraila, 202017 iraila, 2020-(e)an

KONTSULTA JURIDIKOA 2020KO IRAILA

ALDI BATERAKO KONTRATUA AMAITZEAGATIKO KALTE-ORDAINEK KOTIZATZEN ETA ZERGARIK ORDAINTZEN DUTE?

Kontsulta honek bi alderdi ditu aldi baterako kontratuak amaitzearen ondoriozko kalte-ordainak jasotzeari dagokionez: kontratuaren epea amaitzeagatik eta kontratuaren xede den obra edo zerbitzua amaitzeagatik iraungitako kalte-ordainak.

Horri dagokionez, lehenik eta behin, kalte-ordain horrek kotizatzeko derrigortasunaren ikuspegitik dituen ondorioak aztertuko ditugu. Maiz planteatu den arazoa izanik, honakoa ondorioztatu dezakegu: kotizazio-oinarritik kanpo dago zerbitzu-urte bakoitzeko 12 soldata-egun ordaintzetik ateratzen den zenbatekoaren zati proportzionalari dagokion kalte-ordaina, edo, hala badagokio, aplikatzekoa den araudi espezifikoan ezarritakoa, ordaindutako zenbatekoaren soberakinagatik bakarrik kotizatuta.

Irizpide hori da Gizarte Segurantzaren Diruzaintza Nagusiak hartzen duena, eta, Gizarte Segurantzaren Lege Orokorraren 147.2.c) artikulua oinarri hartuta, ezartzen du, ez direla kotizazio-oinarrian zenbatuko:

c) Heriotzagatiko kalte-ordainak eta lekualdatze, etete eta kaleratzeei dagozkienak.

Heriotzagatiko kalte-ordainak eta lekualdaketei eta eteteei dagozkienak kotizaziotik salbuetsita egongo dira aplikatu beharreko arau sektorialean edo hitzarmen kolektiboan aurreikusitako gehieneko zenbatekora arte.

Langilea kaleratzeagatiko edo kargutik kentzeagatiko kalte-ordainak salbuetsita egongo dira, Langileen Estatutuaren Legearen testu bateginean, hori garatzeko araudian edo, hala badagokio, epaiak betearazteko araudian nahitaez ezarritako zenbatekoan, eta ezin izango da halakotzat hartu hitzarmen, itun edo kontratuaren bidez ezarritakoa.

Laneko kontratua adiskidetze-ekitaldia egin aurretik azkentzen denean, salbuetsita egongo dira kaleratzeagatiko kalte-ordainak, baldin eta bidegabe deklaratu izanez gero legokiokeena gainditzen ez badute, eta baja-plan edo -sistema kolektibo pizgarridunen esparruan elkarren arteko adostasunez azkentzeak ez badira.

Aurreko lerroaldeetan xedatutakoari kalterik egin gabe, kaleratze kolektiboen ondorioz kaleratzeak edo kargu-uzteak gertatzen badira, Langileen Estatutuari buruzko Legearen testu bateginaren 51. artikuluan xedatutakoaren arabera izapidetuta, edo testu bategin horren 52.c) artikuluan aurreikusitako arrazoiek eragindakoak badira, eta bi kasuetan arrazoi ekonomikoak, teknikoak, antolakuntzakoak, ekoizpenekoak edo ezinbesteko kausak direla-eta gertatu badira, kalte-ordainaren zatia salbuetsita geratuko da. Estatutu horretan kaleratzeko ezarritako nahitaezko mugak gainditzen ez dituen heinean.

Bigarrenik, langile batek aldi baterako kontratua amaitzeagatik jasotzen duen kalte-ordaina aztertuko dugu, fiskalitatearen ikuspegitik; Pertsona Fisikoen Errentaren gaineko Zergan tributatu behar al da?

Horren inguruko eztabaida, halaber, Pertsona Fisikoen Errentaren gaineko Zergari buruzko Legearen 7. artikuluaren aplikazioan oinarritzen da, eta, zehatzago, Pertsona Fisikoen Errentaren gaineko Zergari buruzko abenduaren 5eko 13/2013 Foru Arauaren 9.5 artikuluan, non honako hau ezartzen baita:

“Salbuetsita egongo dira errenta hauek:

(…) 5. Langilea kaleratzeagatiko edo kargutik kentzeagatiko kalte-ordainak, Langileen Estatutuan, hura garatzeko erregelamendu-araudian edo, hala badagokio, epaiak betearazteko araudian nahitaez ezarritako zenbatekoan; zentzu horretan, ez dira halakotzat hartuko hitzarmen, itun edo kontratuaren bidez ezarritakoak. Era berean, salbuetsita egongo dira Euskadiko Kooperatibei buruzko ekainaren 24ko 4/1993 Legearen 103. artikuluaren 2. paragrafoa aplikatuz bazkideak kooperatiban baja hartzean jasotzen dituen kalte-ordainak, Langileen Estatutuaren 52. artikuluaren c) idatz-zatian aurreikusitako kargu-uzterako lan-araudiak nahitaezko gisa ezarritako zenbateko berean. (…) “.

Hala, auzitegi batzuek zenbait ebazpenetan aipatutako kalte-ordainak salbuetsiak direla ezartzen duten bitartean, bai Zerga Agentziak bai Foru Ogasunak jarraitutako irizpideak pertsona fisikoen errentaren zergaren barruan ez salbuestea eta zergak ordaintzeko beharra adierazten du, eta horrek zalantza eta galdera handia sortzen du ordainsari horiek jasotzen dituzten langileengan. Zer irizpide jarraitu behar da?

Arazoaren funtsa da ea aldi baterako kontratua amaitzeagatiko kalte-ordainak kaleratzeagatiko kalte-ordainaren tratamendu bera duen ala ez zehaztea, eta, zentzu horretan, konponbide desberdinak eman zaizkio auzitegien eta zerga-agentzien aldetik.

Hala, auzitegiek interpretatzen dutenez, langileak iraupen jakineko kontratuen kasuan jasotzen dituen zenbatekoek enpleguaren galera konpontzen dute, eta, beraz, kalte-ordain horiek PFEZaren 7. artikuluan eta Pertsona Fisikoen Errentaren Zergari buruzko Foru Arauaren 9.5. artikuluan salbuetsitako errenta gisa sartu behar dira.

Adibide gisa, Auzitegi Nazionaleko Administrazioarekiko Auzien Salaren 2013ko uztailaren 17ko epaia edo Euskal Autonomia Erkidegoko Auzitegi Nagusiko Administrazioarekiko Auzien Salaren 2016ko urriaren 20ko epaia ditugu.

Bestalde, Estatuko ogasunek eta foru-ogasunek egiten duten interpretazioa daukagu. Horien arabera, kalte-ordain horiek ez daude salbuetsita lan-errendimendutzat hartzen direlako, eta ez langilea kaleratzearen edo kargutik kentzearen ondoriozko kalte-ordaintzat, Zergen Zuzendaritza Nagusiaren 2016ko martxoaren 22ko V1167/2016 kontsultan adierazi bezala.

Nolanahi ere, murrizketa-ehuneko egokiak aplikatu ahal izango dira, kontratuaren amaierako kalte-ordaina sortzeko aldiaren arabera, kasu bakoitzean aplikatu beharreko araudiaren arabera.

Horrela, zerga-erakundeen eta zenbait ebazpen judizialen artean dagoen irizpide-desberdintasunaren arabera, zergapekoak jarraitu beharreko irizpidea zehazteari buruzko problematika sortzen da.

Ikuspuntu praktiko batetik, aldi baterako kontratuaren likidazioagatiko kalte-ordaina jasotzen dute langileek. Kalte-ordain horretan, enpresak PFEZari buruzko atxikipena egin du jatorrian, eta, beraz, diru-sarrera egin eta Ogasunari jakinarazi dio. Hala badagokio, langileak berak hasi behar du izapidea ogasunaren aurrean, eta, ondoren, auzia judizializatu ahal izango du, jasotako zenbatekoak salbuespenak direla oinarri hartuta.

Jesus Mª Vicente

Mutualiako Aholkularitza Juridikoko abokatua

17 iraila, 202021 urria, 2020-(e)an

MUTUALEX EPAIA 2020KO IRAILA

BUROFAX BIDEZ JAKINARAZITAKO KALERATZEA. ZEIN DATATIK AURRERA HASTEN DA ZENBATZEN KALERATZEAREN EKINTZA ERABILTZEKO IRAUNGIPEN-EPEA?

AUZITEGI GORENAREN URTARRILAREN 29KO 82/2020 EPAIAREN ANALISIA.

Langileen Estatutuaren 55.1 artikuluak enpresaria behartzen du langileari idatziz jakinaraztera diziplinazko kaleratzea, eragiten duten gertaerak eta eraginen data idatziz jasota. Aldi berean, kaleratze horri uko egitera zuzendutako ekintza, Langileen Estatutuaren 59.3 artikuluaren arabera, langileak enpresaren jakinarazpenaren berri duenetik hurrengo 20 egun baliodunetan iraungitzen da, eta hasieran epe hori eten egiten du bide jurisdikzionalera jo aurretiko nahitaezko adiskidetzeak.

Hortik ondorioztatzen da adierazitako iraungipen-epearen zenbaketa hasten den egunaren garrantzia. Sarritan, jakinarazpen horren betebeharrak araututa datoz hitzarmen kolektiboetan, baina berariazko jarraibiderik edo aplikatu daitekeen arau konbentzionalik ez badago, ez da ezohikoa telegrama bezalako jakinarazpen bideak erabiltzea, edo, zehatzago esanda, Correosen Burofax zerbitzua erabiltzea.

Posta-zerbitzuaren Burofaxa erabiltzen denean, ez da ezohikoa Correoseko langileak jasotzailea bere bizilekuan ez topatzea; kasu horretan, beste jakinarazpen saiakera batek huts egiten badu, zerbitzuaren bulegoetan jasotzeko hilabeteko epea dagoela adierazten duen oharra uzten da. Egoera horrek zalantzak sortzen ditu kaleratzearen ekintza erabiltzen hasteko epearen inguruan. Jakinarazpenaren data izango da edo, aitzitik, hilabeteko epean bulegoetan jaso den data?

Auzi hori Auzitegi Gorenaren arlo Sozialeko Salaren 2020ko urtarrilaren 29ko epaian argitu da. Epai horrek argitu zuen kaleratzearen ekintzaren iraungipen-epea hasteko “dies a quo” bat datorrela burofaxa posta-bulegoan jasotzen den egunarekin. Auzitegi Gorenaren ustez, langilea kanpoan egoteagatik jakinarazpena bere bizilekuan jaso ez izanak ez du ezein kasutan ekartzen jokabide oztopatzaile edo jasotzearen kontrakoa; horretarako, Auzitegia Posta Zerbitzuen Erregulazio Araubidearen abenduaren 3ko 1829/1999 Errege Dekretuari lotzen zaio. Bertan xedatzen denez, jasotzailea bere bizilekuan ez badago, abisu bat utziko zaio, eta bidaltzailea nor den eta dagokion posta-bulegoan jasotzeko hilabeteko epea duela adieraziko zaio.

Baloratu den kasu zehatzean, instantziako epaiak zein Madrilgo Justizia Auzitegi Nagusiak emandakoak iraungita deklaratu zuten ekintza. Izan ere, abisuaren data jo zuten zenbaketa hasteko datatzat, eta Auzitegi Gorenaren epaiak ezeztatu egin zuen irizpide hori; horren arabera, epe hori bat dator posta-bulegoan jasotako epearekin, abisuaren datatik 28 eguneko aldea baitzegoen.

Iñaki Esnal

Mutualiako Aholkularitza Juridikoko abokatua

STS-82-2020 Descarga

16 iraila, 202016 iraila, 2020-(e)an

EUROPAKO MUGIKORTASUN IRAUNKORRAREN ASTEA

Nola ibili bizikletan hirian zehar segurtasunez

Urtero, irailaren 16tik 22ra, MUGIKORTASUNAREN EUROPAKO ASTEA egiten da. Ekimen hau 1999an sortu zen Europan, eta mugikortasun jasangarria sustatzea du helburu, jardunbide egokien eta neurri jasangarrien garapena sustatuz. Aurten, kanpainarako aukeratu den leloa “Isurketarik gabeko mugikortasunaren alde” da, eta Europako Itun Berdean jasotako helburua islatzen du: 2050. urterako CO2 isurietan neutraltasuna lortzea, eta pertsona guztiek zero isuriko garraio-sistemetara irispidea izatearen garrantzia nabarmentzea.

Aste honen barruan, irailaren 22an, Hiria, autorik gabe! ekitaldia egingo da. Mutualiak bat egiten du ekimen horrekin, babestutako langileak hirian zehar egiten dituzten joan-etorrietan bizikleta erabiltzera animatuz. Alabaina, hiri handietan ibilgailu asko daudenez eta oinezko asko bizi direnez, eta ibilgailu-motaren ezaugarriak direla-eta, bizikleta-erabiltzaileak gero eta ahulagoak dira zirkulazio-istripuei dagokienez. Funtsezkoa da bizikleten erabilerari dagozkion segurtasun-arauak ezagutzea, eta, horretarako, hirietako mugikortasun jasangarrirako bitarteko gisa bizikleta modu seguruan erabiltzeari buruzko dekalogo bat ematen dugu.

Arauei dagokienez, “Zirkulazioko Araudi Orokorrak” bizikletaz egiten den garraioa arautzen du; hala ere, udalerri bakoitzak trafikoari eta zirkulazioari buruzko edo mugikortasun jasangarriari, bizikleten zirkulazioari eta abarri buruzko bere ordenantzak ezar ditzake.

Arau orokor gisa honako hau ezarri da:

1. Kaskoa eta jantzi islatzaileak: kaskoari dagokionez, nahitaezkoa da 16 urtetik beherakoek erabiltzea. Helduen kasuan, hiriguneetan erabiltzea derrigorrezkoa ez bada ere, gomendagarria da beti. Hiriarteko eremuetan, errepidean kaskoa derrigorrezkoa da pertsona guztientzat. Jantzi islatzaileak erabiltzea ez da nahitaezkoa, baina une oro erabiltzea gomendatzen da, bereziki argitasun gutxiko baldintzetan (iluntzean, lainoarekin, euriarekin eta abar).

2. Segurtasun elementuak: bizikletak atzeko eta aurreko gurpiletarako balaztak izan behar ditu, eta, horrez gain, gainerako pertsonei bere presentziaren berri emango dien txirrina ere izan behar du. Argiztapenari dagokionez, bizikletak aurreko eta atzeko argiak izan behar ditu, eta derrigorrezkoa da elementu islatzaile bat izatea hiriarteko bideetan gauez zirkulatzeko.

3. Bidaiari kopurua: bizikletan (tandemean izan ezik), gehienez ere bi bidaiari joan daitezke, betiere, laguntzailea zazpi urtetik beherakoa bada eta eserleku homologatu batean bidaiatzen badu.

4. Debekatuta dago soinu-hartzaileei edo -erreproduzitzaileei konektatutako aurikularrak erabiltzea, bai eta telefono mugikorra erabiltzea ere.

5. Baimendutako alkohol-tasa 0,5 g/l da odolean edo 0,25 mg/l arnastutako airean.

6. Maniobrak seinaleztatzea: edozein maniobrari ekin aurretik, autoen eta oinezkoen posizioa begiz egiaztatuko da, eta maniobra seinaleztatuko da: maniobra abiatu aurretik (besoa horizontalki luzatuz sorbaldaren parean); eskuinera biratzean (ezkerreko besoa gorantz tolestuta eta ahurra luzatuta, edo, bestela, eskuineko besoa horizontalean eta esku-ahurra beherantz luzatuta); ezkerrera (ezkerreko besoa sorbaldaren parean horizontalki luzatuz eta eskua

beherantz irekita, edo, bestela, eskuineko besoa gorantz tolestuta eta esku-ahurra luzatuta); eta frenatu edo gelditutakoan (besoa goitik behera mugituz, txandaka, mugimendu labur eta azkarrekin).

7. Zebrabideetan, bizikletentzako pasabide espezifikorik ez badago, debekatuta dago bizikletan ibiltzea, eta, beraz, erabiltzaileak bizikletatik jaitsi eta oinez zeharkatu beharko du.

8. Seinaleztatutako bidegorria dagoenean, bizikletaren erabiltzaileek erreitik zirkulatu behar dute, eta ez galtzadatik, eta pasatzeko lehentasuna izango dute autoekiko. Bidegorririk ez badago, beti galtzadatik ibili beharko da, inoiz ez espaloitik. Bi errei baino gehiago badaude, eskuinetik ibili beharko da.

9. Noranzko bakarreko bide batean biratzean, bizikletaren erabiltzaileak galtzadaren ezkerreko ertzetik ahalik eta gertuen jarri beharko du bere burua, eta maniobra aldez aurretik seinaleztatu. Noranzko bikoitzeko bide batean, biratzean, erdibitzailera edo galtzadaren ardatzera hurreratu behar da, kontrako noranzkoan sartu gabe, eta seinaleztatu.

10. Biribilguneetan, txirrindulariek pasatzeko lehentasuna dute ibilgailu motordunen aurretik, baldin eta, taldean zirkulatuta, lehen bizikleta gurutzatzen hasi bada edo biribilgune batean sartu bada. Talde osoa alegiazko ibilgailu bakar bat balitz bezala tratatu beharko da.

Mutualiaren Prebentzio-Aholkularitza

16 iraila, 202016 iraila, 2020-(e)an

MUTUALIAK 2020KO PAZIENTEEN SEGURTASUNAREN NAZIOARTEKO EGUNA OSPATUKO DU

Mutualia erakunde aitzindaria da pazienteen segurtasunerako duen estrategian. Irailaren 17an eta aste osoan zehar, OMEren kanpainarekin bat egingo dugu, pazienteen segurtasuna osasunaren arloko mundu-mailako lehentasuna dela bultzatzek

Ospakizun horren helburua da osasun-arreta seguruagoa ematen lagunduko duten jardunbide seguruak sustatzea, eta hori COVID-19aren ondorioz bizi dugun egoeran are garrantzitsuagoa dela frogatu da.

Egun hori ospatzeko, Mutualian zenbait jarduera abiarazi ditugu, ardatz komun baten inguruan: Mutualiak emandako osasun-laguntzan gure pazienteak COVID-19 gaitzetik babestea, eta gure langileen babesa ere ahalik eta gehien sustatzea, haiek ematen baitute arreta hori, eta, hortaz, pazienteekin harreman zuzena dutelako. Besteak beste, honako bideo hau grabatu dugu, Mutualian COVID-19rik gabeko ingurune bat lortzeko hartu ditugun neurriak zabaltzeko.

15 iraila, 202014 iraila, 2020-(e)an

MUTUALEX 122

Azken berri juridikoak. Interes orokorreko antolamenduak, buletinetan argitaratuta (E.A.E., E.H.A.A., A.L.H.A.O., B.A.O., G.A.O. eta E.B.A.O.).

2020ko irailaren 5etik 11rako astea.

MUTUALEX 122 zk PDFa Jaitsi

14 iraila, 202014 iraila, 2020-(e)an

GARAPEN IRAUNKORREKO HELBURUAK: GJH 2

MUTUALIA ETA 2. GJH ZERO GOSEA HELBURUA

Gosea desagerraraztea eta pertsona guztiek, bereziki pobreek eta egoera ahulean dauden pertsonek, elikadura osasungarria, elikatzailea eta nahikoa urte osoan zehar izan dezaten bermatzea.

Inbertsioak handitzea, baita nazioarteko lankidetza handiagoaren bidez ere, landa azpiegituretan, nekazaritza ikerketan eta hedatze zerbitzuetan, garapen teknologikoan eta landareen nahiz abereen gene bankuetan, garapen bidean dauden herrialdeetan nekazaritzako ekoizpen gaitasuna hobetu dadin, batez ere gutxien aurreratutako herrialdeetan.

EKINTZAK

Aldaketak egin daitezke eguneroko bizitzan –etxean, lanean eta komunitatean–, nekazariei edo tokiko merkatuei lagunduz eta elikadurari buruzko erabaki jasangarriak hartuz, guztiontzako nutrizio ona babestuz eta elikagaiak alferrik galtzearen aurka borroka eginez.

Kontsumitzaile eta boto-emaile gisa daukagun boterea ere erabil dezakegu, enpresek eta gobernuek Zero Gosea helburua lortzeko erabakiak har ditzatela eta aldaketak egin ditzatela eskatuz. Parte har dezakegu, nola sare sozialetako plataformetan, hala gure tokiko komunitateetan.

ADIERAZLEAK

G4-EC1 Sortutako eta banatutako balio ekonomiko zuzena

G4-EC7 Inbertsioaren garapena eta eragina egituretan eta zerbitzu motetan

G4-EC8 Zeharkako eragin ekonomiko esanguratsuak eta horien irismena.

G4-HR8 Herri indigenei egindako eskubide urratzeen kasu kopurua eta hartutako neurriak.

14 iraila, 202014 iraila, 2020-(e)an

Irudi erradiologikoak pazientearen zerbitzura: mutualia health-en proiektu berria

Osasun digitaleko gure proiektua, gure eraldaketa digitalerako estrategian barneratuta dagoena, UPV/EHUren Udako Ikastaroen barruan egin den Osasun Digitaleko Kongresurako hautatu, eta bertan aurkeztu da.

Proiektu berria honetan datza: pazienteak bere irudi erradiologikoak, kalitate diagnostikoarekin, eskueran izango ditu, ordenagailu bat eta CD irakurgailu bat izateko beharrik gabe. Hala, pazientearekiko arreta hobetuko dugu, eta ingurumenarekiko gure konpromisoari ekarpena egiten diogu.

Nola funtzionatzen du?

· Mutualia APPa. APP horren bidez, pazienteak bere irudietarako sarbidea dauka.

· Plataforma, lainoan. Pazienteak txartel bat dauka, esteka eta pin bana dituena; horren bidez, bere txostenetara sar daiteke, Interneteko konexioa duen edozein gailu erabilita. Plataforman, bistaratzea azkarragoa eta erosoagoa da, eta irudietara sartzeko eta horiek trukatzeko aukera ematen zaie, bai pazienteari bai osasun langileari.

Zerbitzuak segurtasunari eta datu pertsonalen babesari dagozkion estandar gorenak betetzen ditu.

Ingurumenarekin konpromisoa

Mutualiaren estrategian txertatutako gure Garapen Jasangarriko Planean, helburua da GJHak betetzeko lanean jarraitzea. CDak eta inprimatutako materiala alde batera utzita, murriztu egin dugu plastikoa eta alde batera utzi azetatoa; horrela, ingurumena babesten lagunduko dugu.

Proiektu horri esker, eraldaketa digitaleko prozesuan aurrera egiten dihardugu, eta pazientearekiko arreta eta haren segurtasuna da gure ardatz nagusia.

8 iraila, 20207 iraila, 2020-(e)an